ەۋروپا ليگاسى: «استانا» «دينامودان» جەڭىلىپ قالدى

استانا. قازاقپارات - بۇگىن ەلوردالىق «استانا» ءوز الاڭىندا كيەۆتىڭ «دينامو» كومانداسىن قابىلدادى، دەپ حابارلايدى قازاقپارات ءتىلشىسى.

فۋتبولدان ەۋروپا ليگاسى K توبىندا كوش باسىندا كەلە جاتقان قوس كوماندا بۇگىن كىمنىڭ مىقتى ەكەنىن انىقتاۋعا بەلسەندى قيمىل كورسەتتى. ايتا كەتەرلىگى، قوس ۇجىم بۇگىنگە دەيىن سەگىز-سەگىزدەن ۇپاي جيناعان. سوندىقتان ەكەۋى دە جەڭىسكە جەتۋ جولىن ويىن باسىنان-اق ىزدەيتىنى انىق ەدى.

«استانا» كومانداسى باس باپكەرىنىڭ مىندەتىن اتقارۋشى گريگوري بابايان كەزدەسۋدىڭ العاشقى مينۋتىنان نەناد ەريچ، باكتيەر زاينۋتدينوۆ، ەۆگەنيي پوستنيكوۆ، مارين انيچيچ، انتونيو رۋكاۆينا، يۆان مايەۆسكي، لاسلو كلياينحايسلەر، ريچارد المەيدا، مارين توماسوۆ، رومان مۋرتازايەۆ مەن دجۋنيور كابانانگانى شىعاردى. ال «دينامونىڭ» باس باپكەرى الەكساندر حاتسكيەۆيچ ءوز شاكىرتتەرى اراسىنان دەنيس بويكو، نيكيتا بۋردا، تاماش كادار، توماش كەندزەرا، ۆيتالي ميكولەنكو، چە چە، ۆلاديمير شەپەليەۆ، نيكولاي شاپارەنكو، سيدكلەي پەرەيرا، بەنيامين ۆەربيچ پەن ۆيكتور تسىگانكوۆقا سەنىم ءبىلدىردى.

العاشقى مينۋتتان-اق الاڭ يەلەرى شابۋىلعا شىعۋعا ءمان بەردى. ءتىپتى ولاردىڭ ەسەپ اشاتىن مۇمكىندىكتەرى بولعان ەدى. مۇنداي ساتتەردىڭ بىرىندە مارين توماسوۆ ءوز مۇمكىندىگىن ءمۇلت جىبەرسە، ەندىگى بىرىندە دجۋنيور كابانانگا بەرىلگەن پاسقا ۇلگەرە العان جوق. ايتەۋىر، ءبىزدىڭ جىگىتتەرگە ساتتىلىك جەتىسپەي جاتقانداي كورىندى. ءبىرازدان كەيىن «دينامو» ويىنشىلارى دا الاڭعا بوي ۇيرەتە باستاعانى اڭعارىلدى. ولار قارىمتا شابۋىلدارعا ءمان بەردى. «دينامو» ويىنشىسى بەنيامين ۆەربيچ 29-مينۋتتا ءوز كومانداسىن العا شىعاردى. بۇدان كەيىن «استانا» فۋتبولشىلارى شابۋىلدى ۇدەتە ءتۇستى. دەگەنمەن ونى الدىڭعى شەپتە تۇيىندەيتىن ويىنشى تابىلماي جاتتى. ءبىرىنشى كەزەڭ 1:0 ەسەبىمەن «دينامونىڭ» جەڭىسىمەن اياقتالدى.

ەكىنشى كەزەڭدە گريگوري بابايان «استانا» ساپىنان ءبىرقاتار ويىنشىلاردى الماستىردى. ريچارد المەيدانىڭ ورنىنا سەرىكجان مۋجيكوۆ شىقسا، دجۋنيور كابانانگانىڭ ورنىنا رومەلو يانگا شىقتى. ءبىزدىڭ جىگىتتەر «دينامو» قاقپاسى ماڭىن ءجيى تورۋىلدادى. دەگەنمەن كوپ ساتتە ساتتىلىك جەتىسپەي جاتتى. بۇگىنگى كەزدەسۋدە «دينامو» 1:0 ەسەبىمەن جەڭىسكە جەتتى.

بۇگىن وسى توپتا تاعى ءبىر ويىن وتەدى. «يابلونەتس» ءوز الاڭىندا «رەننمەن» شەبەرلىك بايقاسادى. ەندى «استانا» سىرت الاڭدا 13-جەلتوقساندا فرانسيادا «رەننمەن» كەزدەسەدى. ال «دينامو» ءدال وسى كۇنى ءوز الاڭىندا چەحيانىڭ «يابلونەتس» كلۋبىن قابىلدايدى.

ەستەرىڭىزگە سالا كەتەلىك، «استانا» بۇعان دەيىن ءتورت ويىن وتكىزدى. الدىمەن كيەۆتە جەرگىلىكتى «دينامومەن» 2:2 ەسەبىندە تارقاستى.

ودان بەرى «استانا» ەكى مارتە جەڭىسكە جەتىپ، ءبىر تەڭ ناتيجەگە قاناعات ءبىلدىردى. ءوز الاڭىندا فرانسيانىڭ «رەنن» كلۋبىن 2:0 ەسەبىمەن جەڭسە، سىرتتا چەحيانىڭ «يابلونەتس» كلۋبىمەن 1:1 ەسەبىمەن تەڭ وينادى.

اتالمىش كوماندامەن ءۇش اپتا بۇرىن ەلوردا تورىندە قارىمتا ويىن وتكىزىپ، بۇل كەزدەسۋدە 2:1 ەسەبىمەن جەڭىسكە جەتتى.