تۇركىستان وبلىسىندا «قازاق داستارحانى» فەستيۆالى ءوتتى
بىرەگەيلىك پەن بىرلىكتى، ەتنوسارالىق كەلىسىمدى قامتاماسىز ەتۋدى كوزدەگەن شاراعا وڭىردەگى زيالى قاۋىم وكىلدەرى مەن «انالار كەڭەسىنىڭ» قۇرامى، قازاقستان حالقى اسسامبلەياسى وبلىستىق قۇرىلىمدارىنىڭ جەتەكشىلەرى مەن وڭىردەگى ەتنومادەني بىرلەستىكتەردىڭ بەلسەندى مۇشەلەرى قاتىستى، دەپ حابارلايدى قازاقپارات ءتىلشىسى.
بارشا ەتنوستاردى قوعامدىق باستامالارعا ۇيىستىرۋ ارقىلى قازاق حالقىنىڭ ماڭايىنا توپتاستىرۋ ماقساتىندا ۇيىمداستىرىلعان شارادا تۇركىستان وبلىستىق قازاقستان حالقى اسسامبلەياسى حاتشىلىعى مەڭگەرۋشىسىنىڭ مىندەتىن اتقارۋشى مادينا كامەدەنوۆا وبلىس اكىمى جانسەيىت تۇيمەبايەۆتىڭ قۇتتىقتاۋىن جەتكىزدى. ول «قازاق داستارحانى» فەستيۆالىنىڭ ماڭىزىنا توقتالدى.
«ءداستۇرلى «قازاق داستارحانى» فەستيۆالى - وڭىردەگى ەتنوستار اراسىندا تاتۋلىق پەن دوستىقتىڭ ايعاعى. ءبىزدىڭ مىندەتىمىز - قازاقتىڭ ۇلتتىق تاعامدارىن قايتا جانداندىرىپ قانا قويماي، قازاق مادەنيەتى مەن ءارتۇرلى ەتنومادەني ورتالىقتار قۇرۋ، ولاردى ءبىر باستامامەن بىرىكتىرۋ» ، - دەدى مادينا كامەدەنوۆا.
شارا بارىسىندا ءارتۇرلى ەتنوس وكىلدەرى قازاق ۇلتتىق تاعامدارىن دايىنداۋعا اتسالىستى. ولار ەت اسىپ، داستارحان دايىنداپ، قوناقتاردى ۇلتتىق داستۇرمەن كۇتىپ الدى. وسىلايشا «قازاق داستارحانى» دەگەندى قالاي تۇسىنەتىنىن، سايىسقا قاتىسۋشى ەتنوس وكىلدەرى ءوز دەڭگەيىندە كورسەتە ءبىلدى. ءىس- شاراعا قاتىسقان ءوڭىر تۇرعىندارى ەتنومادەني بىرلەستىكتەر جانىنداعى ونەر ۇجىمدارى دايىنداعان كونتسەرتتىك باعدارلامانى تاماشالاپ، ۇلتتىق تاعامداردان ءدام تاتتى.
قازىلار القاسىنىڭ شەشىمىمەن باس جۇلدەگە وبلىستىق يران ەتنومادەني بىرلەستىگى لايىقتى دەپ تانىلدى. ءبىرىنشى ورىندى سايرام اۋداندىق فيليالى يەلەنسە، ەكىنشى ورىن تۇرىك جانە تاجىك ەتنومادەني بىرلەستىكتەرىنە بۇيىردى. ءۇشىنشى ورىندى تولەبي اۋداندىق فيليالى، وزبەك جانە سلاۆيان ەتنومادەني بىرلەستىكتەرىنە بەرىلدى. سايىس جەڭىمپازدارىنا العىس حاتتار مەن قارجىلاي سىيلىقتار تابىستالدى.
