مينيستر قانشا ادامنىڭ جۇمىسسىز قالاتىنىن ايتتى

 استانا. قازاقپارات - ق ر ەڭبەك جانە حالىقتى الەۋمەتتىك قورعاۋ ءمينيسترى ءمادينا ءابىلقاسىموۆا وتاندىق ەڭبەك نارىعىنا قاتىستى بولجامىن جاريالادى، دەپ حابارلايدى قازاقپارات ءتىلشىسى.

ونىڭ سوزىنە قاراعاندا، بيىل ەڭبەك نارىعىنا بولجام جاساۋدىڭ ۇلتتىق جۇيەسى قۇرىلدى. وسىعان وراي، ءتيىستى زاڭناماعا وزگەرىستەر ەنگىزىلدى. قازىرگى بولجامعا سايكەس، 2025 -جىلعا دەيىن قازاقستاندا ورتاشا جانە جوعارى بىلىكتىلىگى بار ماماندارعا سۇرانىس ارتادى. ال بىلىكتىلىگى تومەن ادامدارعا باسقا جۇمىس ىزدەۋگە تۋرا كەلەدى.

 «7 جىلدىڭ ىشىندە شامامەن  758000 ادام ەڭبەك نارىعىنان تىس قالادى. ولاردىڭ باسىم بولىگى - بىلىكتىلىگى تومەن ماماندار جانە ناقتى ءبىلىمى جوق جۇمىس كۇشى. اۋىل شارۋاشىلىعى مەن ونەركاسىپتى سيفرلاندىرۋدىڭ ناتيجەسىندە ءبىراز ادامدارعا جۇمىستى اۋىستىرۋعا تۋرا كەلەدى. دەگەنمەن، بىزدە جاقسى جاڭالىق بار. الداعى ۋاقىتتا شامامەن 1 ميلليون جاڭا جۇمىس ورنى اشىلادى. سونىڭ ءبارى ەكونوميكانىڭ وندىرىستىك الەۋەتى جوعارى سالالاردا قۇرىلادى. ءبىراق اتالعان بوس ورىندارعا جوعارى بىلىكتىلىك ءارى كاسىبي دايىندىق قاجەت بولادى. سوندىقتان بىزگە ۇلكەن مىندەت جۇكتەلىپ وتىر. ويتكەنى جۇمىسسىز قالعان مامانداردى قايتا دايارلاپ، جاڭا جۇمىس ورىندارىنا ورنالاستىرۋ قاجەت» ، - دەدى م. ءابىلقاسىموۆا ەڭبەك نارىعىنىڭ بولاشاعىنا ارنالعان حالىقارالىق فورۋمدا.

 ايتا كەتەيىك، بۇگىنگى فورۋمنىڭ پلەنارلىق ماجىلىسىنە ق ر پرەمەر- ءمينيسترى باقىتجان ساعىنتايەۆ قاتىستى. ۇكىمەت باسشىسى ەڭبەك نارىعىن دامىتۋعا قاتىستى جوسپارلاردى جاريالادى. ونىڭ ايتۋىنشا، الداعى 7  جىلدا 2 ميلليون جاس مامان - ۋنيۆەرسيتەت پەن كوللەدج ستۋدەنتتەرىنە جۇمىس تاۋىپ بەرۋ كەرەك.

 بۇدان بولەك، شەتەلدىك ساراپشىلاردىڭ باياندامالارىنا قاتىستى ءوز ويىن ءبىلدىردى.