انيماتسيالىق «كۇلتەگىن» فيلمىنە تۇركيا قىزىعۋشىلىق تانىتىپ وتىر

 استانا. قازاقپارات - جاقىندا عانا جارىققا شىققان وتاندىق «كۇلتەگىن» انيماتسيالىق فيلمىنە تۇركيا قىزىعۋشىلىق تانىتىپ وتىر، دەپ حابارلايدى قازاقپارات ءتىلشىسى.

«ارينە، گولليۆۋد بولماساق تا، ءبىزدىڭ كينولارعا سۇرانىس بار. كوبىندە اۆتورلىق فيلمدەرگە سۇرانىس ءجيى تۋىنداپ جاتادى. دارەجان ومىربايەۆ اعامىزدىڭ فيلمدەرىن ءالى كۇنگە دەيىن كينوفەستيۆالدەر ساتىپ الۋدا. ەمير بايعازيننىڭ بارلىق فيلمدەرى كەلىسىمشارت ارقىلى ءوتىپ جاتىر. ونىڭ ءبىر كورسەتىلىمىنىڭ ءوزى بىزگە قارجى اكەلەدى. سونىمەن قاتار، ءسابيت قۇرمانبەكوۆ تۇسىرگەن «ورالمان» فيلمى يتاليادا قىسقا پروكاتتا بولدى. ول دا - ءبىز ءۇشىن جەتىستىك» ، - دەدى مادەنيەت جانە سپورت مينيسترلىگىنىڭ باسپا ءسوز ورتالىعىندا وتكەن بريفينگتە ش. ايمانوۆ اتىنداعى «قازاقفيلم» كينوستۋدياسىنىڭ باسپا ءسوز حاتشىسى اينۇر يسايەۆا.

ارىپتەسىنىڭ ءسوزىن بريفينگ بارىسىندا «قازاقفيلم» كينوستۋدياسىنىڭ انيماتسيالىق كينو- شىعارماشىلىق بىرلەستىگىنىڭ باسشىسى اداي ءابدىلدا ءىلىپ اكەتتى.

 «جاقىندا عانا شىققان «كۇلتەگىن» انيماتسيالىق فيلمىنە قازىر تۇركى اعايىندارىمىز قىزىعىپ جاتىر. ويتكەنى، تۇركى تىلدەس حالىقتار بولعاننان كەيىن تاقىرىپ ورتاق. سول تۇرعىدان العاندا ءبىز تۇركسوي ۇيىمى ارقىلى مادەني شارالار اياسىندا انكارادا نەمەسە ستامبۇلدا كورسەتەتىن ويىمىز بار» ، - دەيدى اداي ءابدىلدا.

 ەسكە سالا كەتسەك، ەلىمىزدەگى كينوتەاترلاردا قازىرگى تاڭدا «كۇلتەگىن» انيماتسيالىق فيلمى كورسەتىلىپ جاتىر.