پوروشەنكو ناتو- دان ازوۆ تەڭىزىنە كەمە جىبەرۋدى سۇرادى

استانا. قازاقپارات - ۋكراينا پرەزيدەنتى پەتر پوروشەنكو ناتو- نى ۋكراينانى قورعاپ، ازوۆ تەڭىزىنە كەمەلەرىن جونەلتۋگە شاقىردى.

29 - قاراشا كۇنى نەمىستىڭ Bild گازەتىندە جاريالانعان سۇحباتىندا پوروشەنكو ەۋروپا ەلدەرى كەرچ بۇعازىنداعى جانجالدان سوڭ بەلسەندى قيمىلدايدى، اسىرەسە رەسەيگە سالعان سانكتسياسى مەن ۋكراينانى اسكەري جاعىنان قورعاۋدى كۇشەيتەدى دەپ ۇمىتتەنىپ وتىرعانىن ايتتى.

«ءبىز ناتو ەلدەرى ۋكراينانى قولداپ، قاۋىپسىزدىكتى قامتاماسىز ەتۋ ءۇشىن ازوۆ تەڭىزىنە كەمەلەرىن جىبەرەدى دەپ ۇمىتتەنەمىز» دەدى پوروشەنكو. ول رەسەي پرەزيدەنتى ۆلاديمير پۋتين ءوزىن «ورىس يمپەراتورى»، ال ۋكراينانى «رەسەيدىڭ كولونياسى» سانايتىنىن ايتتى. «ءبىز رەسەيدىڭ باسقىنشى ساياساتىن قابىلداي المايمىز. اۋەلدە قىرىمدى الدى، سوسىن ۋكراينانىڭ شىعىسىنا كىردى، ەندى ازوۆ تەڭىزىن العىسى كەلەدى» دەدى ۋكراينا پرەزيدەنتى.

ازوۆ تەڭىزى رەسەي 2014 -جىلى اننەكسيالاپ العان قىرىم تۇبەگى مەن رەسەي جانە ۋكراينانىڭ قۇرلىقتاعى تەرريتورياسىن ءبولىپ تۇر. رەسەي بيىل مامىردا كەرچ بۇعازىندا كوپىر سالۋ ارقىلى قىرىمدى ءوزىنىڭ كراسنودار ولكەسىمەن قوسىپ، بۇعازعا باقىلاۋ ورناتقان. كەرچ بۇعازى - قارا تەڭىزدەن ازوۆ تەڭىزىنە وتەتىن جالعىز وتكەل. ازوۆ تەڭىزى جاعالاۋىندا ۋكراينانىڭ بىرنەشە پورتى ورنالاسقان. ال قارا تەڭىز نەگىزىنەن ناتو باقىلايتىن اكۆاتوريا سانالادى.

ۋكراينا ناتو قۇرامىندا بولماسا دا، اليانسقا سەرىكتەس ەل. ناتو بۇعان دەيىن ۋكراينانى قولدايتىنىن مالىمدەپ، رەسەيدى ۋكراين تەڭىزشىلەرىن بوساتۋعا جانە كەمەلەرىن قايتارۋعا شاقىرعان. 26 - قاراشادا ناتو باس حاتشىسى يەنس ستولتەنبەرگ رەسەيگە بۇعازداعى ارەكەتىنىڭ «كەرى سالدارى بولاتىنىن» ەسكەرتكەن.

25 - قاراشا كۇنى تاڭەرتەڭ كەرچ بۇعازىندا رەسەي اسكەريلەرى ۋكراين كەمەلەرىن اتقىلاپ، ۇستاپ اكەتكەن. بىرنەشە اسكەري جارالانعان. رەسەي ۋكراين كەمەلەرىن تەرريتورياسىنا «زاڭسىز كىردى» دەپ ايىپتاسا، ۋكراينا كەمەلەردىڭ بۇل اۋماقتان وتەتىنى «الدىن- الا ەسكەرتىلگەنىن» ايتىپ، رەسەي ارەكەتىن «باسسىزدىق» دەپ اتاعان.

ۋكراينا قارۋلى كۇشتەرىنىڭ مالىمەتىنشە، اتىستان كەيىن 23 ادام بولعان كەمەلەرمەن بايلانىس ۇزىلگەن. التى ۋكراين ساربازى جارالانعان. ونىڭ ەكەۋىنىڭ ءحالى اۋىر، ۇشەۋى كەرچ اۋرۋحاناسىندا جاتىر. جاعدايلارى ءبىر قالىپتى.

28 - قاراشادا ۋكراينانىڭ رەسەيمەن شەكتەسەتىن ون وبلىسىندا ءبىر ايعا اسكەري جاعداي جاريالاندى.

www.azattyq.org