سۋىق جەردە جۇمىس ىستەگەن جاقسى - ۇكىمەت باسشىسى

استانا. قازاقپارات - ق ر پرەمەر-ءمينيسترى باقىتجان ساعىنتايەۆ ەڭبەك نارىعىنىڭ بولاشاعىنا ارنالعان حالىقارالىق فورۋمنىڭ پلەنارلىق ماجىلىسىنە قاتىستى.

سول جەردە ول شەتەلدىك ساراپشىلاردىڭ بايانداماسىن تىڭداپ، ءوز پىكىرىن ءبىلدىردى، دەپ حابارلايدى قازاقپارات ءتىلشىسى.

«مەن ساراپشى مامانداردىڭ باياندامالارىن مۇقيات تىڭداپ شىقتىم. ءوزىم ناقتى ءۇش شەشىمگە كەلدىم. بىرىنشىدەن، قازاقستان ۇكىمەتى وسى جەردە ايتىلعان ماسەلەلەردىڭ ءبارىن قولعا الىپ، ءتيىستى شارالاردى اتقارىپ جاتىر. ەڭبەك نارىعىن دامىتۋعا قاتىستى بارلىق شەشىمدەرىمىز ساراپشىلاردىڭ ويىمەن سايكەس كەلىپ تۇر. بۇل - قۋانتارلىق ءجايت. ەكىنشىدەن، جاڭا عانا سينگاپۋردان كەلگەن ارىپتەسىمىز اۋا رايى تۋرالى ايتتى. مەنىڭشە، ىستىق ءارى قاپىرىق اۋا رايىنا قاراعاندا سۋىق جەردە جۇمىس ىستەگەن جاقسى. ويتكەنى دالادا اپتاپ ىستىق تۇرسا، جۇمىس ىستەۋ قيىن»، - دەدى ب. ساعىنتايەۆ.

ۇكىمەت باسشىسى ازيا دامۋ بانكىنىڭ ساراپشىلارىنا دا كەڭەس بەردى. اتالعان ماماندار قازاقستانعا اراعا 10 جىل سالىپ كەلگەندەرى جايىندا ايتىپ قالدى.

«قازاقستانعا 10 جىل سايىن ەمەس، ءجيى كەلىپ تۇرىڭىز دەگىم كەلەدى. سوندا ءبىزدىڭ نە ىستەپ، نە قويعانىمىزدى انىق بىلەتىن بولاسىزدار. سول كەزدە ءبىزدىڭ ناقتى قاي باعىتتا دامىپ كەلە جاتقانىمىزدى تۇسىنەسىزدەر. بۇل بىرگە جۇمىس ىستەۋگە جول اشادى»، - دەپ اتاپ كورسەتتى ب. ساعىنتايەۆ.

ايتا كەتەيىك، پرەمەر-ءمينيستردىڭ ءوزى پلەنارلىق ماجىلىستە بايانداما جاساعان بولاتىن. ب. ساعىنتايەۆ ۇكىمەتتىڭ ەڭبەك نارىعىن دامىتۋعا قاتىستى جوسپارلارىن جاريالادى. ونىڭ ايتۋىنشا، الداعى 7 جىلدا 2 ميلليون جاس مامان - ۋنيۆەرسيتەت پەن كوللەدج ستۋدەنتتەرىنە جۇمىس تاۋىپ بەرۋ كەرەك.