استانا مەكتەپتەرىندە ساباق بولمايدى

استانا. قازاقپارات - استانا قالاسىندا اۋا رايىنىڭ قولايسىزدىعىنا بايلانىستى مەكتەپ وقۋشىلارىنىڭ ساباعى توقتاتىلدى، دەپ حابارلايدى قازاقپارات قالالىق ءبىلىم باسقارماسىنا سىلتەمە جاساپ.

«2018 -جىلدىڭ 29 - قاراشاسى كۇنى اۋا رايىنىڭ قولايسىزدىعىنا بايلانىستى قالا مەكتەپتەرىنىڭ ەكىنشى اۋىسىمىنداعى 0-11(12) سىنىپ وقۋشىلارى ءۇشىن ساباق بولمايدى»، - دەپ حابارلادى ءبىلىم باسقارماسىنىڭ رەسمي وكىلى جازيرا اسانوۆا.

 ايتا كەتەيىك، «قازگيدرومەت» ر م ك 28-30 - قاراشا كۇندەرى ەلىمىزدىڭ 8 وڭىرىندە كۇن سۋىتاتىنىن حابارلادى. استانا قالاسىندا قار جاۋىپ، بۇرقاسىن جانە كوكتايعاق بولادى. وڭتۇستىك- باتىستان سوعاتىن جەلدىڭ باعىتى سولتۇستىك- باتىسقا اۋىسىپ، ونىڭ ەكپىنى تاڭەرتەڭ جانە تۇندە 15-20 م/س، كەي ۋاقىتتاردا 25 م/س جەتۋى مۇمكىن. 30 - قاراشا تۇندە اۋا تەمپەراتۋراسى 15-17 گرادۋسقا دەيىن تومەندەيدى.

اۆتور: ايجان سەرىكجان قىزى