التى جاسار قازاقستاندىق شاحماتشى تاشكەنتتە مەدال الدى

تاراز. قازاقپارات - التى جاسار ءبيبىسارا ابىلاي قىزى باتىس ازيا شاحمات چەمپيوناتىندا ەلگە قولا مەدالمەن ورالدى.

بۇل تۋرالى قازاقپارات وبلىستىق دەنەشىنىقتىرۋ جانە سپورت باسقارماسىنا سىلتەمە جاساپ حابارلايدى.

ۆەدومستۆو تاراتقان حابارلاماعا سايكەس، شاحماتتان باتىس ازيا چەمپيوناتى تاشكەنت قالاسىندا ءوتتى، وعان 11 ەلدەن كەلگەن 200 دەن استام سپورتشى قاتىستى. قازاقستاننىڭ نامىسىن ءتۇرلى جاستاعى 22 سپورتشى قورعاعان. ولاردىڭ سەگىزى عانا جۇلدەلى ورىن الدى.

ءبيبىسارا ابىلاي قىزى التى جاستا، ول قازاقستان قۇراماسىندا التى جاسقا دەيىنگى كاتەگوريادا راپيد جانە كلاسسيكالىق جارىستا سىنعا ءتۇستى.

ايتا كەتسەك، ءبيبىسارا تاراز قالاسىنداعى 2№ وبلىستىق مامانداندىرىلعان وليمپيادا جەتكىنشەكتەرىن دايارلايتىن بالالار-جاس وسپىرىمدەر سپورت مەكتەبىندە حالىقارالىق شاحمات فەدەراتسياسىنىڭ (FIDE) جوعارى ساناتتاعى بۇكىل الەمدىك ينسترۋكتورى نۇرگۇل يلانبەكوۆانىڭ جەتەكشىلىگىمەن دايىندالىپ ءجۇر.

شاحماتتان باسقا، قىز بالا ءان ايتىپ، جۇزۋمەن اينالىسادى، اعىلشىن ءتىلىن مەڭگەرىپ ءجۇر.