ادامدار الەمدەگى ەڭ تانىمال سارايعا بارۋعا نەگە قورقادى؟
بۇل سارايدا تۇنەگەن كەز كەلگەن ادام دالىزدە جۇرگەن اياقتاردىڭ دىبىسى مەن قابىرعالاردان كۇلگەن داۋىستاردى ەستيدى ەكەن. ارۋاقتار ارپالىساتىن سارايدىڭ جانتۇرشىگەرلىك جۇمباقتارىن Ok.ru سايتىنا سىلتەمە جاساعان NUR. KZ جازادى.
1. قارعىس اتقان 873-بولمە
873- ءنومىر تۋرالى ايتىلعان اڭىزعا سۇيەنسەك، عيماراتتى سالىپ جاتقان قۇرىلىسشىلار بولمەلەردىڭ بىرىنە ەسىك، تەرەزە سالۋدى ۇمىتىپ كەتكەن. باسشىلاردان قورىققان قىزمەتكەرلەر ونى جاسىرىپ، قۇپيا بولمە ەتىپ قويعان ەكەن. ءبىراق ۋاقىت وتە كورشى بولمەلەرگە قونعان ادامدار بەلگىسىز ەلەستەر مەن داۋىستارعا ارىزدانا باستاپتى.
بۇل جاعداي 1926-جىلى، قوناق ۇيدەن ءورت شىققانعا دەيىن جالعاسقان. سول جىلى ءورت سوندىرۋشىلەر عيماراتتا قۇپيا بولمە بولعانىن انىقتاسا، جۇرتشىلىق وندا ولگەن قۇرىلىسشىلاردىڭ رۋحتارى مەكەندەگەن دەپ توپشىلاعان كورىنەدى.
ەكى جىلدان سوڭ قايتا جوندەۋدەن وتكەن قوناق ۇيدە بۇرىنعى قۇپيا بولمەنىڭ ورنىنا 873 ءنومىرى جازىلعان. سول ۋاقىتتا تۇندەلەتىپ سەندەلگەن رۋحتار از ۋاقىتقا جوعالعانىمەن كەيىن قايتا بوي كورسەتە باستاپتى.
ال ءبىر كۇنى بۇل بولمەدە ەر ادام ءوز جۇبايى مەن كىشكەنتاي قىزىن ولتىرگەن ەكەن. سودان بەرى 873-بولمەدە تۇنەيتىن مەيماندار تۇندە بالالاردىڭ ساۋساقتارىن كورىپ، شىڭعىرعان داۋىستار ەستيتىنىن ايتقان.
ءتىپتى، قازىرگى كۇنگە دەيىن بىردە-ءبىر قوناق ءۇي قىزمەتكەرى اينادان ءبۇلدىرشىننىڭ ساۋساق ىزدەرىن وشىرە الماپتى.
ساراي قوناقتارىنىڭ جالپى وتىنىشتەرى بويىنشا 873-ءنومىرلى بولمە جابىلعان ەكەن. ول ءتىپتى، تىركەۋ جۋرنالىنان دا جوعالىپتى. الايدا كورشى بولمەدە تۇنەيتىن قوناقتار ءالى كۇنگە دەيىن ۇستەلدە كىشكەنتاي قىز جىلاپ وتىراتىنىن ايتاتىن كورىنەدى.
2. مەيىرىمدى شال
«Banff Springs» قوناق ۇيىندە بىرنەشە جىل جۇمىس ىستەگەن سەم ماككوليدىڭ رۋحى ءالى دە قوناق ۇيدەن كەتپەگەن. ويتكەنى، بۇل قىزمەتكەر كوزى تىرىسىندە سارايدى كۇزەتىپ، قىسى-جازى وسى عيماراتتىڭ اينالاسىندا جۇرگەن. ول سول ۋاقىتتىڭ وزىندە ولگەن سوڭ دا سارايدى كۇزەتەتىنىن ايتىپتى. ازامات جۇمىستان شىققان سوڭ ۇيىنە قايتىپ، سوڭعى جالاقىسىن الماي كوز جۇمعان دەسەدى.
بۇگىندە دالىزدە جۇرەتىن اق شاشتى شال كىلتتەرىن جوعالتقان ادامدارعا ەسىك اشىپ، كومەكتەسەتىن كورىنەدى. ءتىپتى، قاراپايىم جۇمىسشى سياقتى ادامداردىڭ جۇكتەرىن كوتەرىپ، قولعابىس ەتەدى ەكەن. الايدا قوناقتار اقشا ۇسىنا باستاعاندا شالدىڭ اۋادا جوعالىپ كەتەتىنىن ايتادى.
3. تۇندە بيلەيتىن قالىڭدىقتىڭ ەلەسى
اڭىزدارعا سۇيەنسەك، 1930-جىلدىڭ باسىندا قوناق ۇيدە ءدۇبىرلى توي ۇيىمداستىرىلعان. الايدا ول ۋاقىتتا باقىتتى كۇننىڭ سوڭى وشپەس قايعىعا اينالاتىنىن ەشكىم سەزبەسە كەرەك. سول كۇنى سالتاناتتى جيىندا باسپالداقتان ءتۇسىپ كەلە جاتقان قالىڭدىقتىڭ كويلەگى وتقا ءتيىپ، تۇرعان جەرىندە ورتەنىپ كەتەدى. سودان بەرى بويجەتكەننىڭ ەلەسى دالىزدەردى كەزىپ بيلەپ، باسپالداقتان ولگەن كۇندەگى ارەكەتىن قايتالاي بەرەتىن كورىنەدى.
4. «قىزىل كيىمدەگى بيكەش»
1944-جىلى قوناق ءۇيدىڭ ماڭىندا جانتۇرشىگەرلىك جول اپاتى بولعان. وقيعا ورنىندا ءتىل تارتپاي كەتكەن ارۋدىڭ رۋحى جىلدام كەلگەن ولىمگە سەنە الماي، ەلەسكە اينالعان ەكەن. سودان بەرى «قىزىل كيىمدەگى بيكەش» ليفتىدە بوي كورسەتىپ، قوناق ءۇي مەيماندارىن قورقىتاتىن كورىنەدى. ول سارايدىڭ ماڭىندا شىڭعىرعان داۋىستار شىعارىپ، جۇرتتىڭ ۇرەيىن الادى ەكەن.
«Banff Springs» جۇمباقتارىنىڭ ءتىزىمىن جالعاستىرا بەرۋگە بولادى. كەيبىر سكەپتيكتەر بۇل اڭگىمەلەردى «جارناما جولدارى» دەپ تۇسىندىرگەنىمەن، تۇنەگەن ادامدار راسىمەن دە ەلەستەردى كەزىكتىرگەنىن ايتقان.