ترامپ پەن پۋتين كەزدەسۋى وتپەي قالۋى مۇمكىن

استانا. قازاقپارات - كەرچتە ۇستالعان بىرنەشە ۋكراين تەڭىزشىسى قامالدى. كەرچ بۇعازىنداعى وقيعاعا بايلانىستى دونالد ترامپ پەن ۆلاديمير پۋتين كەزدەسۋى وتپەي قالۋى مۇمكىن. رەسەيلىك ب ا ق ۋكراينانىڭ شىعىسىندا ا ق ش اسكەري بازاسىنىڭ پايدا بولۋى مۇمكىن ەكەنىن جازىپ جاتىر.

كەرچ بۇعازىنداعى جاعدايعا بايلانىستى ا ق ش پرەزيدەنتى دونالد ترامپ ارگەنتيناداعى G20 سامميتى اياسىندا ۆلاديمير پۋتينمەن جوسپارلاعان كەزدەسۋىنەن باس تارتۋى مۇمكىن. Washington Post-قا بەرگەن سۇحباتىندا ترامپ ازوۆ تەڭىزىندەگى وقيعاعا بايلانىستى كومەكشىلەرىنەن تولىق ەسەپ كۇتىپ وتىرعانىن ايتقان.

«ءبارى دە سول ەسەپكە كوپ بايلانىستى. بولۋى دا، بولماۋى دا مۇمكىن. مىناداي اگرەسسيانى ۇناتپايمىن. مۇلدە جاقپايدى» دەدى ترامپ.

 

ا ق ش پرەزيدەنتى دونالد ترامپ پەن ۆلاديمير پۋتين پاريجدەگى ەكىنشى دۇنيەجۇزىلىك سوعىس قۇرباندارىن ەسكە الۋ راسىمىندە قول الىسىپ تۇر

ا ق ش پرەزيدەنتى ازوۆ تەڭىزىندە ناقتى نە بولعانىن ايقىن تۇسىنگىسى كەلەتىنىن ايتقان.

بۇعان دەيىن ا ق ش پرەزيدەنتىنىڭ ۇلتتىق قاۋىپسىزدىك بويىنشا كومەكشىسى دجون بولتون 29 - قاراشا مەن 1 - جەلتوقسان اراسىندا بۋەنوس- ايرەستەگى G20  سامميتى اياسىندا وتەتىن ترامپ پەن پۋتيننىڭ كەزدەسۋىندە ەكى ەلدىڭ قارىم- قاتىناسى، قارۋلانۋدى باقىلاۋ ماسەلەلەرى تالقىلاناتىنىن ايتقان.

تەڭىزشىلەر سوتى

27 - قاراشادا كەشكە رەسەي سوتى كەرچ بۇعازىنداعى وقيعا كەزىندە ۇستالعان ءۇش ۋكراين تەڭىزشىسىن ەكى ايعا قامادى. بۇلار - رەسەي شەكاراشىلارى زاقىمداعان «يانى كاپۋ» بۋكسيرىنىڭ ەكيپاج مۇشەسى ۆيكتور ۆارەمەزا، «نيكوپول» بروندى شاعىن ارتيللەريالىق كاتەرىنىڭ ماتروسى سەرگەي سىبيزوۆ پەن اعا ماتروسى اندرەي وپرىسكو. قالعان 9 تەڭىزشىگە جازا ءتۇرىن تاعايىنداۋ بويىنشا سوت بۇگىن بولادى.

رەسەي سوتى ۋكراين تەڭىزشىلەرىن رەسەي شەكاراسىن «زاڭسىز كەستى» دەپ ايىپتاپ وتىر. بۇل ايىپ بويىنشا التى جىلعا دەيىن باس بوستاندىعىنان ايىرۋ جازاسى قاراستىرىلعان.

وقيعا كەزىندە بارلىعى رەسەي تارابىنىڭ ايتۋىنشا - 24 تەڭىزشى، ۋكراينانىڭ ايتۋىنشا - 23 تەڭىزشى ۇستالعان. «يانى كاپۋ» بۋكسيرىنىڭ كاپيتانى ولەگ مەلنيچۋكتىڭ ادۆوكاتى ەدەم سەمەدليايەۆ ءوزى قورعاپ وتىرعان ازاماتقا ۇستالعان كەزدە كۇش قولدانعانىن، تاعىلعان ايىپتى مويىنداماعانىن ايتتى.

بۇعان دەيىن ۋكراينا جاعى ۇستالعان بىرنەشە ۋكراين سولداتىنىڭ اۋىر جاعدايدا ەكەنىن حابارلاعان. قىرىمداعى ادام قۇقىعى ۋاكىلى ليۋدميلا لۋبينانىڭ ايتۋىنشا، جارالانعان ازاماتتار ءۇش- ءتورت كۇننەن كەيىن اۋراحانادان شىعۋى مۇمكىن.

25 - قاراشا كۇنى تاڭەرتەڭ كەرچ بۇعازىندا رەسەي اسكەريلەرى ۋكراين كەمەلەرىن اتقىلاپ، ۇستاپ اكەتكەن. بىرنەشە اسكەري جارالانعان. رەسەي ۋكراين كەمەلەرىن تەرريتورياسىنا «زاڭسىز كىردى» دەپ ايىپتاسا، ۋكراينا كەمەلەردىڭ بۇل اۋماقتان وتەتىنى «الدىن- الا ەسكەرتىلگەنىن» ايتىپ، رەسەي ارەكەتىن «باسسىزدىق» دەپ اتاعان.

رەسەي مەن ۋكراينا اتالعان وقيعاعا بايلانىستى ءوز ەلدەرىندە قىلمىستىق ءىس قوزعاعان.

ۋكراينادا جانجالعا بايلانىستى 28 - قاراشادان باستاپ ەلدىڭ ءبىرقاتار ايماعىندا 30 كۇنگە اسكەري جاعداي جاريالاندى.

باتىس ەلدەرىنىڭ باسشىلارى رەسەيدى ايىپتاپ، ۋكراينالىق تەڭىزشىلەر مەن كەمەلەردى بوساتۋعا شاقىردى. ەۋروپا كەڭەسىنىڭ ءتوراعاسى دونالد تۋسك رەسەيدىڭ كۇش قولدانعانىن ايىپتاپ، ەۋروپا وداعىنىڭ ۋكراينانى قولدايتىنىن مالىمدەدى.

​ۋكراينادا ا ق ش اسكەري بازاسى سالىنا ما؟

رەسەيلىك «يزۆەستيا» گازەتى ۋكراينا جوعارى راداسىنىڭ دەپۋتاتى يۆان ۆيننيككە سىلتەمە جاساي وتىرىپ، ۋكراينانىڭ شىعىسىندا امەريكا بازاسىن ورناتۋ تۋرالى ماسەلە بويىنشا ۆاشينگتون مەن كيەۆ اراسىندا كەلىسسوز ءجۇرىپ جاتقانىن جازعان.

«امەريكالىقتارمەن [بۇل ماسەلە بويىنشا] ديالوگ ءجۇرىپ جاتىر. ەگەر زاڭدىق تۇرعىدا ايتساق، بالكىم ۋكراينانىڭ ناتو- مەن تىعىز ينتەگراتسياسى دەگەن ءجون بولار. بازا ءسوز جوق، كەرەك. سەبەبى ءبىز رەسەي ساياساتىمەن بايلانىستى ۇزاق مەرزىمگە قاۋىپسىزدىگىمىزدى قامتاماسىز ەتە المايمىز» دەدى دەپۋتات.

ۆيننيكتىڭ ايتۋىنشا، بولاشاق بازانىڭ ورنى «اسكەري سيپاتتاعى قاۋىپ- قاتەرلەردى ەسكەرە وتىرىپ» انىقتالۋى ءتيىس. ول ەلدىڭ شىعىس شەكاراسىندا نەمەسە قىرىمعا جاقىن جەردە ورنالاسۋى مۇمكىن.

كەرچتەگى وقيعا ۋكراينا مەن رەسەي ازاماتتارىنىڭ ءوزارا بارىس- كەلىسىنە دە اسەر ەتكەن. ازاتتىقتىڭ قىرىم قىزمەتىنىڭ حابارلاۋىنشا، كەشەدەن بەرى ۋكراينا شەكاراشىلارى كيەۆ اۋەجايىندا ءتۇرلى سەبەپتەرمەن رەسەيدىڭ 80 ازاماتىن ەلگە كىرگىزبەگەن.

www.azattyq.org