قازاقستاندا التى جىل ىزدەۋدە جۇرگەن ازامات مىسىردان تابىلدى
الماتى وبلىسىنىڭ تۇرعىنى 2012-جىلى كىسى ءولىمى بويىنشا سوت وتىرىسىندا وتىرىك ايتىپ، 3 ادامدى اقتاپ قالۋعا تىرىسقانى ءۇشىن ايىپتالۋدا، دەپ حابارلايدى قازاقپارات ءتىلشىسى.
شەت ەل اسىپ، قاشىپ جۇرگەن اۋىل تۇرعىنىن پوليتسيا قىزمەتكەرلەرى حالىقارالىق ىزدەۋگە جاريالاعان بولاتىن. قازىرگى تاڭدا كۇدىكتى قازاقستانعا جەتكىزىلدى.
«2012-جىلدىڭ جازىندا رايىمبەك اۋدانىندا كىسى ءولىمى بويىنشا ءۇش ادام كۇدىكتى دەپ تانىلىپ، تەرگەۋگە الىنادى. العاشقى سوت وتىرىسىندا قاشقىن جالعان اقپارات بەرىپ، كۇدىكتىلەردىڭ قىلمىسقا قاتىسى جوق ەكەنىن ايتقان. الايدا 3 ازاماتتىڭ قىلمىسى دالەلدەنىپ، ۇزاق مەرزىمگە باس بوستاندىعىنان ايىرىلدى»، - دەپ مالىمدەدى الماتى وبلىستىق پوليتسيا دەپارتامەنتى باسپا ءسوز قىزمەتى.
اتالعان ۆەدومستۆونىڭ اقپاراتىنا سايكەس، تەرگەۋشىلەردى اداستىرىپ، جالعان ايعاقتار ۇسىنعان ازاماتقا ق ر ق ك 420-بابى بويىنشا ايىپ تاعىلىپ وتىر. كۇدىكتى قاماۋعا الىنعان.