قورقىت اتا مۇراسى يۋنەسكونىڭ ماتەريالدىق ەمەس مۇرالارى تىزىمىنە ەندى
ولاردىڭ ىشىنە «قورقىت اتا» مۇرالارى دا ەندى، دەپ حابارلايدى قازاقپارات ۇيىمنىڭ رەسمي سايتىنا سىلتەمەمەن.
«ەگەمەن قازاقستان» گازەتىنىڭ رەسمي سايتى بۇل جۇمىس بىلتىر ناۋرىز ايىندا قازاقستاننىڭ باستاماشىلىعىمەن جانە باۋىرلاس تۇركيا، ازەربايجان مەملەكەتتەرىنىڭ قولداۋىمەن ۇيىمنىڭ قاراۋىنا الىنعانىن حابارلايدى. قۇجات يۋنەسكونىڭ ماتەريالدىق ەمەس مادەني مۇرالارى تىزىمىنە «قورقىت اتا مۇراسى: داستان، اڭىز جانە مۋزىكا» دەگەن اتاۋمەن ەنگىزىلدى.
قورقىت (9- ع.) - قوبىز اتاسى، كومپوزيتور، جىرشى، اقىن، مۋزىكانت، باقسىلاردىڭ قامقورشىسى. قورقىت اتا تۇرىك ءداستۇرىن، سالتىن، ادەتىن، سەنىمدەرىن، باسقا حالىقتاردان ايىرماشىلىعىن، قىسقاسى، قوعامدىق مىنەزدەمەسىن ەرتەگىلەرىندە ايتقان، ونى بۇگىنگە دەيىن جەتكىزگەن ۇلى ونەرپاز.
قورقىت اتانىڭ ءبىزدىڭ زامانىمىزعا دەيىن جەتكەن 12 حيكاياسى بار. ولاردىڭ سەگىزى ىشكى جانە سىرتقى سوعىستار تۋرالى. ەكەۋى عاشىق وقيعالارى جايىندا بولسا، ەكەۋى ميفولوگيالىق سيپاتتا. كونەدەن جەتكەن «قورقىت»، «جەلمايا»، «تارعىل تانا»، «ەلىماي»، «ۇشاردىڭ ۇلۋى» سىندى كۇيلەرى دە ساقتالعان. قازاقتا «كۇي اتاسى - قورقىت» دەگەن ءسوز وسىدان قالسا كەرەك.
التايدان تاراعان تۇگەل تۇركىنىڭ كيەسى، قوبىزدىڭ يەسى، ورتاق ميف پەن فولكلوردىڭ اتاسى سانالاتىن قورقىت اتا مۇراسى ادامزات تاريحىندا ايرىقشا ءىز قالدىرعان قۇبىلىس رەتىندە سانالادى.