قازاقستاندىق بالۋاندار پولشادا وتكەن جارىستا ءتورت التىن مەدالعا يە بولدى

ورال. قازاقپارات - قازاقستاندىق دزيۋدوشىلار پولشانىڭ ولەسنيسا قالاسىندا جاستار اراسىندا وتكەن حالىقارالىق تۋرنيردە تابىستى ونەر كورسەتتى، دەپ حابارلايدى قازاقپارات ءتىلشىسى.

ق ر ۇلتتىق وليمپيادا كوميتەتى ءمالىم ەتكەنىندەي، اتالعان جارىسقا الەمنىڭ 21 ەلىنەن 347 تاتامي شەبەرى قاتىسىپ، باق سىنادى.

قازاقستان جاستار قۇراماسى ساپىندا 15 دزيۋدوشى بولسا، سونىڭ جەتەۋى جۇلدەمەن ورالدى. ارسەن حاتيپ پەن نۇربەك مىقتىبەكوۆ باپتايتىن قازاقستاندىقتار مەدال سانى جونىنەن كوماندالىق ەسەپتە ءبىرىنشى ورىنعا يە بولدى.

اسىرەسە، ەرلان وڭالوۆ (55 ك گ)، بولات ءبىلال (60 ك گ)، نۇرزات سالىمبايەۆ (66 ك گ)، سەرىكبولسىن شىنتاس (90 ك گ) التىننان القا تاعىپ، ەل مارتەبەسىن بيىكتەتتى.

سونداي-اق  ۇلىقبەك ءابىلحايىر (55 ك گ) كۇمىس، ءسۇيىنىش الماز ۇلى (55 ك گ) مەن ايبار مۇقىشەۆ (73 ك گ) قولا جۇلدەگە يە بولدى.

ەسكە سالا كەتەيىك، باتىس قازاقستاندىق ەرلان وڭالوۆ - بۇعان دەيىن دە حالىقارالىق جارىستاردا ولجا سالىپ جۇرگەن سپورتشى.

ونىڭ وتكەن جىلى ەۋروپا كۋبوگىنىڭ قولا جۇلدەگەرى اتانعانىن جازعان بولاتىنبىز.