بەيجىڭدەگى قازاقستاندىق بالالاردى دامىتۋ ورتالىعىندا تۇڭعىش پرەزيدەنت كۇنى اتاپ ءوتىلدى

 بەيجىڭ. قازاقپارات - بۇگىن بەيجىڭ قالاسىنداعى «بالدىرعان» بالالاردى دامىتۋ ورتالىعىندا قازاقستان رەسپۋبليكاسىنىڭ تۇڭعىش پرەزيدەنتى كۇنىنە وراي ارنايى شارا بولىپ ءوتتى، دەپ حابارلايدى «قازاقپارات» ح ا ا- نىڭ قىتايداعى ءتىلشىسى.

بالالار ق ر ءانۇرانىن ورىنداپ، قازاقستاننىڭ قىتاي حالىق رەسپۋبليكاسىنداعى ەلشىسىنىڭ زايىبى ءاليا نۇرىشيەۆا جانە بالالاردى دامىتۋ ورتالىعىنىڭ جەتەكشىسى، پسيحولوگ- پەداگوگ نازگۇل نازاربەكوۆانىڭ قۇتتىقتاۋ سوزدەرىنەن كەيىن قوناقتارعا مەرەكەلىك كونتسەرت ۇسىنىلدى. بالالار وتان تۋرالى تاقپاقتارىن ايتىپ، قازاق ۇلتتىق بيلەرىن بيلەدى، «اتامەكەن» ءانىن شىرقادى.

بەيجىڭدە جۇرگەن ۇلتتىق اكادەميالىق كىتاپحانانىڭ دەلەگاتسياسى «بالدىرعانعا» سىيلىق رەتىندە قازاقستاندىق اۆتورلاردىڭ 12 كىتابىن تارتۋ ەتتى. قوناقتار بالالار ورتالىعىنىڭ «قازاقستان بالالار كوزىمەن» اتتى سۋرەت كورمەسىمەن تانىستى.

 قازىرگى كەزدە «بالدىرعاندا» 20 تاربيەلەنۋشى بار، سونىڭ ىشىندە تەك قازاقستاندىقتار عانا ەمەس، قىرعىزستان، ءۇندىستان جانە پاكىستان ەلدەرىنىڭ دە بالالارى بار.

 ەسكە سالا كەتەيىك، 2018 -جىلدىڭ 23 - ساۋىرىندە بەيجىڭدە قازاقستان رەسپۋبليكاسىنىڭ قىتاي حالىق رەسپۋبليكاسىنداعى ەلشىلىگىنىڭ قولداۋىمەن اشىلعان «بالدىرعان» ورتالىعى شەتەلدە قازاق ءتىلىن وقىتاتىن العاشقى بالالاردى دامىتۋ ورتالىعى بولدى. ونىڭ اشىلۋ سالتاناتىنا ق ر سىرتقى ىستەر ءمينيسترى قايرات ءابدىراحمانوۆ قاتىستى.