تاريفتەر بويىنشا تۇتىنۋشىلاردىڭ مۇددەلەرىن قورعايتىن ينستيتۋت قۇرىلادى

 استانا. قازاقپارات - تاريفتىك سمەتالار مەن ينۆەستيتسيالىق باعدارلامالاردىڭ ورىندالۋىن باقىلاۋ ءۇشىن ەكى جاڭا ينستيتۋت ەنگىزىلەدى.

بۇل تۋرالى پارلامەنت ءماجىلىسىنىڭ جالپى وتىرىسىندا «تابيعي مونوپوليالار تۋرالى» زاڭ جوباسىن تالقىلاۋ كەزىندە ق ر ۇلتتىق ەكونوميكا ءمينيسترى ءتيمىر سۇلەيمەنوۆ ءمالىم ەتتى، دەپ حابارلايدى قازاقپارات.

«تابيعي مونوپوليالار سۋبەكتىلەرى قىزمەتىنىڭ اشىقتىعىن ارتتىرۋ جانە تاريفتىك سمەتالار مەن ينۆەستيتسيالىق باعدارلامالاردىڭ ورىندالۋىن باقىلاۋدى كۇشەيتۋ ماقساتىندا زاڭ جوباسىمەن ءتيىستى قادامدار كوزدەلەدى. بىرىنشىدەن، 2 جاڭا ينستيتۋتتى ەنگىزۋ ەسكەرىلگەن.

وسى ورايدا تاريفتىك ساياسات جونىندەگى كەڭەس جاساقتالادى. بۇل تابيعي مونوپوليالار سالالارىندا مەملەكەتتىك رەتتەۋ ساياساتىنىڭ نەگىزگى باعىتتارىن ازىرلەۋ جونىندەگى ۇسىنىستاردى تالقىلايتىن جانە دايىندايتىن كونسۋلتاتيۆتىك كەڭەس ورگانى. تاريفتىك ساياسات جونىندەگى كەڭەس مونوپوليستەردىڭ ينۆەستيتسيالىق باعدارلامالارى جوبالارىن قاراستىرادى، سونداي- اق تابيعي مونوپوليالار سۋبەكتىلەرىنىڭ تاريفتىك سمەتالاردى، ينۆەستيتسيالىق باعدارلامالاردى ورىنداۋ تۋرالى ەسەپتەرىن تىڭدايدى» ، - دەدى ق ر ۇلتتىق ەكونوميكا ءمينيسترى تيمۋر سۇلەيمەنوۆ

ونىڭ قۇرامىنا پارلامەنت دەپۋتاتتارى، «اتامەكەن» پالاتاسىنىڭ، قوعامدىق بىرلەستىكتەردىڭ وكىلدەرى، تاۋەلسىز ساراپشىلار جانە باسقالار كىرەتىن بولادى.

ال ەكىنشى ينستيتۋت تابيعي مونوپوليالار سۋبەكتىلەرىنىڭ قىزمەتتەرىن تۇتىنۋشىلاردىڭ قوعامدىق بىرلەستىكتەرىنە قاتىستى.

 «بۇل مونوپوليستەردىڭ قىزمەتتەرىن تۇتىنۋشىلاردىڭ ءوز قۇقىقتارى مەن زاڭدى مۇددەلەرىن قورعاۋ ماقساتىندا قۇرىلاتىن كوممەرتسيالىق ەمەس ۇيىم. تۇتىنۋشىلاردىڭ قوعامدىق بىرلەستىكتەرى تاريفتىك سمەتالاردىڭ جانە ينۆەستيتسيالىق باعدارلامالاردىڭ ورىندالۋى تۋرالى ەسەپتەردى قاراۋعا قاتىسادى. قىزمەت تيىمدىلىگىنىڭ كورسەتكىشتەرىنە قول جەتكىزۋ جانە تابيعي مونوپوليالار سۋبەكتىلەرى قىزمەتتەرىنىڭ ساپا مەن سەنىمدىلىك كورسەتكىشتەرىن ساقتاۋ تۋرالى ەسەپتەردى قارايدى. سونىمەن قاتار، ۋاكىلەتتى، مەملەكەتتىك ورگاندارمەن، تابيعي مونوپوليا سۋبەكتىلەرىمەن، سوتتارمەن جانە باسقا ادامدارمەن قارىم- قاتىناستا تۇتىنۋشىلاردىڭ مۇددەلەرىن بىلدىرەدى. مۇنىمەن قوسا، تابيعي مونوپوليا سۋبەكتىلەرى قىزمەتتەرى تۇتىنۋشىلارى اتىنان تۇتىنۋشىلاردىڭ قۇقىقتارىن قورعاۋ تۋرالى سوتقا تالاپ- ارىز بەرەدى» ، - دەپ ناقتىلادى مينيستر.

وسى ينستيتۋتتاردىڭ جۇمىسى تۇتىنۋشىلاردىڭ قاراجاتتارىن پايدالانۋ جانە ۇسىنىلاتىن قىزمەتتەردىڭ ساپاسى ماسەلەلەرىندەگى مونوپوليستەردىڭ قىزمەتىنە باقىلاۋدى كۇشەيتۋگە مۇمكىندىك بەرەدى.

 بۇدان بۇرىن حابارلانعانداي، بۇگىن پارلامەنت ءماجىلىسىنىڭ جالپى وتىرىسىندا «تابيعي مونوپوليالار تۋرالى» زاڭ جوباسى ماقۇلداندى.

  ەستەرىڭىزگە سالا كەتەيىك، جاقىندا اقوردادا قاۋىپسىزدىك كەڭەسىنىڭ وتىرىسىندا مەملەكەت باسشىسى نۇرسۇلتان نازاربايەۆ كوممۋنالدىق قىزمەتتەرگە تاريفتەردى زاڭسىز وسىرگەن تابيعي مونوپوليالار سۋبەكتىلەرىن جازالاۋدى تالاپ ەتتى.

سونىمەن قاتار پرەزيدەنت قازاقستاندا ەلەكتر ەنەرگياسى قۇنىن تومەندەتۋدى تاپسىردى.