پرەزيدەنت «ۇلى دالانىڭ جەتى قىرى» اتتى ماقالانى نە ءۇشىن جازعانىن ايتتى
«كەڭەس زامانىندا تاريحتىڭ بارلىعى 1917 -جىلعى قازان رەۆوليۋتسياسىنان باستالادى دەپ ويلايتىنبىز. ارى قاراي تاريحتى ەشكىم بىلمەيتىن. قازاقسىڭ با، قازاقسىڭ. قايدان شىقتىڭ، ءتۇبىڭ كىم دەگەن سوزدەرگە ءبىزدىڭ بالالار جاۋاپ بەرە المايتىن. ال ءبىزدىڭ تامىرىمىز باسقا حالىقتارداي تەرەڭدە جاتىر. بۇگىنگى يتاليالىقتار ريمدىكتەر ەمەس. ءبىراق، ولار سول تاريحتارىن ماقتان تۇتادى. بۇگىنگى مىسىردا ارابتار تۇرعانىمەن ولار فاروندار زامانىن بىلەدى. بارلىق حالىقتىڭ تاريحى تەرەڭدە جاتىر. رەسەيدىڭ دە، ۇلى بريتانيانىڭ دا ۇلكەن تاريحى بار سياقتى تەك قازاقتاردىڭ عانا ەمەس قازاقستان حالقىنىڭ ۇلكەن تاريحى بار»، - دەپ اتاپ ءوتتى ەلباسى.
ق ر پرەزيدەنتىنىڭ اتاپ وتۋىنشە، ۇلى دالادا كوپتەگەن حالىقتار تىرشىلىك ەتتى. ولار وزدەرىنىڭ مادەنيەتىن، تانىم-تۇسىنىگىن، ءبىلىمىن، ءتىلى مەن ءدىلىن بىزگە مۇرا ەتىپ قالدىردى.
«سوندىقتان قازاق حالقى تولەرانتتى، بارىنە بىردەي قارايدى. بۇل ۇلكەن باقىت. ءبىز تاريحتى قازاقتار وسىنداي ەرەكشەمىز دەپ ايتۋ ءۇشىن ەسكە الىپ وتىرعانىمىز جوق. قۇداي ساقتاسىن. ءبىز ءتۇپ-تامىرىمىزدىڭ قايدان شىققانىن ءبىلۋ ءۇشىن ەسكە الامىز. سوندىقتان «ۇلى دالانىڭ جەتى قىرى» اتتى ماقالا جاستارعا ساقتاردان، عۇنداردان، تۇركى قاعاناتتان باستالاتىن ۇلى دالانىڭ تامىرى تەرەڭدە ەكەندىگىن ايتۋعا دەگەن نيەتتەن تۋىندادى. ءبىز سول ۇلكەن تاريحتىڭ تاسىمالداۋشىسىمىز»، - دەدى مەملەكەت باسشىسى.