نۇرسۇلتان نازاربايەۆ مەملەكەت قۇرىلىمىندا كەزدەسكەن ەڭ كۇردەلى ماسەلەنى اتادى

استانا. قازاقپارات - مەملەكەتتىڭ قۇرىلىمىندا مەن ءۇشىن ەڭ كۇردەلى ماسەلە - ادامداردىڭ پسيحولوگياسىن وزگەرتۋ بولدى.

استانادا ءوتىپ جاتقان VIII ازاماتتىق فورۋمدا مەملەكەت باسشىسى نۇرسۇلتان نازاربايەۆ وسىلاي ايتتى، دەپ حابارلايدى قازاقپارات ءتىلشىسى.

«بۇگىنگى كەزدەسۋ ازاماتتىق قوعامنىڭ قالاي ەڭسەسىن تىكتەپ قالعانىن كورسەتىپ بەردى. ازاماتتىق قوعام مەملەكەتپەن بىرگە جۇمىس ىستەۋگە بەلسەندىلىك تانىتىپ وتىر. وسى جىلداردىڭ ىشىندە ۇكىمەتتىك ەمەس ۇيىمدار ينستيتۋتسيونالدىق تۇرعىدا قالىپتاسىپ قالدى. وسىعان دەيىنگى پىكىرتالاستار ەسىڭىزدە بولار. ۇكىمەتتىك ۇيىمدار ۇكىمەتتىك ەمەس ۇيىمداردى قابىلداماي، ءبىزدىڭ ىسكە ارالاسىپ جاتىر دەپ تە دابىل قاققان كەزدەر بولدى. مۇنىڭ ءبارى دە كەڭەس وداعىنان قالىپ قويعان تۇسىنىك»، - دەيدى ەلباسى.

نۇرسۇلتان نازاربايەۆ ءوزىنىڭ بۋىنى - بالا بالاباقشادان كەيىن مەكتەپكە بارۋ كەرەك، ودان سوڭ پيونەر، كومسومول بولىپ، اقىرى مەملەكەتتىڭ كومەگىمەن جۇمىسقا تۇرىپ، ءتىپتى جەرلەۋدىڭ ءوزى مەملەكەتتىڭ ەسەبىنەن بولاتىن جۇيەدە ءومىر سۇرگەنىن ەسكە الدى.

«مىنە، وسىعان ۇيرەنىپ قالعانبىز. سوندىقتان، مەملەكەتتىڭ قۇرىلىمىندا مەن ءۇشىن ەڭ كۇردەلى ماسەلە - ادامداردىڭ پسيحولوگياسىن وزگەرتۋ بولدى. ياعني، ءار ادام پاتروناتتىقتان گورى، ءوزىم ءۇشىن ەڭبەك ەتۋ دەگەن تۇسىنىكتى ءسىڭىرۋ قاجەت ەدى»، - دەيدى نۇرسۇلتان نازاربايەۆ.

مەملەكەت باسشىسى ءوز سوزىندە بۇگىنگى تاڭدا جۇمىس ىستەۋ ءۇشىن بارلىق جاعداي جاسالعانىن تاعى دا ەسكە سالدى.

اۆتور: ايان بەكەن ۇلى