مەملەكەت باسشىسى ەلىمىزدەگى تۇرمەلەر تۋرالى ايتتى

استانا. قازاقپارات - مەملەكەت باسشىسى نۇرسۇلتان نازاربايەۆ ەلىمىزدەگى تۇرمەلەر سانىنىڭ ازايۋ سەبەبىن اتادى، دەپ حابارلايدى قازاقپارات ءتىلشىسى.

«ساۋلە مەكتەپبايەۆا دا (فورۋمدا ءسوز سويلەگەن سپيكەر) مەنى الاڭداتاتىن تۇرمەدەگى ادامداردىڭ سانىن ازايتۋ ماسەلەسىن كوتەردى. بۇل رەتتە مەملەكەتتىڭ جۇمىسىن ەرەكشە اتاپ ءوتۋ كەرەك. ياعني، مەملەكەت ءاربىر قىلمىس ءۇشىن جازانى تۇرمەدە وتىرعىزۋ تۇرعىسىندا زاڭدى وزگەرتتى. ءبىز بىلەتىندەي، تۇرمەدەن ادامنىڭ قانداي بولىپ شىعاتىنى بەلگىلى... ءبىز ول جەردە ادامدى تاربيەلەۋدىڭ ورنىنا، باسقا باعىتقا يتەرمەلەيمىز. مىنە، سوندىقتان بيزنەستەگى زاڭ بۇزۋشىلىقتار مەن شاعىن قىلمىستار ءۇشىن اقشامەن جازالاۋ كەرەك. ءبىز زاڭنامانى وسىلاي وزگەرتۋدىڭ ارقاسىندا تۇرمەدەگىلەردىڭ سانى ازايدى. جۇمىستاردى جالعاستىرۋ كەرەك. وسىنىڭ ارقاسىندا قانشاما تۇرمەلەر، قالعان تۇرمەلەردى وسىنىڭ ارقاسىندا جوندەۋدەن وتكىزۋگە دە مۇمكىندىك تۋدى»، - دەدى ەلباسى استانادا ءوتىپ جاتقان ازاماتتىق فورۋم بارىسىندا.

مەملەكەت باسشىسى ءوز سوزىندە ەكسترەميستەر مەن تەرروريستەردى ءسۇرىنىپ كەتكەن جاستارمەن وتىرعىزۋ دۇرىس ەمەس ەكەنىن اتاپ ءوتتى.

ەسكە سالا كەتسەك، بۇگىن ەلورداداعى تاۋەلسىزدىك سارايىندا ەلباسى نۇرسۇلتان نازاربايەۆتىڭ قاتىسۋىمەن VIII ازاماتتىق فورۋمى ءوتىپ جاتىر. ەكى كۇندىك شاراعا ۇكىمەتتىك ەمەس ۇيىمداردىڭ، مەملەكەتتىك جانە حالىقارالىق ۇيىمداردىڭ، بيزنەس قاۋىمداستىقتىڭ 850 دەن استام وكىلى، سونداي-اق قوعام قايراتكەرلەرى قاتىسۋدا.