ەلباسى: قازاقستاندا بالالار ءۇيى بولماۋى ءتيىس
بۇل تۋرالى ول استانادا ءوتىپ جاتقان VIII ازاماتتىق فورۋمدا ايتتى، دەپ حابارلايدى قازاقپارات ءتىلشىسى.
«ءبىز جاقىندا تاۋەلسىزدىگىمىزدىڭ 27 جىلدىق مەرەكەسىن وتكىزگەلى وتىرمىز. تاريح ءۇشىن بۇل تۇك ەمەس. وسىناۋ قاس-قاعىم ۋاقىتتىڭ ىشىندە قىرۋار قيىنشىلىقتان ءوتىپ، تاۋەلسىزدىگىمىزدى، ەلىمىزدى ساقتاپ قالدىق. سونىڭ بارلىعى حالىقتىڭ بىرلىگىنىڭ ارقاسى. قوعامنىڭ ءار سالاسىندا جۇرگەن ازاماتتار تاۋەلسىزدىكتى قۇرمەتتەپ، ونى ساقتاپ قالۋ ءۇشىن بىرىگە جۇمىس ىستەگەنىنىڭ ارقاسىندا ءبىز دۇنيەجۇزىنە بەلگىلى ەل بولدىق. ءبىزدى ەشكىم تانىمايتىن قازاق ەدىك. دۇنيەجۇزىنىڭ كراتاسىندا جوق قازاقستان ەدىك. قازىر ءبىراز دارەجەگە جەتتىك. ءبىراق، اتقارىلار جۇمىستار كوپ. وسى فورۋمعا شىن جۇرەگىممەن تابىس تىلەيمىن»، - دەدى مەملەكەت باسشىسى
نۇرسۇلتان نازاربايەۆ مەملەكەت پەن قوعام اراسىندا ديالوگ ورناتۋدىڭ قاجەتتىگىن ءار جولداۋىندا ايتىپ كەلە جاتقانىن اتاپ ءوتتى.
«ءبىزدىڭ باستى ماقساتىمىز - ازاماتتارىمىز سانالى بولىپ، مارتەبەسى جوعارى، دامىعان قوعام قۇرۋ. ەلىمىزدىڭ بىرلىگى مەن تۇراقتىلىعى ءۇشىن جۇمىلا ەڭبەك ەتسەك، بارلىق مىندەتتەردى جۇزەگە اسىرامىز. وركەندەگەن، گۇلدەنگەن وتىز ەلدىڭ قاتارىنا ەنۋ - بارىمىزگە بىردەي ماقسات. ول - ۇلكەن ماقسات. سول ەلدەر سەكىلدى ءومىر بولادى دەگەن ءسوز، سول ەلدەردەگى سياقتى ساۋاتتى بولامىز دەگەن ءسوز. بۇل فورۋم ۇكىمەتتىك ەمەس سەكتورعا سەرپىن بەرىپ، ازاماتتىق قوعامنىڭ ارى قاراي دامۋىنا ۇلكەن جول سىلتەيدى دەپ سەنەمىن. بۇگىنگى باس قوسۋدا ناقتى ۇسىنىستار ايتىلىپ جاتىر. كوتەرىلگەن پروبلەمالاردىڭ ءبارى مۇقيات ساراپتالىپ، ۇكىمەتپەن بىرگە ۇەۇ وكىلدەرىمەن بىرگە ءتيىستى باعدارلاما قابىلداۋ قاجەت»، - دەدى ەلباسى.
پرەزيدەنت بۇگىنگى فورۋمدا سويلەگەن ازاماتتاردى تىلگە تيەك ەتە كەلە، BI Group كومپانياسىنىڭ باسشىسى ايدىن راقىمبايەۆ تۋرالى ايتتى.
«كوپتەگەن بيزنەسمەندەر كومەك كورسەتىپ، قايىرىمدىلىقپەن اينالىسىپ كەلەدى. انالار ءۇيى، جەتىمدەر - بۇل ماسەلە مەنى قاتتى الاڭداتادى. قازاقستاندا بالالار ءۇيى بولماۋى ءتيىس دەپ ەسەپتەيمىن. ال ول (ايدىن راقىمبايەۆ - اۆت) قانداي باعىتتا قوزعالۋ كەرەكتىگىن كورسەتىپ وتىر. ءبىزدىڭ بالالارىمىز مۇحيتتىڭ ار جاعىنداعى تانىمايتىن ەلگە بارىپ وسسە دە، ەرتەڭ ول ەلىن، جەرىن ساعىنادى. ءبىراق، ولار بوتەن ادامدار بولىپ كەلەدى. قولىمىز وعان تيگەن جوق. قاراجاتىمىز بولعان جوق. مەملەكەت قيىن-قىستاۋ كەزەڭدە جۇرگەن كەزدە ول ماسەلەنى ءبىز جىبەرىپ الدىق. ءبىراق، ءوزىمىزدىڭ مۇسىلمان دىنىندە دە، قازاقشىلىقتا دا «جەتىمگە قول سوزساڭ، جۇماقتان شىعاسىڭ» دەگەن بار عوي. سوندىقتان، ءوزىنىڭ ەكى-ءۇش بالاسى بار ادام تاعى ءبىر بالانى سول بالالار ۇيىنەن الاتىن بولسا، تەك جاقسىلىققا كەنەلەدى دەپ سانايمىن. سوندىقتان، BI Group - تىڭ جاساپ جاتقان جۇمىستارىن وركەندەتۋىمىز كەرەك»، - دەدى ەلباسى.
سونداي-اق مەملەكەت باسشىسى ءبىلىم جانە عىلىم ءمينيسترى ەرلان ساعاديەۆتى مىنبەرگە شاقىرىپ، اتالمىش ماسەلەگە قاتىستى سۇراق قويدى. ءوز كەزەگىندە مينيستر بالالار ءۇيىنىڭ سانى سوڭعى ءۇش جىلدا 24 كە ازايىپ، 122 ءسى قالعانىن اتاپ ءوتتى.
«جەتىم بالالاردىڭ سانى جىل سايىن 1000-1500 بالاعا ازايىپ كەلەدى. قازىر ولاردا كوپ جاعدايدا ۇلكەن بالالار قالعانىن ايتا كەتۋ كەرەك. پاتروناتتىق وتباسى جۇيەسىن ىسكە قوستىق. اقشاسىن مەملەكەت تولەيدى. پروتسەسس جىلدام بولا ءتۇسىپ، ەكى جىلدان كەيىن، ءبىزدىڭ ويىمىزشا، جەتىم بالالاردىڭ سانى 3-3,5 مىڭ عانا قالۋى ءتيىس. سوڭعى ءۇش جىلدا بىردە-ءبىر بالا شەتەلگە اكەتىلگەن جوق»، - دەدى ەرلان ساعاديەۆ.
وسى رەتتە نۇرسۇلتان نازاربايەۆ بيزنەسمەندەرگە وسىعان دەيىن ۇلكەن قولداۋ كورسەتىلگەنىن، سول سەبەپتى داۋلەتتى ازاماتتار ءوز حالقىنا كومەك كورسەتۋى تيىستىگىن ءمالىم ەتتى.
«ەگەر جارلىلاردىڭ كوڭىلى توق بولماسا، بايلار ارى قاراي بايىمايدى» دەيدى. سوندىقتان، مينيسترلىك (قوعامدىق دامۋ مينيسترلىگى) پەن پرەزيدەنت اكىمشىلىگى وسى باعىتتا جۇمىس جۇرگىزىپ، ۇكىمەتكە ءبارىن جيناۋى كەرەك دەگەن ويدامىن. ياعني، اقشاسى بار ىسكەر ازاماتتار ادامدارعا كومەك قولىن سوزاتىن ۇكىمەتتىك ەمەس ۇيىمدارعا كومەك كورسەتەتىندەي تەتىكتەردى قاراستىرۋ كەرەك»، - دەدى پرەزيدەنت.