قازاقستاندا قۇرىلىسى بىتپەگەن ۇيدەن پاتەردى قالاي الۋعا بولادى؟
بۇل تۋرالى قازاقپارات Ranking.kz-كە سىلتەمە جاساپ حابارلايدى.
پورتالدا جاريالانعان ماقالادا جاس وتباسىلارعا از ۋاقىتتا، از قارجىمەن باسپانالى بولۋ جولدارى كورسەتىلگەن. ماتەريالدا كەلتىرىلگەن مالىمەتكە سايكەس، وسى ايدا قازاقستاندا پاتەردىڭ 1 شارشى مەترىنىڭ ورتاشا قۇنى 265,3 مىڭ تەڭگە بولدى.
35 شارشى مەترلىك پاتەر قۇنى 9,5 ميلليون تەڭگەگە جەتتى. قازاقستاندىقتار پاتەردى بۇل باعادان دا ارزان الا الادى. ونىڭ ءبىر جولى - ۇلەسكەر بولۋ.
«ۇلەسكەر بولۋ - ءتيىمدى باعادا ءۇي الۋدىڭ بىردەن ءبىر جولى. ۇلەسكەرلەردىڭ قارجىسى تۇرعىن ءۇي كەپىلدىك بەرۋ قورى ارقىلى ساقتالاتىن بولادى»، - دەدى ساراپشىلار.
ت ۇ ك ق - قۇرىلىس كومپانياسى، ۇلەسكەر، نەسيە بەرەتىن بانكتىڭ مۇددەسىن قورعايتىن وپەراتور بولىپ وتىر.
ايتا كەتۋ كەرەك، قۇرىلىسى بىتپەگەن ۇيدە پاتەر قۇنى دايىن ۇيمەن سالىستىرعاندا 20 پايىزعا ارزان. دالىرەك ايتقاندا، 1 شارشى مەتر قۇنى 212,3 مىڭ تەڭگە بولادى، 1 بولمەلى پاتەردى 7,5 ميلليون تەڭگەگە الۋعا بولادى.
سونىمەن قاتار، تۇرعىن ءۇي كەپىلدىك بەرۋ قورى ارقىلى قولىندا سومانىڭ 30 پايىزى بار ادامدار پايدالانۋعا بەرىلگەن ۇيلەرگە قاراعاندا الدەقايدا ارزان بولاتىن ءتيىمدى يپوتەكالىق نەسيە الا الادى. بۇل ورايدا، شامامەن العاشقى سالىم كولەمى 2,3 ميلليون تەڭگە بولادى.
سونداي-اق، ت ۇ ك ق - «بايتەرەك» ۇلتتىق باسقارۋ حولدينگى - تۇرعىن ءۇي قۇرىلىس جيناق بانكى سحەماسى ارقىلى دا ارزان پاتەر الۋدىڭ ءتيىمدى جولدارى بار.
ول ءۇشىن كليەنت «تۇرعىن ءۇي قۇرىلىس جيناق» بانكىنىڭ سالىمشىسى بولۋى شارت.
بۇل جاعدايدا مەملەكەتتىك باعدارلامالارعا قاتىسا المايتىن سالىمشىلارعا ەشقانداي تالاپ قويىلمايدى. ادامنىڭ باسىندا ءۇيدىڭ بار-جوقتىعى، جيناعان قارجىسى سياقتى تالاپتار ءرول وينامايدى.
«قازاقستاندا ورتا ەسەپپەن 2 ادام تولىق جۇمىس جاسايتىن وتباسى (ورتاشا جالاقى كولەمى - 161,87 تەڭگە) ايىنا 80,9 مىڭ تەڭگە كولەمىندە جيناي الادى. جاس وتباسى وسىلايشا 2 جىل (25 اي) ۋاقىت ىشىندە سالىنىپ جاتقان ءۇيدىڭ پاتەرىنەن العاشقى سالىم جيناي الادى»، - دەلىنگەن زەرتتەۋ قورىتىندىسىندا.
اتالعان قور ارقىلى قازاقستاننىڭ كەز-كەلگەن قالاسىندا جاس وتباسىلار پاتەرگە اقشا جيناي الادى.
اتاپ ايتقاندا، ورال قالاسىنداعى وتباسىلار - 16 ايدا اتىراۋ، اقتاۋ، پاۆلودار، قىزىلوردا، تاراز قالالارىندا 17 ايدا العاشقى سالىمدى جيناي الادى. ال، شىمكەنتتە جاستارعا - 40 اي، الماتى، وسكەمەن قالالارىندا 26 اي ەڭبەكتەنۋگە تۋرا كەلەدى.