ۋكراينا پرەزيدەنتى رەسەيدەگى تەڭىزشىلەردى بوساتۋ ءۇشىن ا. مەركەلدەن كومەك سۇراعان

استانا. قازاقپارات - «ۋكراينا رەسەيمەن سوعىس قاۋپى ءتونىپ تۇرعاندىقتان، ەلدە اسكەري جاعداي ەنگىزۋگە ءماجبۇر بولدى». مۇنداي مالىمدەمەنى پرەزيدەنت پەتر پوروشەنكو جاسادى.

ونىڭ ايتۋىنشا، كەرچ بۇعازىنداعى وقيعادان سوڭ ول رەسەي پرەزيدەنتى ۆلاديمير پۋتينمەن حابارلاسۋعا تىرىسقان. الايدا ودان ەشبىر جاۋاپ الماعان.

 پەتر پوروشەنكو، ۋكراينا پرەزيدەنتى:

 -  كەرچتەگى وقيعا بولعان كۇنى پرەزيدەنت ۆلاديمير پۋتينمەن سويلەسۋگە تىرىستىم. الايدا ودان ەش ناتيجە شىققان جوق. سوندىقتان گەرمانيا كانسلەرى انگەلا مەركەلمەن تىلدەسىپ، ودان ۋكراينالىق تەڭىزشىلەردى بوساتۋعا كومەكتەسۋىن سۇرادىم.

 ماسكەۋ ۋكراينا پرەزيدەنتى تاراپىنان ەشقانداي قوڭىراۋ شالىنباعانىن مالىمدەدى. ال سوڭعى اقپارعا قاراعاندا، سيمفەروپول سوتى كەرچ بۇعازىندا ۇستالعان 24 تەڭىزشىنىڭ 12 ءسىن 2 ايعا دەيىن قاماۋ تۋرالى شەشىم شىعاردى. قالعانىنا قاتىستى ۇكىم بۇگىن شىعارىلماق.

 ەسكە سالا كەتەيىك، رەسەي شەكاراشىلارى جەكسەنبى كۇنى كەرچ بۇعازىندا ۋكراينانىڭ ءۇش كەمەسىن ۇستادى. ماسكەۋدىڭ مالىمدەۋىنشە، ولار شەكارانى بۇزعان. كيەۆ كەمەلەر كەلىسىمشارت شەڭبەرىندە ارەكەت ەتكەنىن ايتادى.

www.24.kz