قازاقستاندىق ديپلوماتتار وتاندىق كيىمدى كيەتىن بولادى - سىرتقى ىستەر ءمينيسترى قايرات ءابدىراحمانوۆ

استانا. قازاقپارات - ق ر سىرتقى ىستەر ءمينيسترى قايرات ءابدىراحمانوۆ ءوز قىزمەتكەرلەرىن وتاندىق كيىم- كەشەكتى الۋعا ۇندەدى، دەپ حابارلايدى قازاقپارات.

 «ءبىزدىڭ ديپلوماتتار جىل سايىن كيىم- كەشەككە ارنالعان اقشانى الىپ وتىرادى. كەلەسى جىلى 1 - قاڭتاردان باستاپ ول اقشا تاعى بەرىلە باستايدى. وعان كوستيۋم، كويلەك، اياق- كيىم جانە تاعى باسقا قاجەتتى زاتتاردى الۋ قاجەت. ەندى، سىرتتا جۇرگەندە ديپلوماتتاردىڭ ۇستىندەگى كيىم- كەشەك تە دۇرىس بولۋى كەرەك قوي. كەلەسى جىلدان باستاپ مەنىڭ بارلىق قىزمەتكەرلەرىم دۇكەنگە بارىپ، «Made in Kazakstan»   دەگەن جازۋى بار كيىم السا ەكەن دەيمىن»، - دەدى ق. ءابدىراحمانوۆ «Protecting business and investments»  جوباسىنىڭ قورىتىندىسىنا ارنالعان جيىندا.

ءمينيستردىڭ ايتۋىنشا، ديپلوماتتارعا ەر ادامعا ارنالعان 200 كوستيۋم، ايەل ادامعا ارنالعان 200 كوستيۋم، بۇدان بولەك، 400 كويلەك، 500 گالستۋك تىگىپ بەرە الاتىن وتاندىق كاسىپورىن بولسا، سىرتقى ىستەر ۆەدومستۆوسى اتالعان كاسىپكەرلىك نىسانمەن جۇمىس ىستەۋگە دايىن.

 «وسى باستامانى ناۋقانشىلىققا اينالدىرماي- اق قويايىق. ءبارىن ءوز جەرىمىزدە الۋىمىز قاجەت. مەيلى، باسقا ەلدىڭ ءونىمى بولسا دا، ونى تەك قازاقستاندا عانا ساتىپ الامىز. ءبىراق بىردەن ەسكەرتىپ قويايىن، ءبىزدى الداۋ قيىن. ويتكەنى شەتەلدە ءجيى جۇرەمىز جانە ول جاقتاعى باعالاردى جاقسى بىلەمىز. ايتپەسە، باعاسىن «1 ميلليون تەڭگە» دەپ جازىپ قويادى دا، 50 پروتسەنتتىك جەڭىلدىكپەن ساتادى. سوندا بىزگە 500 مىڭعا بەرىپ جاتادى. ال شەتەلدە ونىڭ باعاسى الدەقايدا تومەن. ولاي بولماسىن»، - دەپ اتاپ كورسەتتى ق. ءابدىراحمانوۆ.

اۆتور: ارمان اسقاروۆ