ءابدىراحىموۆ: شىمكەنتتەن كەتكەندە جىلايتىن بولاسىزدار
استانا. قازاقپارات - شىمكەنت قالاسىنىڭ اكىمى عابيدوللا ءابدىراحىموۆ قالاداعى ارباتتا ورناتىلعان 12 پەرىشتە كومپوزيتسياسى تۋرالى ايتىپ، ونىڭ نە ءۇشىن كەرەكتىگىن ءتۇسىندىرىپ بەردى دەپ حابارلايدى NUR. KZ ءتىلشىسى.
ونىڭ ايتۋىنشا، قالادا جاياۋ جۇرگىنشىلەرگە ارناپ اشىلاتىن ارباتتىڭ ەڭ ادەمى تۇسى وسى كومپوزيتسيالار بولماق.
«12 پەرىشتە- 12 ايدى بىلدىرەدى. ءبىز ارباتتىڭ جوباسىن جاساپ جاتقاندا كەلۋشىلەردى وندا تارتىپ تۇراتىن ءبىر دۇنيە بولسا دەپ ويلادىق. سوندىقتان پەرىشتەلەردى جاساتتىق.
قۇداي قالاسا 1- جەلتوقساندا ءبىز ونى اشامىز. بارلىعىڭىزدى سوندا شاقىرامىن. كورىپ تاڭعالاتىن بولاسىزدار»، - دەيدى ول.
ب ا ق وكىلدەرى قالا باسشىسىنان شىمكەنتتىڭ قاشان ادام كەتۋگە قيمايتىن قالا بولاتىنىن سۇرادى.
«ءتىپتى وسى جىلى-اق قالادان كەتەردە جىلايتىن بولاسىزدار»، - دەپ جاۋاپ بەردى ءابدىراحىموۆ.
سونداي-اق اكىم شىمكەنتتە قالىپتاسقان داستۇرلەر تۋرالى ءسوز قوزعادى.
«ەكى جىل بۇرىن مەن مۇندا ءبىر ءداستۇر ورناتتىم. وسىعان دەيىن ءاربىر اكىم ناۋرىز مەرەكەسىندە قوشقار-اتاعا بارىپ ۇلكەن قوي سويعىزىپ، اللادان قالامىزدى ءورت پەن قاۋىپ-قاتەردەن ساقتاۋىن سۇرايتىن. سول سياقتى مەن دە قۇدايدان ەرتەڭگى اۋا رايى جاقسى بولسا ەكەن دەپ تىلەپ وتىرمىن»، - دەپ ءسوزىن قورىتتى اكىم.