دانيال احمەتوۆ نازاربايەۆتىڭ رەسەي مەن تۇركيانى قالاي تاتۋلاستىرعانىن ايتتى

استانا. قازاقپارات - شىعىس قازاقستان وبلىسىنىڭ اكىمى دانيال احمەتوۆ مەكتەپ وقۋشىلارىنا «نۇرسۇلتان نازاربايەۆ فەنومەنى» اتتى تاقىرىپتا ونلاين ءدارىس وتكىزىپ، رەسەي مەن تۇركيانىڭ قالاي تاتۋلاسقانى تۋرالى شىندىقتى ايتتى دەپ حابارلايدى «استانا» ارناسى.

ونلاين رەجيمدە ءدارىس وتكىزگەن دانيال احمەتوۆ ەلباسىنىڭ ءومىرىن بايانداپ، حالىقارالىق ساياساتتاعى بەدەلىنە ەرەكشە توقتالىپ ءوتتى.

شەنەۋنىك مەملەكەت باسشىسىنىڭ سيريا قاقتىعىسىن شەشۋگە دە تالاي تەر توككەنىن اتاپ ءوتتى.

پرەزيدەنتتىڭ ءاردايىم ارىپتەستەرىن ىمىراعا كەلۋگە ۇندەيتىنىن ايتقان اكىم، وسىنداي مامىلەگەرلىك قابىلەتىنىڭ ارقاسىندا رەسەي مەن تۇركيانىڭ تاتۋلاسقانىن ءمالىم ەتتى.

«تۇركيا مەن رەسەيدى ءبىزدىڭ مەملەكەت باسشىمىز تاتۋلاستىردى. بۇل كەزدە ول وزبەكستاندا ءىس ساپاردا جۇرگەن. سوعان قاراماستان، قوناق ۇيدەگى بولمەسىنە رەسەي مەن تۇركيا وكىلدەرىن شاقىرىپ الىپ، كەزدەسۋ ۇيىمداستىردى. بىتىمگەر بولۋ وڭاي ءىس ەمەس. وسى كەزدەسۋدەن كەيىن ەكى ەلدىڭ اراسىنداعى توڭ ءجىبىپ سالا بەردى»، - دەيدى دانيال احمەتوۆ.