باياناۋىلدىق تۇرعىن تۋريستەرگە قويان ەتىن جەڭسىك اس رەتىندە ۇسىنباق
جانۋارلاردى كۇتىپ-باعۋمەن جەرگىلىكتى مەكتەپتە بيولوگيا جانە حيميا ءپانىنىڭ ۇستازى بولىپ جۇمىس ىستەيتىن سالتانات تەمىربايەۆا وتباسىمەن بىرگە اينالىسادى.
- باستاپقىدا جولداسىمنىڭ اعاسى ءبىر انالىق جانە اتالىق قويان سىيعا تارتقان، - دەيدى سالتانات تەمىربايەۆا. - ونىڭ ءوزىنىڭ جەكە فەرماسى بار. سول جەردە قويان وسىرۋمەن اينالىسادى، ءبىراق يتتەر مازا بەرمەي قويعان. ەكى جىلدىڭ ىشىندە ەكى قوياننىڭ سانى 37 گە دەيىن كوبەيدى. ولاردىڭ جارتىسىن ءوزىمىز سويىپ جەدىك. ادام دەنساۋلىعى ءۇشىن قويان ەتىنىڭ پايداسى زور. قازىرگى كۇنى بارلىعى 20 قويان قالدى.
ۇستازدىڭ ايتۋىنشا، جولداسى نۇرلان سۇلەيمەنوۆ مال قوراسىنىڭ ىشىنەن جانۋارلارعا ارناپ جىلى ورىن جاساپ بەرگەن. دەگەنمەن كوبەيەتىن كەزدە ولار وزدەرىنە ءىن قازىپ الىپ، كوجەكتەرىن كوزدەرىن اشقانعا دەيىن ادامدارعا كورسەتپەي جاسىرىپ قوياتىن كورىنەدى. ءتىپتى، قىزعانىشتان بالالارىن جەپ قوياتىن كەزدەرى دە بولعان. جىلىنا ەكى رەت 8-9 كوجەكتەن بەرەدى.
- تونىنا قاراپ ولاردىڭ ەرەسەك جانە جاس ەكەنىن اجىراتۋعا بولادى، - دەيدى سالتانات تەمىربايەۆا. - مىسالى، ەرەسەك قويانداردىڭ مامىعى قالىڭ كەلەدى. بالالارمەن بىرگە كوكونىستەر - ءسابىز، قىرىققابات، ءشوپ جانە جەم بەرەمىز. تاماقتاندىراتىن مەزگىلدى بىلەدى. بىردەن جۇگىرىپ كەلەدى.
سالتانات تەمىربايەۆا بولاشاقتا مىرزاشوقى تاۋىندا ىسكە قوسىلعان تاۋ-شاڭعى بازاسىندا اشىلاتىن ءدامحاناعا كەلەتىن تۋريستەرگە قويان ەتىن جەڭسىك اس رەتىندە ۇسىنۋدى كوزدەپ وتىر.
مامانداردىڭ سوزىنە سۇيەنسەك، بيولوگيالىق قۇنارلىلىعى وتە جوعارى قويان ەتى ديەتالىق ەتكە جاتادى. سوندىقتان بالالار مەن قارت كىسىلەردىڭ اس مازىرىندە مىندەتتى تۇردە قويان ەتى بولۋ كەرەك. بۇل ەتتىڭ كولورياسى وتە تومەن. مىسالى، 100 گرام ەتتە 156 كيلوكولوري بولادى. ءپىسىرىپ، قۋىرىپ، مارينادتاعان كەزدە دە ونىڭ كولورياسى نەبارى 176 كيلوكولوريدى قۇرايدى.
بۇعان قوسا، قويان ەتى سالماق قوستىرمايدى.