مايكل دجەكسون قۇپياسى
ونىڭ ءار جاساعان قيمىلى قايتالانباس ءستيلدىڭ نەگىزىن قالادى. سونىڭ ىشىندە - مايكلمەن بىرگە ەسكە تۇسەتىنى «اي ءجۇرىسى» مەن گراۆيتاتسيانى جوققا شىعارعان ءيىلۋ ءادىسى. 1987 -جىلى «Smooth Criminal» بەينەبايانىندا العاش ورىندالعان قيمىل كەيىن عالىمداردىڭ زەرتتەۋ نىسانىنا اينالدى. اسىرەسە، ءبىر كەزدەرى مايكلدىڭ جانكۇيەرى بولىپ، بۇگىندە چانديگارحتا نەيروحيرۋرگ قىزمەتىن اتقاراتىن ءۇندى زەرتتەۋشىلەرى بار ۋاقىتتارىن وسىعان ارناعان. نيشانت ياگنيك، ماندجۋل تريپاتي جانە سانديپ ماحيندرا بالا كەزدەرىندە مايكل دجەكسوننىڭ قيمىلىن قايتالاۋعا تىرىسقانىمەن، ودان تەك جاراقات الىپ، وزدەرىنە دەگەن سەنىمدەرىن جوعالتقان.
«Journal of Neurosurgery» زەرتتەۋ جۋرنالىندا جاريالاعان ماقالادا زەرتتەۋشىلەر بۇل قيمىلعا ادامنىڭ دەنەسى مەن قالىپتاسۋى ارقىلى ساراپتاما جاساپ، پوپ- پاتشاسىنىڭ سىرىن اشتى. زەرتتەۋشىلەر سوزىنە سەنسەك، ادامنىڭ بۇلشىق ەتى بىرنەشە جىل بويىنا دايىندالعان ءبيشىنىڭ وزىنە تەك 25-30 گرادۋستا يىلۋگە مۇمكىندىك بەرەدى. ودان ءارى، ادامنىڭ ومىرتقاسىندا ورنالاسقان اۋىرلىق ورتالىعى ادام سالماعىن كوتەرە الماي نە قۇلايدى نەمەسە بەلىن بۇگەدى. "Smooth Criminal" بەينەبايانىندا دجەكسون جانە ونىڭ بيشىلەرى بۇل قيمىلدى ارنايى تروستار ارقىلى ورىنداعانى انىق. دەگەنمەن، كەيىن ونى ساحنادا ءوزى ورىنداپ، جانكۇيەرلەرىن تاڭقالدىردى. زەرتتەۋشىلەردىڭ پىكىرىنشە، دجەكسوننىڭ فيزيكا مەن فيزيولوگيا زاڭدىلىعىنا كۇمان تۋدىرعان ءبيى تەك بيشىلەردىڭ عانا ەمەس، دارىگەرلەردىڭ دە نازارىن ەرىكسىز وزىنە اۋداردى. دەگەنمەن، دجەكسوننىڭ قۇپياسى كەيىن بەلگىلى بولدى. كونتسەرتتىك باعدارلامالارعا وكشەسىندە ءۇشبۇرىشتى ويىعى بار ارنايى اياق كيىمنىڭ شىعارىلعانى انىقتالدى. ويىق ساحنادا ورنالاسقان تىرەۋگە كيىلەدى دە، كەيىن اۋىرلىق تسەنترىن ەسەپكە الماي، ەش الاڭسىز ەڭكەيۋگە بولادى. بۇل مەحانيزم مايكل دجەكسوننىڭ شوۋى ءۇشىن ويلاستىرىلعان. دەگەنمەن، عالىمدار مۇنىڭ ءوزىن ورىنداۋ ءۇشىن ۇلكەن دايىندىق پەن كۇش كەرەكتىگىن اتاپ ءوتتى.
Massaget.kz