پەتروپاۆل اتاۋى وزگەرە مە - وبلىس باسشىسىنىڭ جاۋابى

استانا. قازاقپارات - بۇگىن ورتالىق كومۋنيكاتسيالار قىزمەتىندەگى بريفينگتە سولتۇستىك قازاقستان وبلىسىنىڭ اكىمى قۇمار اقساقالوۆ پەتروپاۆل قالاسىنىڭ اتاۋى وزگەرەدى دەگەن اڭگىمەلەرگە سوڭعى نۇكتە قويدى، دەپ حابارلايدى قازاقپارات ءتىلشىسى.

 «پەتروپاۆل قالاسىنىڭ دا، وبلىستىڭ دا اتاۋى وزگەرمەيدى. بۇل اڭگىمەلەردى بىرەۋلەر ايتىپ ءجۇر. ونى ەستىپ، ءبىلىپ وتىرمىن. ءبىراق، بۇگىنگى كۇنى قالا اتاۋىن وزگەرتۋگە باعىتتالعان جۇيەلى جۇمىستار جۇرگىزىلىپ جاتقان جوق. وعان ءالى ەرتە دەپ ەسەپتەيمىن» ، - دەدى قۇمار اقساقالوۆ ب ا ق وكىلدەرىنىڭ ساۋالىنا وراي.

 ايتا كەتەيىك، پەتروپاۆل قالاسىنىڭ اتاۋىن  قىزىلجار دەپ وزگەرتۋ تۋرالى باستاما وسىدان ءبىراز جىل بۇرىن كوتەرىلگەن بولاتىن. ءتىپتى، 2010 -جىلى ءماجىلىستىڭ ءبىر توپ دەپۋتاتى سول كەزدەگى پرەمەر- مينيستر كارىم ءماسىموۆتىڭ اتىنا دەپۋتاتتىق ساۋال جولداپ، وندا پەتروپاۆل قالاسىنا ەجەلگى  قىزىلجار اتاۋىن قايتارۋ تۋرالى ماسەلەگە قوزعاۋ سالۋدى وتىنگەن ەدى.

 «سولتۇستىك قازاقستان وبلىسىنىڭ ورتالىعى - پەتروپاۆل قالاسىنا ەجەلگى  قىزىلجار اتاۋىن قايتارۋ تۋرالى ماسەلەگە قوزعاۋ سالۋىڭىزدى جانە ونى قازاقستان رەسپۋبليكاسىنىڭ پرەزيدەنتى ن. ءا. نازاربايەۆتىڭ قاراۋىنا ەنگىزۋىڭىزدى سۇرايمىز. بۇل ماسەلە ءوز شەشىمىن تاپقانشا، كۇن تارتىبىنەن تۇسپەك ەمەس. ۋاقىت وسىنى تالاپ ەتىپ وتىر. سوندىقتان ەرتە مە، كەش پە ونى قاراۋعا تۋرا كەلەدى. وسىنداي حالىق كوپتەن كۇتكەن شەشىم قوعامىمىزدا تۇسىنىستىك احۋالى قالىپتاسىپ وتىرعان بۇگىنگى تاڭدا قابىلدانسا، نۇر ۇستىنە نۇر بولار ەدى» ، - دەلىنگەن ەدى دەپۋتاتتاردىڭ ساۋالىندا.