الماتىدا قانداي اۋەجاي سالىنادى؟
ونىڭ 66-قادامىندا حالىقارالىق اۆياتسيالىق حاب قۇرۋ تۋرالى ايتىلدى. ول ءۇشىن ستراتەگيالىق ينۆەستورلار تارتىپ، الماتى ىرگەسىنەن الەمدىك ستاندارتقا ساي كەلەتىن جاڭا اۋەجاي سالۋ ۇسىنىلدى.
الماتى - تۋريزم سالاسىنداعى حالىقارالىق ورتالىق. سوندىقتان الماتىدا زاماناۋي تالاپقا ساي سالىنعان جاڭا اۋەجايدىڭ بولعانى دۇرىس. سول ءۇشىن دە ەلباسى 100 ناقتى قادامدا حالىقارالىق اۆياتسيالىق حاب قۇرۋدى ۇسىندى.
«جاڭا اەروپورتتىڭ قۇرىلىسى - ۇزاق مەرزىمدى نۇسقا. قازىر جولاۋشىلار كولەمىنىڭ بولجامى، وتكىزۋ مۇمكىندىگى، قارجىسى مەن ۋاقىتى سياقتى بارلىق تۇستارى ەسكەرىلىپ، ەڭ ءتيىمدى نۇسقاسىن تابۋ كەرەك. مۇمكىن تاعى ءبىر تەرمينال كەرەك شىعار»، - دەدى نۇرسۇلتان نازاربايەۆ.
الماتى حالىقارالىق اۋەجايىنىڭ ءبىرىنشى ۆيتسە-پرەزيدەنتى قوبىلاندى تۋمىشيەۆ ءبىر سۇحباتىندا بىلاي دەدى:
«اۋەجايدىڭ قازىرگى مۇمكىندىگى شەكتەۋلى. ءارى قارايعى دامۋى دا كۇماندى. قاراشا مەن ناۋرىز ايلارى ارالىعىنداعى قالىڭ تۇمان بىزگە ۇلكەن كەدەرگى كەلتىرەدى. ال جاڭا اۋەجايدا بۇنداي قيىندىقتان ارىلامىز. سوندىقتان، بىزگە قالانىڭ سىرتىندا ۇلكەنىرەك حالىقارالىق اۋەجاي كەرەك.
«2015-جىلى «الماتى ماڭىنداعى جاڭا حالىقارالىق اۆياتسيالىق حاب پەن قاناتتاس قالانى قۇرۋ» جوباسىنىڭ ءبىرىڭعاي وپەراتورى رەتىندە MG Holding تاعايىندالدى. ول ءبىرقاتار كومپانيالاردى بىرىكتىرۋ ناتيجەسىندە قۇرىلعان كوپ ءپروفيلدى حولدينگ. MG Holding وسى جوبانى جۇزەگە اسىرۋ ءۇشىن سينگاپۋرمەن بىرلەسىپ، ينۆەستورلار تارتۋمەن اينالىسىپ جاتىر. سينگاپۋر مەن قازاقستان اراسىندا كەلىسىمشارت جاسالدى، ونىڭ جوباسى سينگاپۋر ۇكىمەتىندە قارالىپ جاتىر. «جوبانىڭ نەگىزگى تالابى - 22 گەكتار جەر ۋچاسكەسىن 100 جىلعا قايتارىمسىز باسقارۋ قۇقىعىن بەرۋ بولىپ تابىلادى. سونىمەن قاتار، سالىقتىق جەڭىلدىكتەر، كەدەندىك پرەفەرەنتسيالار، ەرەكشە ۆيزالىق رەجىمدى ەنگىزۋ كوزدەلگەن. جەكە اكىمشىلىك تەرريتورياسى بار سەرىكتەس قالا تۇرعىزۋ دا جوسپاردا بار. وندا «اعىلشىن قۇقىعى» قولدانىلادى. سوندىقتان، بۇل راتيفيكاتسيالاۋدى تالاپ ەتەدى»، - دەپ جاۋاپ بەردى مينيسترلىك وكىلدەرى.
MG Holding ۇسىنعان حالىقارالىق اۆياتسيالىق كەشەن سيپاتتاماسى مىناداي:
- قۇرىلىستىڭ اياقتالۋ مەرزىمى: 2024-2025 ج.ج؛
- حالىقارالىق وپەراتور: Changi Airports International؛
- شىعىس پەن باتىس اراسىنداعى بىرەگەي ورنالاسۋ؛
- كەشەندى 5 اۆياساعات راديۋس ىشىندە 2 ميلليارد ادامنان استام، ال 6 اۆياساعات راديۋس ىشىندە 3,2 ميلليارد ادامنان استام جولاۋشىلار قولدانا الادى؛
- جوسپارلانعان جولاۋشىلار ترافيگى: جىلىنا 15 ميلليون (ىسكە قوسۋدىڭ ءۇشىنشى جىلىنا).
MG Holding ۇسىنعان قاناتتاس قالانىڭ سيپاتتاماسى - كوممەرتسيالىق جانە تۇرعىن ءۇي جىلجىمايتىن مۇلىكتەرى؛
- الەۋمەتتىك نىساندار: مەكتەپتەر، بالاباقشالار، اۋرۋحانالار، ەمحانالار؛
- 3, 4 ، 5 جۇلدىزدى قوناق ۇيلەر؛
- تاقىرىپتىق پاركتەر: LEGOLAND، سۋ پاركى، گولف كلۋبى؛
- بانكتەر جانە باسقا دا قارجى ينستيتۋتتارى؛
- ويىن-ساۋىق جانە قوعامدىق تاماقتانۋ مەكەمەلەرى (كافەلەر، بارلار، مەيرامحانالار)؛
- ا سىنىپتى ويىن ايماقتارى (2-3 توپ).
ۋاقىت وتە قالانىڭ كولەمى دە، جولاۋشىلار سانى دا ارتىپ كەلەدى. جاڭا اۋەجاي سالۋ ماسەلەسى بۇرىننان قوزعالىپ كەلەدى. ەلىمىزگە تۋريزمدى دامىتۋدىڭ قانشالىقتى پايدالى ەكەندىگىن ايتىپ كەلەمىز. ەندەشە، ءوز حالقىمىزدى جانە تۋريستەردى جايلى ءارى زاماناۋي حالىقارالىق اۋەجايمەن قامتاماسىز ەتۋ دە سول ماقساتقا جەتۋگە تاعى ءبىر قادام بولماق.
Massaget.kz