ناتو رەسەيدى ۋكراين كەمەلەرى مەن تەڭىزشىلەرىن بوساتۋعا شاقىردى
ستولتەنبەرگتىڭ سوزىنشە، رەسەي كەرچ بۇعازىنداعى ارەكەتىنىڭ كەرى سالدارى بولاتىنىن ۇعىنۋى كەرەك. ستولتەنبەرگ ۋكرايناعا قولداۋ ءبىلدىرىپ، ەكى ەل «ۇستامدىلىق تانىتۋى» قاجەتىن ايتتى.
26 - قاراشادا ۇلى بريتانيا رەسەيدىڭ ۋكراينا كەمەلەرىن تۇتقىنداعانىن ايىپتاعان. ۇلى بريتانيا پرەمەر- ءمينيسترىنىڭ وكىلى دجەيمس سلاك كەرچ بۇعازىنداعى وقيعا رەسەي بيلىگىنىڭ ايماقتاعى تۇراقتىلىقتى بۇزۋعا تالپىنىپ وتىرعانىن دالەلدەيتىنىن مالىمدەدى.
ال ۋكراينا پرەزيدەنتى پەتر پوروشەنكو دا رەسەيدەن ازوۆ تەڭىزىندە ۇستالعان ۋكراينا اسكەري كەمەلەرى مەن تەڭىزشىلەرىن دەرەۋ بوساتۋدى تالاپ ەتتى. بۇل تۋرالى ۋكراينا پرەزيدەنتىنىڭ رەسمي سايتىندا حابارلاندى.
ۋكراينا سىرتقى ىستەر مينيسترلىگى كەمەلەردى ۇستاۋدى ايىپتاپ، رەسەي ارەكەتىن «باسقىنشىلىق» دەپ اتادى.
25 - قاراشادا رەسەي كەرچ بۇعازىندا ۋكراينا اسكەري- تەڭىز كۇشتەرىنىڭ ءۇش كەمەسىن وق اتىپ، ۇستاعان. رەسەي فەدەرالدىق قاۋىپسىزدىك قىزمەتى ۋكراينا اسكەري كەمەلەرى «رەسەي شەكاراسىن بۇزعانىن»، قارا تەڭىزدە ولاردى ۇستاۋ ءۇشىن قارۋ قولدانىلعانىن جانە ءۇش تەڭىزشىنىڭ جارالانعانىن راستاعان. ۋكراينا ۇلتتىق قاۋىپسىزدىك جانە قورعانىس كەڭەسى 25 - قاراشادا وتكەن شۇعىل جيىنىندا رەسەيدىڭ بۇل ارەكەتىن «باسقىنشىلىق» دەپ اتاپ، ەلدە اسكەري جاعداي جاريالاۋدى ۇسىنعان.
سوڭعى الىمەتتەر بويىنشا، ۋكراينا كەمەلەرى ەكيپاجىمەن بىرگە كەرچ پورتىندا تۇر، جارالانعان تەڭىزشىلەر ومىرىنە قاۋىپ ءتونىپ تۇرعان جوق.
ۋكراينا قارۋلى كۇشتەرى قازىر تولىق اسكەري دايىندىققا كەلتىرىلدى. ناتو مەن ەۋروپا وداعى ماسكەۋ مەن كيەۆتى ۇستامدى بولۋعا شاقىرعان.
www.azattyq.org