اقتوبەدە قىزدارعا شي توقۋدى ۇيرەتەتىن مەكتەپ اشىلدى

اقتوبە. قازاقپارات - اقتوبە وبلىسىندا جەكەنىڭ قولىنداعى عيمارات مەملەكەتتىك مەكەمەگە بەرىلىپ، كوركەمسۋرەت مەكتەبىنە اينالدى.

قازاقستان ۇلتتىق يۋنەسكو كلۋبتارىنىڭ فەدەراتسياسىنا مۇشە مەكتەپتە بالالار قۇممەن سۋرەت سالىپ، شي توقيدى، دەپ حابارلايدى قازاقپارات ءتىلشىسى.

اقتوبە وبلىسى، تەمىر اۋدانىنىڭ ورتالىعى شۇبارقۇدىقتا وقۋشىلار ءۇيى مەن كوركەمسۋرەت مەكتەبى جۇمىس ىستەپ تۇر. مۇندا قىزدار شي توقىپ، ەر بالالار اعاش جونىپ ءجۇر. سۋرەت سالىپ، گراتتاج ادىسىمەن ءتۇرلى بۇيىمدار جاسايدى. سونىمەن قاتار، قىزدارعا اسەمدىك سىيلايتىن ۇلۋ باعىپ، توساپ قايناتۋ، قىسقا ارناپ كوكونىس تۇزداۋ ۇيرەتىلەدى.

«اۋداندا وقۋشىلار ءۇيى مەن كوركەرسۋرەت مەكتەبى جۇمىس ىستەپ تۇر. وقۋشىلار بوس ۋاقىتىندا قولونەر بۇيىمدارىن جاساپ، شەبەرلىكتەرىن شىڭداپ ءجۇر. شىنىن ايتقاندا، اۋدانداعى ەڭ العاشقى «تاڭشولپان» ءدامحاناسى مەملەكەتكە بەرىلىپ، قايتا جوندەلدى» ، - دەدى تەمىر اۋدانىنىڭ اكىمى جولداس قالماعامبەتوۆ.

وقۋشىلار ءۇيىنىڭ ديرەكتورى سامال ەرمەك قىزىنىڭ ايتۋىنشا، زوولوگيا ۇيىرمەسىندە ۇلۋ ۇستايدى. احاتين تۇقىمداس ۇلۋدى قىزدار تاماقتاندىرىپ، بار كۇتىمىن جاسادى.

«ۇلۋ اسەمدىك سىيلايتىن جاندىك بولعان سوڭ قىزدار ۇيىرمەگە كەلىپ ءجۇر. سۇلۋلىق سالونى بولماعان سوڭ تاپسىرىس قابىلدامايمىز. بارلىعى ءۇش توپ بار. ءوزىم تەمىر اۋدانىنىڭ كەڭقياق اۋىلىندا ءبىلىم الىپ، مەكتەپتەن سوڭ ق. جۇبانوۆ اتىنداعى اقتوبە وڭىرلىك ۋنيۆەرسيتەتىنىڭ جاراتىلىستانۋ ماماندىعىن ءبىتىردىم. ديپلوم العان سوڭ جاس مامان رەتىندە وقۋشىلار ۇيىنە جۇمىسقا قابىلداندىم» ، - وقۋشىلار ءۇيىنىڭ ءمۇعالىمى اياگوز جامايەۆا.

 وقۋشىلار سيرەك كەزدەسەتىن جەمىستەن توساپ دايىنداعان. ءزار شىعارۋ جۇيەسىنىڭ اۋرۋلارىنا، تۇماۋ مەن سۋىق تيۋگە قارسى ەمدىك قاسيەتى بار فيزاليس جەمىسى رەسەي، يراك، بالتىق جاعالاۋى مەن كاۆكازدا ءجيى كەزدەسكەنىمەن، قازاقستان جەرىندە وتە سيرەك وسەدى.

«فيزاليس جەمىسىنىڭ تۇقىمىن الىپ، ەگىپ، بالالار جاز ايلارىندا باپتادى. اۋلاداعى شاعىن باقتا وسكەن جەمىس بيىل ءونىم بەرىپ، قىزدار توساپ دايىندادى. ەمدىك قاسيەتى بار جەمىستى ءوسىرىپ، دامىتۋعا، تابىس كوزىنە اينالدىرۋعا بولادى. بىزدە 750 بالا ۇيىرمەلەرگە قاتىسادى. ءار وقۋشى ءوز تالعامى، تاڭداۋى بويىنشا جاڭا دۇنيەلەردى ۇيرەنىپ ءجۇر» ، - دەدى وقۋشىلار ءۇيىنىڭ ديرەكتورى سامال ابدۋللينا.

مۇندا قىزدار شي توقۋدى، ەر بالالار اعاش جونىپ، ۇلتتىق بۇيىمداردى دايىنداپ ءجۇر. شەبەر تولەگەن قوڭىربايەۆتىڭ ايتۋىنشا، رەسپۋبليكالىق «نۇرلى جەر» بايقاۋىندا «جىلقىلار» اتتى التىناي قوجاننىڭ جۇمىسى I- ورىندى جەڭىپ الدى. وسى جەڭىس وقۋشىلارعا جىگەر بەرىپ، ولاردىڭ قاتارى كۇن ساناپ ارتىپ وتىر.

ال كوركەمسۋرەت مەكتەكبىندە وقۋشىلارى قۇممەن سۋرەت سالادى.

 

«قۇمدى ارنايى تاپسىرىسپەن استانا قالاسىنان الدىرىپ جاتىرمىز. ازىرگە وقۋشىلار ءوز جەرىمىزدەگى قۇمدى پايدالانىپ ءجۇر. كوركەمسۋرەت مەكتەبى تاياۋدا الماتى قالاسىنا بارىپ، قازاقستان ۇلتتىق يۋنەسكو كلۋبتارىنىڭ فەدەراتسياسىنا مۇشە بولدى. ەندى حالىقارالىق، رەسپۋبليكالىق بايقاۋلارعا ەركىن شىعىپ، قاتىسامىز. ال كىشكەنتاي شەبەرلەرىمىزگە كلۋب قارجىلاي كومەك بەرەدى. وقۋشىلار گراتتاج ءادىسىن مەڭگەرىپ ءجۇر. مايشاممەن سالىناتىن سۋرەت كوپشىلىكتى تاڭقالدىرىپ ءجۇر. ءارى مەكتەپ ىشىنەن قىسقى باق اشىلدى» ، - دەدى مەكتەپ ديرەكتورى ماكسيم چەركوۆ.

 ماكسيم چەركوۆتىڭ ۇلتى ۋدمۋرت بولسا دا قازاق ءتىلىندى سويلەپ، بالالارىنا قازاقى تاربيە بەرىپ ءجۇر. قازاق جەرىندى تۋىپ، وسكەن ول ءوز انا ءتىلىن بىلمەيدى، اتا- باباسى قونىستانعان ەلگە بارماعان. ونىڭ ارمانى، بالالاردى ءوزى بىلەتىن ونەرگە باۋلىپ، ۇرپاق تاربيەسىنە ۇلەس قوسۋ.