ۋكراينا قارۋلى كۇشتەرىن اسكەري دايىندىققا كەلتىردى

استانا. قازاقپارات - ۋكراينا قورعانىس مينيسترلىگى كەرچ بۇعازىنداعى جاعدايدىڭ كۇرت ۋشىعۋىنا بايلانىستى قارۋلى كۇشتەردىڭ تولىق اسكەري دايىندىققا كەلتىرىلگەنىن حابارلادى. ۋكراينا قاۋىپسىزدىك قىزمەتىنىڭ جەكە قۇرامىنا دا اسكەري دايىندىقتا بولۋعا تاپسىرما بەرىلدى.

25 - قاراشادا رەسەي كەرچ بۇعازىندا ۋكراينا اسكەري- تەڭىز كۇشتەرىنىڭ ءۇش كەمەسىن وق اتىپ، ۇستاعان. رەسەي فەدەرالدىق قاۋىپسىزدىك قىزمەتى ۋكراينالىق اسكەري كەمەلەر «رەسەي شەكاراسىن بۇزعانىن»، قارا تەڭىزدە ولاردى ۇستاۋ ءۇشىن قارۋ قولدانىلعانىن جانە ءۇش تەڭىزشىنىڭ جارالانعانىن راستاعان. ۋكراينا ۇلتتىق قاۋىپسىزدىك جانە قورعانىس كەڭەسى 25 - قاراشادا وتكەن شۇعىل جيىنىندا رەسەيدىڭ بۇل ارەكەتىن باسقىنشىلىق دەپ اتاپ، ەلدە اسكەري جاعداي جاريالاۋدى ۇسىنعان.

رەسەي اسكەري تەڭىز كۇشتەرى ۋكراينانىڭ ەكى اسكەري كەمەسى مەن ءبىر تىركەۋگە الاتىن كەمەسىن اتقىلاپ، التى تەڭىزشىسىن جارالاعان. پوروشەنكو اتىستان سوڭ 23 تەڭىزشى تۇتقىنعا الىنعانىن، كيەۆ ۇستالعان كەمەلەر جانە ولاردىڭ ەكيپاجىمەن بايلانىسا الماي وتىرعانىن حابارلادى. ۋكراينا پرەزيدەنتى رەسەيدىڭ بۇل ارەكەتىن «باسسىزدىق» دەپ اتادى. قاۋىپسىزدىك جيىنىندا سويلەگەن ۋكراينا پرەزيدەنتى پەتر پوروشەنكو ەلدە اسكەري جاعداي ۋكراينا رەسەيگە قارسى اسكەري قيمىل جاساۋ ماقساتىندا ەمەس، قورعانۋ ءۇشىن جاريالاناتىنىن مالىمدەدى.

ۋكراينا جوعارعى راداسى 26 - قاراشادا ەلدە اسكەري جاعداي جاريالاۋ ماسەلەسىن تالقىلايدى. كەرچ بۇعازىنداعى جاعداي بۇگىن سونىمەن قاتار ب ۇ ۇ قاۋىپسىزدىك كەڭەسىنىڭ شۇعىل جيىنىندا تالقىلانادى.

www.azattyq.org