ا ق ش رەسەيدى تەجەۋ ءۇشىن قۋاتى از يادرولىق قارۋ جاساماق
W76-2 دەپ اتالاتىن جاڭا وقتۇمسىقتىڭ قۋاتى تروتيل ەكۆيۆالەنتىمەن 6 كيلوتوننانى قۇرايتىن بولادى. بۇل كەزىندە جاپونيا قالالارىنا تاستالعان اتوم بومبالارىنىڭ قۋاتىنان ءۇش ەسە از. جاڭا وقتۇمسىقتى قازىرگى كەزدە «وگايو» ءتارىزدى اتومدىق سۇڭگۋىر قايىقتارىنداعى قۋاتى 100 كيلوتوننانى قۇرايتىن W76 تەرمويادرولىق وقتۇمسىعى نەگىزىندە جاساماقشى. W76 سياقتى ونىڭ جاڭا نۇسقاسى دا Trident-2 زىمىراندارىنا ورناتىلاتىن بولادى.
پەنتاگون قاناتتى زىمىراندار ءۇشىن دە وسىنداي قۋاتى از يادرولىق زاريادتار ازىرلەپ جاتىر. سۇڭگۋىر قايىقتار مەن تەڭىز بەتىندە جۇزەتىن اسكەري كەمەلەردى وسىلارمەن قارۋلاندىرۋ جوسپارلانعان.
وتكەن ايدا ا ق ش اسكەري- تەڭىز كۇشتەرىنىڭ ۆيتسە- ادميرالى دجونني ۆۋلف قۋاتى از يادرولىق وقتۇمسىقتار رەسەيدىڭ تاكتيكالىق يادرولىق الۋەتىن تەجەپ ۇستاۋ ءۇشىن ءتيىمدى قۇرال بولادى دەپ مالىمدەگەن. بۇعان قوسا ۆۋلف پەنتاگوننىڭ پلاتفورمالاردىڭ بارلىق ءتۇرىن جاراقتاندىرۋ ءۇشىن اسا ۇشقىر قارۋ- جاراق جاساۋعا جۇمىس ىستەپ جاتقانىن ايتقان. وسىنداي قارۋ ءتۇرىنىڭ ۇلگى نۇسقاسى گاۆاي ارالارىندا سىناقتان وتكىزىلگەن. بولاشاقتا اسا ۇشقىر زىمىران اسكەري باعدارلاما اياسىندا «وگايو» سىندى اتومدىق سۇڭگۋىر قايىقتارىنا دا ورناتىلماق.
قازىرگى ۋاقىتتا ا ق ش قارۋلى كۇشتەرىندە تاكتيكالىق يادرولىق زىمىران جوق. وسىعان بايلانىستى امەريكالىق اسكەريلەر ەگەر ماسكەۋ جەرگىلىكتى سيپاتتاعى جانجال كەزىندە قۋاتى از يادرولىق قارۋ قولداناتىن بولسا، ا ق ش -تىڭ وعان جاۋاپ بەرە الماي قالاتىنىن نەمەسە رەسەيگە ستراتەگيالىق يادرولىق زىمىراندارمەن كولەمدى سوققى بەرۋگە تۋرا كەلەتىنى تۋرالى ايتقان. ال ستراتەگيالىق يادرولىق قارۋدى قولدانۋ جەرگىلىكتى سيپاتتاعى جانجالدىڭ عالامدىق كولەمگە ۇلاسىپ كەتۋىنە اپارىپ سوعادى. رەسمي مالىمەت بويىنشا، قازىر ا ق ش پەن رەسەي ارميالارىندا جيىنى ءۇش مىڭعا جۋىق يادرولىق وقتۇمسىق بار.
بىلتىر جەلتوقساندا ا ق ش پرەزيدەنتى دونالد ترامپ امەريكانىڭ جاڭا قاۋىپسىزدىك ستراتەگياسىن ۇسىنعان. وندا رەسەي مەن قىتاي ا ق ش- قا قاتەر توندىرەتىن نەگىزگى ەلدەر رەتىندە اتالعان.
www.azattyq.org