حالىقارالىق «قايىرىمدى سەيسەنبى» باستاماسى قازاقستاندا جالعاسىن تاپتى

الماتى. قازاقپارات - قازاقستاندا دۇنيەجۇزىلىك قايىرىمدىلىق كۇنىنە وراي «قايىرىمدى سەيسەنبى» اكسياسى وتەدى، دەپ حابارلايدى قازاقپارات ءتىلشىسى.

«قايىرىمدى سەيسەنبى» حالىقارالىق قايىرىمدىلىق قوزعالىسى الەمدە جومارتتىقتى دامىتۋعا سەرپىن بەرۋ ماقساتىن كوزدەيدى. بيىلعى قاراشانىڭ سوڭعى سەيسەنبىسىندە - 27- قاراشا كۇنى الەمدەگى ميلليونداعان ادامدار قايىرىمدىلىق فلەشموبىن وتكىزۋ ءۇشىن بىرىگەدى. قوزعالىستى اندرەا بوچەللي، شەريل سەندبەرگ سەكىلدى كوپتەگەن جۇلدىزدار قولداپ وتىر. باستاما اياسىندا قايىرىمدىلىق جاساپ، الەۋمەتتىك جەلىدە قايىرىمدى سەيسەنبى حەشتەگىمەن بولىسۋگە بولادى.

«يدەيا 2012-جىلى باتىس ەلدەرىندە پايدا بولدى. اتاۋلى كۇن رەتىندە قاراشانىڭ سوڭعى سەيسەنبىسىن تاڭداۋدىڭ وزىندىك ءمانى بار، ءدال وسى كەزدە جاپپاي ساتىلىمدار باستالادى. 23-قاراشاداعى ماۋسىمدىق جاپپاي ساتىلىمداردان كەيىن، 27-قاراشا كۇنى قايىرىمدىلىق جاساۋدى ۇيرەنىپ جاتىرمىز. بۇل ەشقانداي ساياسات، ءدىن نەمەسە باسقا دا قوزعالىستارسىز ادامداردى بىرىكتىرەتىن باستاما»، - دەيدى «قايىرىمدى سەيسەنبىنىڭ» قازاقستانداعى ۇيلەستىرۋشىسى ولگا ساليموۆا.

«كەيدە كوشەدەگى قايىرشىلارعا اقشا بەرەمىز، ءبىراق ولار شىن مانىندەگى مۇقتاج جاندار ەمەس، الاياق تا بولۋى مۇمكىن. كىمگە كومەك بەرىپ جاتقانىمىزدى بىلۋگە ءتيىسپىز. «قايىرىمدى سەيسەنبى» سوعان باۋليدى»، - دەيدى ول.

«قايىرىمدى سەيسەنبى» قازاقستاندا العاش رەت بىلتىر وتكىزىلگەن. بيىل اكسياعا بىلتىرعىدان كوبىرەك بيزنەسمەندەر، ۇكىمەتتىك ەمەس ۇيىمدار، قايىرىمدى جاندار قاتىسىپ جاتىر.

«اۋقىمدى قوزعالىستىڭ ءبىر بولىگى بولعانىمىزعا قۋانىشتىمىز. «قايىرىمدى سەيسەنبى» قايىرىمدىلىق ىستەرگە جۇرتشىلىق نازارىن اۋدارۋعا سەپتىگىن تيگىزەدى»، - دەيدى «SOS قازاقستاننىڭ بالالار اۋىلدارى» قورىنىڭ كورپوراتيۆتىك فاندرايزەرى روزا قارابەكوۆا.

ۇيىمدار دا، جەكە تۇلعالار دا givingtuesdaykz.com سايتىنا تىركەلۋ ارقىلى باستاماعا بىردەي قولداۋ كورسەتە الادى.