بوكس: دانيار ەلەۋسىنوۆ كەزەكتى قارسىلاسىن نوكاۋتپەن جەڭدى

استانا. قازاقپارات - موناكوداعى بوكس كەشىندە وليمپيادا چەمپيونى دانيار ەلەۋسىنوۆ نيكاراگۋالىق ماركوس موحيكامەن شارشى الاڭعا شىقتى، دەپ حابارلايدى قازاقپارات ءتىلشىسى.

باتىس قازاقستان وبلىسىنان تۇلەپ ۇشىپ، اۋەسقوي بوكستاعى بارلىق بيىكتى باعىندىرعان 1991 -جىلعى دانيار ەلەۋسىنوۆتىڭ (4-0, 2 ك و) بۇل كاسىپقوي رينگتەگى بەسىنشى كەزدەسۋى بولسا، 33 جاسار ماركوس موحيكا (16-2-2، 12 ك و) ودان الدەقايدا تاجىريبەلى ەكەنى انىق- تى.

كاسىپقوي رينگتە جۇرگەنىنە سەگىز جىل بولعان ماركوس بۇعان دەيىن تەك ءوز ەلىندە وتكىزگەن 20 جەكپە-جەكتىڭ 16 سىندا جەڭىسكە جەتسە، سونىڭ 12 سىن نوكاۋتپەن اياقتاعان-دى. كاسىپقوي بوكستاعى قادامىن بيىل عانا باستاعان دانيار ءتورت ايقاسىنىڭ ەكەۋىندە قارسىلاسىن نوكاۋتپەن جەڭگەن.

«كازينو دە مونتە-كارلوداعى» سەگىز راۋندتىق شايقاستا دانيار جەكپە-جەك تىزگىنىن بىردەن قولىنا الىپ، سوققىلارىن دارىتا باستادى. ەكىنشى راۋندتا-اق قازاقستاندىق بوكسشى قارسىلاسىن نوكداۋنعا جىبەردى. موحيكا ەكىنشى رەت نوكداۋنعا تۇسكەن ساتتە گونگ تا سوعىلدى.

ءۇشىنشى راۋندتا دانيار نيكاراگۋالىقتى تاعى ءبىر نوكداۋنعا جىبەردى. اقىرى موحيكا ەكى اۋىر سوققى العاننان كەيىن تورەشى جەكپە-جەكتى توقتاتتى. نوكاۋت!

د. ەلەۋسىنوۆ كەزدەسۋدەن كەيىنگى قازاق تىلىندە بەرگەن سۇحباتىندا قازاقستاندىق جانكۇيەرلەرىن الداعى ۋاقىتتا ۇلكەن جەڭىستەرمەن قۋانتاتىنىن جەتكىزدى.

ەسكە سالا كەتەيىك، بۇدان بۇرىن دانيار ەلەۋسىنوۆتىڭ كەزەكتى جەكپە-جەگى «حابار» تەلەارناسى ارقىلى تىكەلەي ەفيردەن كورسەتىلەتىنىن، ونىڭ سالماق ولشەۋ راسىمىنەن وتكەنىن جازعان بولاتىنبىز.

بۇل كەشتىڭ باستى جەكپە-جەگىندە ءبىرىنشى اۋىر سالماقتاعى بۇرىنعى الەم چەمپيونى، رەسەيلىك دەنيس لەبەديەۆ (31-2، 23 ك و) امەريكالىق مايك ۋيلسونمەن (19-0، 8 ك و) جۇدىرىقتاسادى.