تالدىقورعاندا سەنىم مەن ادالدىققا نەگىزدەلگەن ەرەكشە دۇكەن اشىلدى
بۇل دۇكەن الماتى وبلىستىق قوعامدىق دەنساۋلىق ساقتاۋ دەپارتامەنتىنىڭ عيماراتىندا ورنالاسقان، دەپ حابارلايدى قازاقپارات ءتىلشىسى.
الماتى وبلىستىق مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل دەپارتامەنتى «جەر جانناتىن ايالايىق، جەمقورلىقتان ارىلايىق!» اتتى ايلىق جاريالادى. بەكىتىلگەن جوسپارعا سايكەس، ايلىق اياسىندا «ادالدىق دۇكەنى» جۇمىسىن باستادى. بۇل دۇكەننىڭ باستى ەرەكشەلىگى - ساتۋشىسى جوق. ساۋدا ورنىندا كالكۋلياتور، تولەنەتىن اقشاعا ارنالعان ارنايى جاشىك ورنالاسقان. ساتىپ الۋشى قاجەتتى تاۋاردى الىپ، ءوز بەتىنشە قۇنىن ەسەپتەپ، قاجەتتى قاراجاتتى جاشىككە سالىپ، قالعان اقشاسىن ءوز بەتىمەن قايتارىپ الا بەرەدى.
«بۇل تاجىريبەنى ءبىز سكانديناۆيا ەلدەرىنەن الىپ وتىرمىز. حالىق اراسىندا سىبايلاس جەمقورلىققا قارسى دۇنيەتانىم مەن ادالدىق قاعيداتتارىن قالىپتاستىرۋدا «ادالدىق دۇكەنىنىڭ» اشىلۋى ءبىزدىڭ قوعام ءۇشىن الەۋمەتتىك جاۋاپكەرشىلىك سەزىمىنىڭ تاماشا ىرگەتاسى بولارى ءسوزسىز»، - دەدى الماتى وبلىستىق مەملەكەتتىك قىزمەت ىستەرى دەپارتامەنتىنىڭ باسشىسى سەرىكباي نۇرعيسايەۆ.
ەشكىم ساتىپ الۋشىلاردى باقىلامايدى جانە تاۋاردىڭ اقشاسىن تولەمەي الىپ كەتۋىنە كەدەرگى جاسامايدى. بارلىعى تولىق سەنىم مەن ادالدىقتا نەگىزدەلگەن. بەينەباقىلاۋ كامەرالارى دا، كۇزەت تە جوق. الداعى ۋاقىتتا وسىنداي «ادالدىق الاڭدارى» الماتى وبلىسىنىڭ جوعارعى وقۋ ورىندارى مەن كوللەدجدەرىندە اشىلاتىن بولادى.