ەلباسى ماقالاسى تۇرىك، ازەربايجان جانە قىرعىز تىلدەرىنە اۋدارىلدى

استانا. قازاقپارات - قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆتىڭ «ۇلى دالانىڭ جەتى قىرى» اتتى ماقالاسى تۇرىك، ازەربايجان جانە قىرعىز تىلدەرىنە اۋدارىلدى، دەپ حابارلايدى قازاقپارات.

ەلباسى ماقالاسىنىڭ تۇرىك، ازەربايجان جانە قىرعىز تىلدەرىندەگى نۇسقالارى حالىقارالىق تۇركى اكادەمياسىنىڭ رەسمي سايتىندا جاريالاندى.

ايتا كەتەيىك، ەلباسى ماقالاسى 21- قاراشا كۇنى جاريالانعان بولاتىن. وندا مەملەكەت باسشىسى ناقتى عىلىمي دەرەكتەرگە سۇيەنە وتىرىپ، جاھاندىق تاريحتاعى ءوز ءرولىمىزدى بايىپپەن ءارى دۇرىس پايىمداۋ ءۇشىن ۇلى دالانىڭ جەتى قىرىن جەتە ءتۇسىنۋىمىز كەرەكتىگىن بايانداعان.

ولاردى «اتقا ءمىنۋ مادەنيەتى»، «ۇلى دالاداعى ەجەلگى مەتاللۋرگيا»، «اڭ ءستيلى»، «التىن ادام»، «تۇركى الەمىنىڭ بەسىگى»، «ۇلى جىبەك جولى»، «قازاقستان - الما مەن قىزعالداقتىڭ وتانى» سىندى تاقىرىپتارعا ءبولىپ، سيپاتتاعان ەدى. سونداي-اق، پرەزيدەنت ماقالادا كوتەرىلگەن ماسەلەلەر جان-جاقتى وي ەلەگىنەن وتكىزىپ، تەرەڭ زەردەلەۋدى تالاپ ەتەتىنىن ەسكەرە وتىرىپ، جۇمىستى بىرنەشە ءىرى جوبالار ارقىلى باستاۋعا بولادى دەپ پايىمداعان-دى.

ياعني، «ارحيۆ-2025»، «ۇلى دالانىڭ ۇلى ەسىمدەرى»، «تۇركى الەمىنىڭ گەنەزيسى»، «ۇلى دالانىڭ ەجەلگى ونەر جانە تەحنولوگيالار مۋزەيى»، «دالا فولكلورى مەن مۋزىكاسىنىڭ مىڭ جىلى»، «تاريحتىڭ كينو ونەرى مەن تەلەۆيزياداعى كورىنىسى» اتاۋلى جوبالاردى قولعا الۋ قاجەتتىگىن اتاپ كورسەتكەن. ماقالا قورىتىندىسىندا نۇرسۇلتان نازاربايەۆ بۇل جوبالاردى ءوزىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىنىڭ جالعاسى رەتىندە قاراستىراتىنىن جازعان بولاتىن.