استانادا تەك ەلەكتروموبيلدەرگە ارنالعان اۆتوتۇراق اشىلماق
بۇل جايىندا قازاقستاننىڭ ەكولوگيالىق ۇيىمدارى قاۋىمداستىعى باسقارماسىنىڭ ءتورايىمى ايگۇل سولوۆيەۆا ايتتى، دەپ حابارلايدى قازاقپارات ءتىلشىسى.
«استانانىڭ 2018-2020 -جىلدارعا ارنالعان جوسپارىندا ەلەكتروموبيلدى پايدالانۋدى ىنتالاندىرۋ ءۇشىن جول قوزعالىسىن ۇيىمداستىرۋ سىزباسىن ازىرلەۋ جانە بەكىتۋ سىندى باعىت قامتىلعان. ءسوز تەك ەلەكتروموبيلدەرگە ارنالعان ارنايى كولىك تۇراقتارى ورىندارىن انىقتاۋ جايىندا بولىپ وتىر. مۇنداي ورىندار بارلىق الەۋمەتتىك ماڭىزى بار جانە اكىمشىلىك نىسانداردىڭ، ساۋدا- ويىن ساۋىق ورتالىقتارىنىڭ جانىنداعى كولىك تۇراعى ورىندارى سانىنىڭ كەمىندە 10 پايىزى بولۋى ءتيىس»، - دەدى ول.
ونىڭ سوزىنە قاراعاندا، 100 ەلەكترمەن قۋاتتاۋ ستانساسىن ورنالاستىرۋ ءۇشىن ارنايى ورىنداردى بەلگىلەۋ جوسپارلانعان. ال وسىناۋ ىلكى جوبانى جۇزەگە اسىرۋ «وپەراتور روپ» ج ش س- نە تاپسىرىلماق.
«قالا اكىمى باقىت سۇلتانوۆ جوسپاردىڭ وسى جانە وزگە دە شارالارىن جۇزەگە اسىرۋ ءارى ورىنداۋ بويىنشا كەڭەستى تۇراقتى وتكىزىپ وتىرادى. سوڭعى كەزدەسۋدە ەلەكترواۆتوبۋستار ساتىپ الۋ جايى تالقىلاندى. ول ءۇشىن باعدار ايقىندالىپ، جوبانى جۇزەگە اسىرۋعا ۇمىتكەر كومپانيا ايقىندالىپ جاتىر»، - دەدى ايگۇل سولوۆيەۆا.
قاۋىمداستىق قورشاعان ورتانى ساۋىقتىرۋ جونىندەگى ءىس-شارالاردىڭ كەشەندى جوسپارىن 8 باعىت بويىنشا ازىرلەۋدە. قازىرگى ۋاقىتتا قاۋىمداستىق 10 وبلىس جانە قالامەن ىنتىماقتاستىقتا جۇمىس ىستەيدى.
اۆتور: دامير بايمانوۆ