قازاقستاندىق سىنعان اياعىمەن الەم چەمپيوناتىندا جۇلدەگەر اتاندى

استانا. قازاقپارات - قازاقستاندىق م م ا شەبەرى الەم چەمپيوناتىندا سىنعان اياعىمەن ءۇش ايقاس وتكىزىپ، سايىستان قۇر قايتپاي قولا مەدال يەلەندى، دەپ حابارلايدى قازاقپارات.

«وزدەرىڭىز بىلەتىندەي، م م ا- دان قازاقستان قۇراماسى باحرەيندە م م ا- دان وتكەن الەم چەمپيوناتىندا جەڭىس تۇعىرىنان كورىندى. جالپى، كوماندامىز 9 مەدال، ونىڭ ىشىندە 1 التىن، 1 كۇمىس جانە 7 قولا مەدالگە يە بولدى. قولا مەدال يەلەنگەندەردىڭ ىشىندە 56,7 كەلى سالماقتا ونەر كورسەتكەن ورالدىق ءالىبي تەمىرتاسوۆتى ەرەكشە اتاپ وتكىم كەلەدى. ەكىنشى ايقاستىڭ ورتاسىندا ول اياعىنان جاراقات الىپ، قالعان ەكى ايقاستى اقساپ ءجۇرىپ وتكىزدى. شىنىمدى ايتسام، مەن ونىڭ سانىن لوۋ-كيكتەر جايى اۋىرتقانىن، ءىسىنۋ كوپ وتپەي كەتەتىن شىعار دەپ ويلاعان ەدىم. بۇگىن وتانىمىزعا ورالعاننان كەيىن رەنتگەنگە تۇسكەسىن ءالىبيدىڭ جىلىنشىك سۇيەگىن سىندىرىپ العانىن بىلدىك!!! مۇنداي جاراقاتپەن الەم چەمپيوناتىندا مەدال يەلەنبەك تۇگىلى، ءتىپتى ءجۇرۋدىڭ ءوزى بەينەت ەدى. مەن تاڭعالىپ وتىرمىن»، - دەپ جازادى ايدار ماحمەتوۆ ءوزىنىڭ فەيسبۋك پاراقشاسىندا.

ونىڭ ايتۋىنشا، ءالىبي ¼ فينالدا بۇرىنعى چەمپيوناتتىڭ جۇلدەگەرى - امەريكالىقتى قىلقىندىرىپ، جەڭىپ كەتكەن.

«ال جارتىلاي فينالدا ءالىبي وسى سايىستا چەمپيون بولعان داعىستاندىق رۋسلان ساتيەۆكە الاپات قارسىلىق كورسەتتى. تورەشىلەر ساتيەۆتىڭ قولىن كوتەردى. مىنە، قازاق جەرى وسىنداي باتىرلارىمەن ماقتانۋى كەرەك! وسىنداي جىگىتتەر ءبىزدىڭ ەلىمىزدىڭ اتاق-ابىرويىن اسپانداتادى»، - دەيدى ا. ماحمەتوۆ.

ونىڭ ايتۋىنشا، ءالىبيدىڭ دياگنوزى كۇردەلى بولعاندىقتان، جاراقات وتاسىز جازىلمايدى.