كوشى- قون قىزمەتكەرلەرىنىڭ قىلمىستىق ارەكەتتەرى اشكەرەلەندى

استانا. قازاقپارات - الماتى قالاسىنىڭ كوشى- كون قىزمەتكەرلەرى دەلدال ارقىلى شەتەل ميگرانتتارىن زاڭسىز راسىمدەپ وتىرعان. ول ءۇشىن قالانىڭ بىرنەشە جەرىندە جەكە مەنشىك پاتەرلەردە «كەڭسەلەردى» دە اشقان، دەپ حابارلايدى قازاقپارات.

ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگىنىڭ مالىمەتىنە سايكەس، الماتى قالاسى جانە الماتى وبلىسىنىڭ كوشى- قون باسقارمالارىنىڭ لاۋازىمدى تۇلعالارىنا قاتىستى سوتقا دەيىنگى تەرگەۋ شارالارى باستالدى. قىلمىستىق توپتا ءتورت ادام بولعان. ولار جاقىن شەتەلدەن كەلگەن ەڭبەك ميگرانتتاردى زاڭسىز تىركەۋمەن اينالىسقان.

«جەدەل ىزدەستىرۋ شارالارى كەزىندە ەڭبەك ميگرانتتارىن تىركەۋگە ارنالعان زاڭسىز كەڭسە انىقتالدى. سول جەردە 800 مدەن استام شەتەل ازاماتتارىنىڭ ءتولقۇجاتتارى، جالعان مەديتسينالىق انىقتامالار، داكتيلوسكوپيالىق قۇجاتتار، فوتوعا تۇسىرگەنى تۋرالى تازا بلانكتەر جانە جالعان ەڭبەك شارتتار تابىلدى» ، - دەيدى اگەنتتىكتىڭ باسپا ءسوز حاتشىسى جاننا باستاروۆا.

ونىڭ سوزىنە قاراعاندا، وسى ۋاقىتقا دەيىن قىلمىستىق توپ 673 شەتەل ازاماتىنا زاڭسىز رۇقسات قۇجاتتارىن جاساپ بەرگەن.

«سوتتىڭ شەشىمىمەن بوستاندىق اۋدانىنىڭ ىشكى ىستەر باسقارماسى كوشى- قون ءبولىمىنىڭ باستىعى مۇسانوۆ پوليتسيا مايورى شەنىنەن ايىرىلدى. وعان مەملەكەتتىك قىزمەتتە جۇمىس ىستەۋگە تىيىم سالىندى. بۇدان بولەك، ول 4,7 ميلليون تەڭگە كولەمىندە ايىپپۇل تولەۋگە مىندەتتەلدى. ال دەلدال شامسيەۆ 760 مىڭ تەڭگە كولەمىندەگى ايىپپۇلعا سوتتالدى. قالعان فيگۋرانتتارعا قاتىستى سوتقا دەيىنگى تەرگەۋ شارالارى جالعاسۋدا» ، - دەپ اتاپ كورسەتتى ج. باستاروۆا.