قازاقستاندا پوليەتيلەن پاكەتتەرگە تىيىم سالىنادى

استانا. قازاقپارات - قازاقستان بىرتىندەپ پوليەتيلەن پاكەتتەردەن باس تارتادى. بۇل تۋرالى پارلامەنت سەناتىندا تىلشىلەرگە ق ر ەنەرگەتيكا ۆيتسە-ءمينيسترى ءسابيت نۇرلىباي ءمالىم ەتتى، دەپ حابارلايدى قازاقپارات.

«ءبىز پوليەتيلەن پاكەتتەردى پايدالانۋدان بىرتىندەپ جۇيەلى تۇردە باس تارتۋىمىز كەرەك. بۇل باعىتتاعى قادامدارعا ءتيىستى ۋاقىت كەرەك. سايكەسىنشە، ونى ىسكە اسىرۋ ءۇشىن بالامالى ونىمدەردى دايىنداۋعا ءتيىستىمىز. اتاپ ايتقاندا، ءبىز وتە ماڭىزدى قادامدى جاسادىق، ياعني سۋپەرمەركەتتەردە پوليەتيلەن پاكەتتەرى تەگىن تاراتىلماۋىنا قول جەتكىزدىك. ازىرلەنىپ جاتقان ەكولوگيالىق كودەكس اياسىندا اتالعان ماسەلەنى پىسىقتايتىن بولامىز»، - دەدى ءسابيت نۇرلىباي.

بۇل تۇرعىدا ۆيتسە-مينيستر ەلىمىزدە پوليەتيلەن پاكەتتەرىنە تىيىم سالۋ شارالارى الداعى 5-10 جىلدا ەنگىزىلۋى مۇمكىن ەكەنىن ايتتى.

ەسكە سالا كەتەيىك، ق ر ەنەرگەتيكا ءمينيسترى قانات بوزىمبايەۆ پوليەتيلەن پاكەتتەردى قولدانىستان شىعارۋعا قاتىستى پىكىر بىلدىرگەن ەدى.

«تۇبىندە پوليەتيلەن پاكەتتەرگە تىيىم سالامىز دەپ ويلايمىن. ويتكەنى، پوليەتيلەن پاكەتتەرگە، قورشاعان ورتانى قورعاۋعا قاتىستى پروبلەما بار جانە ول بارىنشا كۇردەلى. قايتا وڭدەۋ ءالى تالاپقا ساي ەمەس. كورشى وزبەكستاندا شارالار قابىلدانىپ جاتىر. ءبىراق، ءبىزدىڭ ەكونوميكامىز بىردەن الىپ تىيىم سالۋعا ءالى دايىن ەمەس. ءبىز تىيىم سالۋ شارالارىنا بارمايمىز، بىرنەشە كەزەڭگە ءبولىپ تاستايمىز»، - دەدى مينيستر.

ونىڭ ايتۋىنشا، ەڭ الدىمەن مۇنداي پاكەتتەردى تەگىن بەرۋ توقتاتىلادى. ياعني، ادامدار اتالعان پاكەتتەرگە اقشا تولەۋى ءتيىس.