الەمگە تانىمال تاعى ەكى كىتاپ قازاق تىلىنە اۋدارىلدى
بۇل جۇمىستارعا 300 دەن اسا عالىمدار مەن اۋدارماشى-رەداكتورلار جۇمىلدىرىلعان، دەپ حابارلايدى قازاقپارات ءتىلشىسى.
بۇگىن الماتىداعى ورتالىق كوممۋنيكاتسيالار قىزمەتىندە وسى جوباعا بايلانىستى باسپا ءسوز بريفينگى ءوتتى.
بۇگىن جۋرناليستەرگە قوسىمشا اۋدارىلىپ، باسىلىپ شىققان ەكى كىتاپ تانىستىرىلدى.
تاريحشى يۋۆال نوي حارراريدىڭ «Sapiens: ادامزاتتىڭ قىسقاشا تاريحى» كىتابى مەن ستيۆەن كوۆيدىڭ «جاسامپاز ادامنىڭ 7 داعدىسى» اتتى ەڭبەگى قازاق اۋديتورياسىنا جول تارتتى.
«بۇگىن كىتاپتاردىڭ كوپشىلىككە جول تارتۋىن اسىعا كۇتكەن كۇن. وسى كىتاپ ەڭ ۇلكەن قالالارداعى ەڭ ۇلكەن دۇكەندەردە ساتىلاتىن، ەڭ ۇلكەن تيراجبەن باسىلىپ تاراعان كىتاپتار. بۇعان دەيىن قازاق تىلىندە مۇنداي ەڭ كوپ تاراعان بەستسەللەر بولماعان. بيىل جوبا اياسىندا الەمدىك بەستسەللەر سانالاتىن 30 كىتاپ ىرىكتەلىپ الىندى. ءتىزىمدى ءبىزدىڭ سايتتان كورۋگە بولادى. قازىر وسى باعىتتا جۇمىس جاسالىپ جاتىر. نەگىزىنەن ءبىر كىتاپتى اۋدارۋعا 6-7 اي ۋاقىت كەتەدى. ول اۋدارما، عىلىمي رەداكسيا، ادەبي رەداكسيا، قاتتاۋ، بەتتەۋ، باسپا سياقتى كەزەڭدەر. شىندىعىندا، ءار اۋدارما - ءبىر تۋىندى جازۋمەن پاراپار»، - دەدى ۇلتتىق اۋدارما بيۋروسىنىڭ اتقارۋشى ديرەكتورى راۋان كەنجەحان ۇلى.
ونىڭ ايتۋىنشا، قازىر فيلوسوفيا، الەۋمەتتانۋ، پسيحولوگيا، مادەنيەتتانۋ، ءدىنتانۋ، ءتىل ءبىلىمى، ەكونوميكا، مەنەدجمەنت پەن كاسىپكەرلىك سالالارى بويىنشا الەمنىڭ ۇزدىك وقۋ ورىندارىنىڭ قولدانىسىنداعى ەڭ تانىمال وقۋلىقتار قازاق تىلىنە اۋدارىلىپ جاتىر.
قالالىق ىشكى ساياسات باسقارماسىنىڭ باسشىسى نۇرلان سىدىقوۆتىڭ ايتۋىنشا، جوبا اياسىندا كىتاپتاردىڭ اۋديو نۇسقاسى جارىق كورەدى.
«ەگەر بۇل كىتاپتاردىڭ تاريحىنا ۇڭىلەتىن بولساڭىزدار، وزدەرىڭىز جاقسى بىلەتىندەي «جاسامپاز جانداردىڭ جەتى داعدىسى» الەمنىڭ 40 تىلىنە اۋدارىلىپ 30 ميلليوننان استام دانامەن جارىققا شىققان كىتاپ. ال ەندى بۇگىن بۇل كىتاپتار قازاق تىلىنە اۋدارىلىپ جوعارىدا ايتقانداي جالپى اۋديتورياعا قولجەتىمدى بولىپ جاتىر. رۋحاني جاڭعىرۋ باعدارلاماسىندا كورسەتىلگەن نەگىزگى قۇندىلىقتار بار - ول سانانىڭ اشىقتىعى، بىلىمگە دەگەن قۇشتارلىق، پراگماتيزم ماسەلەسى. ءبىزدىڭ ويىمىزشا وسىنداي قوسىمشا كىتاپتار ارقىلى، قوسىمشا ءبىلىم ارقىلى بۇل ماسەلەلەر قامتىلاتىن بولادى. سونىمەن قاتار بۇل الەمدىك بەستسەللەردىڭ ەندى اۋديو نۇسقاسى، ەلەكتروندى نۇسقاسى شىعاتىن بولدى»، - دەدى نۇرلان سىدىقوۆ.
مامانداردىڭ ايتۋىنشا، كىتاپتىڭ 1 بەتىن اۋدارۋ ءۇشىن 7 مىڭ تەڭگە جۇمسالادى.
ورتا ەسەپپەن 1 كىتاپتى اۋدارۋعا 30 ميلليون تەڭگە شاماسىندا قارجى جۇمسالادى.
ايتا كەتەيىك، قازاقستان پرەزيدەنتى نۇرسۇلتان نازاربايەۆتىڭ «رۋحاني جاڭعىرۋ» باعدارلاماسى اياسىنداعى «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسىن جۇزەگە اسىرۋ ءۇشىن ۇلتتىق اۋدارما بيۋروسى قۇرىلعان بولاتىن.
اتالعان بيۋرو بىلتىر 18 كىتاپتى قازاق تىلىنە اۋداردى. بۇل وقۋ قۇرالدارى 10000 تارالىممەن 110 جوعارى وقۋ ورىندارىنا تاراتىلعان ەدى.
جوبا باستالعالى بەرى ۇلتتىق اۋدارما بيۋروسى كەمبريدج، وكسفورد ۋنيۆەرسيتەتتەرىنىڭ باسپالارى مەن Cengage, Pearson, Penguin Random House, Mcmillan سەكىلدى حالىقارالىق باسپا ۇيلەرىمەن تىعىز ارىپتەستىك بايلانىس ورناتتى.