قازاقستاندىق عالىم يۋنەسكو مەدالىمەن ماراپاتتالدى

استانا. قازاقپارات - تانىمال وتاندىق حيميك عالىم زۇلقايىر مانسۇروۆقا يۋنەسكونىڭ «نانوعىلىم مەن نانوتەحنولوگيالار دامۋىنا قوسقان ۇلەسى ءۇشىن» مەدالى تابىستالدى.

ماراپاتتاۋ ءراسىمى 22- قاراشادا اتالعان ۇيىمنىڭ پاريجدەگى باس پاتەرىندە ءوتتى، دەپ حابارلايدى ق ر س ءى م باسپا ءسوز قىزمەتى.

مەدال تۇجىرىمداماسىن 2010-جىلى يۋنەسكو باس ديرەكتورى بەكىتىپ، سول كەزدەن بەرى ول جىل سايىن وسى سالاداعى الەمدىك عىلىمنىڭ العا باسۋىنا ەلەۋلى ۇلەس قوسقان كورنەكتى عالىمدار مەن ۇيىمدارعا بەرىلەدى. وتاندىق عالىم بيىل ءوزىنىڭ «نانوكومىرتەك ماتەريالدارىن وڭدەۋ، كومىرتەكتى نانوتۇتىكتەر مەن گرافەندەردى جانۋ كۇيىندە سينتەزدەۋ تەحنولوگيالارىنا زەرتتەۋگە قوسقان ۇلەسى» ءۇشىن ماراپاتتالدى.

مەدالدى تابىستاۋدان كەيىن سويلەگەن سوزىندە ز. مانسۇروۆ يۋنەسكوعا جۇرگىزگەن زەرتتەۋلەرىنە وسىنداي جوعارى باعا بەرگەنى ءۇشىن ريزاشىلىعىن ءبىلدىرىپ، قازاقستاندىق عىلىمنىڭ جەڭىستەرىن بۇگىنگى تاڭدا عالىمدارىمىز، اسىرەسە جاستار، الەمنىڭ جەتەكشى زەرتتەۋ ورتالىقتارىمەن تىعىز ىنتىماقتاستىق ورناتۋعا بارلىق مۇمكىندىكتەرگە يە ەكەنىمەن بايلانىستىردى جانە وعان جاعداي جاساعان ەلباسى باستاماسىمەن جۇرگىزىلگەن جۇيەلى رەفورمالاردىڭ ارقاسى ەكەنىن اتاپ ءوتتى.

راسىمگە قاتىسقان قازاقستاننىڭ يۋنەسكو جانىنداعى تۇراقتى وكىلى جان عاليەۆ وتانداسىمىزدى جىلى قۇتتىقتاپ، وسى مەدالدىڭ ونىڭ وتاندىق جانە حالىقارالىق عىلىمي قاۋىمداستىققا سىڭىرگەن ادال ەڭبەگى، نانوعىلىم مەن نانوتەحنولوگيالارعا قوسقان ماڭىزدى ۇلەسىنىڭ لايىقتى مويىنداۋى رەتىندە قاراستىراتىنىن جەتكىزدى.

بيىل اتالعان ماراپاتقا مانسۇروۆتىڭ رەسەي، فرانسيا، اۋستراليا، فينليانديا، اۋستريا، گرەكيا، مىسىر مەن ا ق ش سياقتى مەملەكەتتەردە ەڭبەك ەتىپ جۇرگەن تاعى دا توعىز ارىپتەسى يە بولدى. زەرتتەۋلەرىنىڭ ناقتى قولدانىس سالالارىنا ەلەكترونيكا، تەلەكوممۋنيكاتسيالار، ماشينا جانە قۇرال جاساۋ، مەديتسينا، ماتەريالتانۋ مەن كوپتەگەن باسقالار جاتادى. مەدالمەن وسى كەزگە دەيىن ماراپاتتالعاندار اراسىندا فيزيكا سالاسىنداعى نوبەل سىيلىعىنىڭ لاۋرەاتتارى يسامۋ اكاساكي مەن جورەس الفەروۆ، قىتاي عىلىم اكادەمياسىنىڭ پرەزيدەنتى چۋنلي باي بار.

پروفەسسور، حيميا عىلىمدارىنىڭ دوكتورى زۇلقايىر ايتمۇحامەت ۇلى مانسۇروۆ ق ر ب ع م جانۋ پروبلەمالارى ينستيتۋتىنىڭ باس ديرەكتورى. تانىمال عالىم كوپ جىلدار بويى ءال-فارابي اتىنداعى قازاق ۇلتتىق ۋنيۆەرسيتەتىندە كوپ جىلدار بويى ەڭبەك ەتتى، سونىڭ ىشىندە ون بەس جىل بويى پرورەكتور رەتىندە. قازاقستان رەسپۋبليكاسىنىڭ مەملەكەتتىك پرەمياسى مەن قانىش ساتپايەۆ اتىنداعى پرەميانىڭ لاۋرەاتى.