اكادەميك كارل بايپاقوۆ ومىردەن وزدى

استانا. قازاقپارات - عالىم، ارحەولوگ، تاريح عىلىمدارىنىڭ دوكتورى، ق ر ع ا اكادەميگى كارل بايپاقوۆ قايتىس بولدى، دەپ حابارلايدى قازاقپارات ءتىلشىسى.

«ءبىرتۋار عالىم، ارحەولوگ، تاريح عىلىمدارىنىڭ دوكتورى، ق ر ع ا اكادەميگى، ق ر عىلىمى مەن تەحنيكانىڭ ەڭبەك سىڭىرگەن قايراتكەرى كارل مولداحمەت ۇلى بايپاقوۆتىڭ ومىردەن وتكەنىن قايعىرا حابارلايمىن. ونىڭ بۇكىل ءومىرى - حالىققا قالاي قىزمەت ەتۋدىڭ جارقىن ۇلگىسى. كارل مولداحمەت ۇلى - تاريح، وتانىمىزدىڭ مادەنيەتى مەن ارحەولوگياسى تۋرالى تانىمىمىزدى بايىتقان كىسى. جۋىردا عانا ءبىز ارحەولوگيالىق ورتالىقتاردى زەرتتەۋ بويىنشا ءىرى جوسپارلاردى بىرگە تالقىلاعان ەدىك. كارەكەڭنىڭ ءىسىن جالعاستىرۋ كەرەك دەپ ەسەپتەيمىن»، - دەپ جازدى مادەنيەت جانە سپورت ءمينيسترى ارىستانبەك مۇحامەدي ۇلى فەيسبۋكتەگى پاراقشاسىندا.

 مينيستر تاريحشىنىڭ ومىردەن وتكەنىن اۋىر قابىلداعانىن، ەل ءۇشىن ورنى تولماس قازا بولعانىن جازا وتىرىپ، عالىمنىڭ تۋعان- تۋىستارىنا كوڭىل ايتتى.

كارل مولداحمەت ۇلى بايپاقوۆ - 1940 -جىلى الماتى وبلىسى تالعار قالاسىندا تۋىلعان. لەنينگراد (1964، قازىرگى سانكت- پەتەربۋرگ) مەملەكەتتىك ۋنيۆەرسيتەتىن بىتىرگەن. 1991 -جىلدان ارحەولوگياق ينستيتۋتىنىڭ ديرەكتورى. «وڭتۇستىك قازاقستان مەن جەتىسۋدىڭ ورتاعاسىرلىق قالا مادەنيەتى» دەگەن تاقىرىپتا دوكتورلىق ديسسەرتاتسيا قورعادى. قازاقستاننىڭ ورتاعاسىرلىق قالالارى تاريحىن، قالا مەن دالا اراسىنداعى ءوزارا بايلانىستى زەرتتەپ، عىلىمدا جاڭا باعىتتى دامىتتى. بايپاقوۆ بىرنەشە حالىقار. كونفەرەنسيالارعا قاتىستى (درەزدەن، 1984؛ ۆاشينگتون، 1986؛ توكيو، 1988؛ پاريج، 1992؛ پەكين، 1992). يۋنەسكو ۇيىمداستىرعان «جىبەك جولى» حالىقارالىق ەكسپەديتسياسىنا قازاقستان تاراپىنان جەتەكشىلىك ەتتى (1991). بايپاقوۆ 22 مونوگرافيا، 200 دەن استام عىلىمي ماقالانىڭ اۆتورى. ش. ش. ءۋاليحانوۆ اتىنداعى سىيلىق لاۋرەاتى (1986). «پاراسات» وردەنىمەن ماراپاتتالعان.

اۆتور: ايان بەكەن ۇلى