استاناعا گاز قۇبىرىن تارتۋ جوسپارعا سايكەس اياقتالا ما؟

استانا. قازاقپارات - بيىلعى جەلتوقسان ايىندا «سارىارقا» گاز قۇبىرىنا قاتىستى ءتيىستى جۇمىستار باستالادى.

بۇل تۋرالى پارلامەنت سەناتىندا «جاسىل ەكونوميكا» تاقىرىبىندا ءوتىپ جاتقان ۇكىمەت ساعاتىندا ق ر ەنەرگەتيكا ۆيتسە-ءمينيسترى ءسابيت نۇرلىباي ءمالىم ەتتى، دەپ حابارلايدى قازاقپارات.

«قازىرگى كەزدە ەلدى مەكەندەردى گازداندىرۋ بويىنشا شارالاردى جۇزەگە اسىرۋعا كوپ كوڭىل ءبولىنىپ وتىر. 2018-جىلدىڭ قاڭتارىنداعى جاعداي بويىنشا قازاقستان حالقىن گازبەن قامتاماسىز ەتۋ دەڭگەيى 47,38 پايىزدى قۇرادى. بۇل رەتتە گازداندىرۋدىڭ جالپى كەستەسىنە سايكەس، 2030-جىلعا قاراي بۇل كورسەتكىشتى 56 پايىزعا دەيىن جەتكىزۋ جوسپارلانۋدا. وسى ورايدا قوسىمشا 1,5 مىڭنان استام ەلدى مەكەندى گازبەن قامتاماسىز ەتۋگە مۇمكىندىك بەرەدى»، - دەدى ۆيتسە-مينيستر.

ونىڭ سوزىنە قاراعاندا، 2017-جىلى 102 ميلليارد كۆت/ساعات ەلەكتر ەنەرگياسى وندىرىلسە، سونىڭ ىشىندە گاز ەلەكتر ستانسالارىنىڭ ۇلەسى 20,2 پايىزدى قۇرادى.

«مەملەكەت باسشىسىنىڭ تاپسىرماسىمەن 1,5 جىل ىشىندە «سارىارقا» ماگيسترالدى گاز قۇبىرىنىڭ قۇرىلىسىن ىسكە اسىرۋىمىز قاجەت. جوبانى جۇرگىزەتىن استانا گاز اكتسيونەرلىك قوعامى تەندەردى جاساپ، قازىرگى كەزدە مەردىگەر انىقتالدى. جەلتوقساننان باستاپ ءتيىستى جۇمىستار باستالادى، سونداي-اق كەلەسى جىلدىڭ جەلتوقسانىندا قۇبىر سالىنىپ بىتەدى دەپ جوسپارلانىپ وتىر»، - دەدى س. نۇرلىباي.

بۇدان بۇرىن حابارلانعانداي، «سارىارقا» ماگيسترالدى گاز قۇبىرىنىڭ « قىزىلوردا-جەزقازعان-قاراعاندى-تەمىرتاۋ-استانا» باعىتى بويىنشا ءبىرىنشى كەزەڭى 2019-جىلدىڭ جەلتوقسان ايىنا دەيىن اياقتالادى. ءبىرىنشى كەزەڭنىڭ بولجامدى قۇنى 267 ميلليارد تەڭگەدەن اسادى. قاراعاندى، اقمولا وبلىستارى مەن استانا قالاسىنىڭ اكىمدىكتەرى ماگيسترالدى گاز قۇبىرى مەن ايماقتىق جەلىلەر قۇرىلىسىنىڭ مەرزىمىن ەسكەرە وتىرىپ، ينفراقۇرىلىم قۇرىلىسى ءۇشىن جول كارتاسىن ازىرلەگەن.