قىتاي ا ق ش - پەن ساۋدا سوعىسىندا مۇددەسىن قورعاۋ ءۇشىن ەۋروپا ەلدەرىنە بەت بۇرۋدا
ساراپشىلار، بۇل قىتاي بيلىگىنىڭ قۇراما شتاتپەن ساۋدا سوعىسىندا ءوز مۇددەلەرىن قورعاۋ ماقساتىندا جاسالعان قادام دەپ قارايدى. 2004-جىلى باستالعان ەۋروپا-قىتاي فورۋمى گامبۋرگ سامميتى ەكى جىلدا ءبىر رەت ءوتىپ كەلەدى. سودان بەرى بۇل فورۋم قىتاي مەن ەۋروپا وداعى اراسىنداعى قارىم-قاتىناستى رەتتەۋ، تۇسىنىستىكتى تەرەڭدەتۋگە جاردەمدەسۋ، قىتاي مەن ەۋروپانىڭ ساياسي، ەكونوميكالىق جانە اكادەميالىق جەتەكشىلەر اراسىنداعى جانە تاراپتاردىڭ جوعارى دەڭگەيدەگى كەزدەسۋلەرى مەن الماسۋلارىنا جول اشىپ كەلەدى.
وسى ايدىڭ سوڭىندا، ارگەنتينادا وتەتىن G20 سامميتىندە ا ق ش پرەزيدەنتى ترامپ پەن قىتاي باسشىسى شي جينپيڭ اراسىندا جوعارى دەڭگەيدەگى كەزدەسۋ جوسپارلانۋدا. ترامپ-شي سامميتى قارساڭىندا شي جينپيڭنىڭ ەكونوميكالىق كەڭەسشىسى ليۋ حىنىڭ گەرمانياعا ساپارى الەم اقپارات قۇرالدارىنىڭ نازارىن وزىنە اۋداردى.
قازىر ا ق ش - قىتاي اراسىنداعى ساۋدا قاقتىعىسى كۇشەيە تۇسۋدە. وعان قوسا، ترامپ-شي كەزدەسۋدە ەكى جاققا ورتاق تيىمگە كەلە الاتىنىنا ەشكىم كەپىلدىك بەرمەيدى. سوندىقتان دا، قىتاي بيلىگى ەۋروپا ەلدەرىمەن قارىم-قاتىناستى كۇشەيتۋگە تىرىسۋدا.
اسىرەسە، بيىل بۇل باعىتتا بەيجىڭ بيلىگى بارىن سالا تىرىسىپ باقتى. قۇراما شتات پرەزيدەنتى ترامپ گەرمانيانى ا ق ش-پەن ۇزاق مەرزىمدى ساۋدا كەلىسىمىن قامتاماسىز ەتپەدى دەپ سىنعا الدى. ەگەر ترامپ گەرمانيانىڭ ا ق ش- قا باعىتتاعان ەكسپورتىنا تاريفتەر ەنگىزەتىن بولسا، وندا بۇل نەمىس ەكونوميكاسىنا ۇلكەن سوققى بولادى دەگەن بولجامدار بار.
الايدا، مىنا ءبىر ماسەلەنى ەسكەرۋگە تۋرا كەلەدى. گەرمانيا دا ا ق ش- قا ۇقساس، قىتايدىڭ ادىلەتسىز ساۋدا ساياساتى مەن زياتكەرلىك مەنشىك قۇقىعىن ۇرلاۋ ارەكەتتەرىنە قاتتى نارازى.
سوندىقتان دا، قىتاي ەكونوميكاسىن اشىق نارىقتىق ەكونوميكا رەتىندە مويىنداماعان ەلدەر قاتارىندا قالدى. سوندا دا، ا ق ش-قىتاي اراسىندا ساۋدا سوعىسى باستالعاننان بەرى گەرمانيا تارابى تاڭداۋ جاساۋدان باس تارتىپ كەلدى.
قىتاي ءتوراعاسىنىڭ ەكونوميكالىق كەڭەسشىسى، ۇكىمەت باسشىسىنىڭ ورىنباسارى ليۋ حىنىڭ گەرمانيا ساپارىندا بەرليندى قىتايمەن ساۋدا بايلانىسىن كەڭەيتۋگە كوندىرۋگە تىرىسارى حاق.
بۇل قىتايدىڭ ا ق ش- پەن ساۋدا سوعىسىنداعى تەڭسەلگەن ەكونوميكاسىن ساقتاپ قالۋ ءۇشىن ەۋروپاعا قاراي بارىنشا بەت بۇرىپ وتىرعانىن تۇسىندىرەدى.
«qazaqtimes.com»