ديماش قۇدايبەرگەننىڭ شىعارماشىلىعىنا بريتاندىق ب ا ق قىزىعۋشىلىق تانىتتى
19 - قاراشادا لوندوندا ۇلى بريتانياداعى قازاقستان مادەنيەتى كۇندەرى اياسىندا ديماش قۇدايبەرگەننىڭ جەكە كونسەرتى ءوتتى. بۇل شارانى قازاقستان رەسپۋبليكاسىنىڭ مادەنيەت جانە سپورت مينيسترلىگى ۇيىمداستىرىپ، ۇلى بريتانيا مەن سولتۇستىك يرلانديا بىرىككەن كورولدىگىندەگى قازاقستان رەسپۋبليكاسى ەلشىلىگى قولداعان بولاتىن.
«Indigo at the O2» كونسەرت زالىنداعى تريۋمفىنان سوڭ، ديماش قۇدايبەرگەن حالىقارالىق جەتەكشى ب ا ق وكىلدەرىمەن كەزدەسۋ ءۇشىن لوندوندا تاعى 2 كۇن بولدى. ديماش ءار سۇحباتىندا قازاقستان جانە ۇلتتىق سالت- داستۇرلەر تۋرالى قازاق تىلىندە ايتىپ بەردى. ءانشىنىڭ ايتۋىنشا، ول الەمگە تۋعان ەلىنىڭ مادەنيەتىن انا تىلىندە جەتكىزەتىنىن ماقتان تۇتادى. ديماش قۇدايبەرگەن لوندوندا وتكەن ءوزىنىڭ العاشقى جەكە كونسەرتىن ۇيىمداستىرۋشى ق ر مادەنيەت جانە سپورت مينيسترلىگىنە العىس ءبىلدىردى.
سونداي- اق، وسى كۇندەرى ءانشى ۇلى بريتانيا مەن سولتۇستىك يرلانديا بىرىككەن كورولدىگىندەگى قازاقستان رەسپۋبليكاسىنىڭ توتەنشە جانە وكىلەتتى ەلشىسى ەرلان ىدىرىسوۆپەن كەزدەستى. ەلشى مىرزا ديماشتىڭ بۇكىل الەمدە قازاقستان ەلشىسى ەكەنىن جانە ەلىمىزدىڭ بەدەلىن الەمدىك دەڭگەيدە كوتەرىپ جۇرگەنىن اتاپ ايتتى.
سول كۇنى ءانشى لوندونداعى قازاقستاندىق ستۋدەنتتەرمەن كەزدەستى. كەزدەسۋ ۇلى بريتانيا مەن سولتۇستىك يرلانديا بىرىككەن كورولدىگىندەگى قازاقستان رەسپۋبليكاسى ەلشىلىگىندە ءوتتى. مۋزىكانتپەن كەزدەسۋگە سان الۋان سالانىڭ بولاشاق ماماندارى كەلدى. ولار توسىن فوتوسەسسيا وتكىزىپ، وزدەرىن قىزىقتىرىپ جۇرگەن سۇراقتاردى قويدى.
ەلشىلىكتىڭ دالىزىندە ديماش جينالعاندارعا ارناپ، فورتەپيانودا بىرنەشە سۇيىكتى شىعارماسىن ورىنداپ بەردى.
الەمدىك جەتەكشى رەداكسيالارعا ارنالعان سۇحبات سەرياسىن ديماش قۇدايبەرگەن BBC تەليەۆيزياسى مەن راديوسىن ارالاۋدان باستادى. بريتاندىق BBC جالپى ۇلتتىق قوعامدىق تەلەراديو تاراتىلىمى ۇيىمىنىڭ ستۋدياسىندا ديماش قازاق تىلىندە بىرەگەي سۇحبات بەرىپ، ءوز شىعارماشىلىعىمەن ءبولىستى.
«BBC World Service» راديوستانسياسىندا مۋزىكانت «Cultural Frontline» سەنبىلىك شوۋى ءۇشىن ءوزىنىڭ تابىس جولىنداعى تاريحىمەن ءبولىستى. باعدارلاما جۇرگىزۋشىسى تينا داحەلي انشىمەن ونىڭ مۋزىكالىق جولى تۋرالى اڭگىمەلەستى. راديوستانسيانىڭ جاھاندىق اپتالىق اۋديتورياسى - 75 ميلليون تىڭدارمان.
بريتاندىق «The Independent» ينتەرنەت- باسپاسىنا بەرگەن سۇحباتىندا قازاقستاندىق ءوز مۋزىكاسى مەن شىعارماشىلىق جولى تۋرالى اڭگىمەلەدى. سۇحبات راديوعا ارنالعان پودكاست تۇرىندە ءوتتى. ءتىلشىنى قازاقستاندىق ءانشىنىڭ قاي جەردە دەمالعاندى ۇناتاتىنى قىزىقتىرىپ، وسىعان قاتىستى سۇراقتار قويدى. ديماش جۇمىس بارىسىمەن بارعان مەملەكەتتەرىمەن ءبولىسىپ، شەتەلدە ەشقاشان دەمالماعانىن ايتتى.
«قازاقستاندا اقتوبە دەگەن شاعىن قالا بار. سول جەردە مەنىڭ وتباسىم، اتا- اجەم، بۇكىل تۋىسىم تۇرادى. سول جەردە مەن كەرەمەت دەمالامىن»، - دەپ اشىق ايتتى ءانشى.
ودان بولەك، جاس ءانشى لوندوندىق «Candid» جۋرنالىنىڭ ءتىلشىسى ادام زورگانيمەن كەزدەستى. ادام «Indigo at the O2» زالىندا وتكەن ديماشتىڭ كونسەرتىندە بولعانىن جانە قازاقستاندىقتىڭ شىعارماسىنا ءتانتى ەكەنىن ايتتى.
«1883» ينتەراكتيۆتى مۋلتيمەديالىق پلاتفورماسىنا ديماش ءوز شىعارماسى مەن بولاشاققا قۇرعان جوسپارلارى تۋرالى ايتىپ بەردى. پورتال رەداكسياسى ءساندى مۋزىكا، كينو، ساياحات جانە ونەر الەمىندەگى سوڭعى جاڭالىقتاردى تاراتۋمەن اينالىسادى.
قازاقستاندىق ءانشى رەسەيلىك ت ا س س جەتەكشى اقپاراتتىق اگەنتتىگىنىڭ تىلشىلەرىمەن دە كەزدەسۋ وتكىزدى. سۇحبات بارىسىندا ديماش يگور كرۋتويمەن بىرگە جاساپ جاتقان جۇمىستارى جانە رەسەيلىك كومپوزيتورمەن بولاشاققا قۇرعان شىعارماشىلىق جوسپارلارى تۋرالى تولىق اقپارات بەردى.
بريتاندىق تانىمال فوتوگراف مايكل دونالد ديماش قۇدايبەرگەن ءۇشىن فوتوسەسسيا جاسادى. مايكلدىڭ جۇمىستارىنىڭ قاتارىندا امەريكالىق كينورەجيسسەر مارتين سكورسەزەنىڭ، «The Rolling Stones» روك- توبىنىڭ ۆوكاليسى ميك دجاگگەردىڭ، برازيليالىق فۋتبولشى پەلە مەن باسقا دا اتاقتى ادامداردىڭ فوتوسۋرەتتەرى بار.
سونداي- اق، وسى كۇندەرى ءانشى ۇلى بريتانياداعى «World History Archive» باس ديرەكتورى الەكساندر گولدبەرگپەن كەزدەستى. الەكساندر ديماش قۇدايبەرگەن تۋرالى اۆتوبيوگرافيا جازۋدى جوسپارلاپ وتىر. كەزدەسۋ جانعا جايلى جاعدايدا ءوتتى، ول ديماشقا قازاق دومبىراشىسى بەينەلەنگەن فوتوسۋرەتتى سىيعا تارتتى. بۇل جۇمىستىڭ اتاۋى جوق. الايدا، ول 1890 -جىلى تۇسىرىلگەنى بەلگىلى.
قازاقستاندىق ءانشىنىڭ شىعارماسى تىلشىلەردىڭ عانا ەمەس، ۇلى بريتانيالىق جۇلدىزداردىڭ دا قىزىعۋشىلىعىن تۋعىزدى. كونسەرت كورەرمەندەرى قاتارىندا جەرگىلىكتى جۇلدىزدار دا بولدى. ديماش ونەر كورسەتكەن كۇنى انشىگە قولداۋ كورسەتۋ ءۇشىن انگلياداعى اتاقتى ءانشى تاليا ستورم كەلدى. ول دوستارىمەن بىرگە ديماشتىڭ الداعى كونسەرتىنە ساتتىلىك تىلەدى. انگليالىق ءانشى كونسەرت بارىسىن ءوز اككاۋنتىنا جازىلعاندارعا ارناپ، الەۋمەتتىك جەلىدەگى پاراقشاسىندا كورسەتتى. كونسەرتتەن سوڭ ولار حات الماسىپ، دوستىق بايلانىس ورناتتى.
لوندونداعى ەستەن كەتپەس كۇندەردەن سوڭ ديماش قۇدايبەرگەن وتانىنا ورالدى.