پرەزيدەنت رۋحاني سانانى جاڭعىرتۋدىڭ تاعى ءبىر تىڭ جولىن ۇسىندى - ع. سارىبايەۆ
بۇل پىكىردى «نۇر وتان» پارتياسى الماتى وبلىستىق فيليالى ءتوراعاسىنىڭ ءبىرىنشى ورىنباسارى عالياسقار سارىبايەۆ تولەندى ۇلى ءبىلدىردى، - دەپ حابارلايدى قازاقپارات ءتىلشىسى.
«مەملەكەت باسشىسىنىڭ «ۇلى دالانىڭ جەتى قىرى» اتتى ماقالاسىندا ۇلت رۋحىن اسقاقتاتقان ۇلى دالانىڭ قىرى مەن سىرىنا جان-جاقتى توقتالىپ، اتا-بابالارىمىزدىڭ ادامزات وركەنيەتىنە قوسقان ولشەۋسىز ۇلەسىن ايرىقشا اتاپ كورسەتتى. ەلدىگىمىزدىڭ باعا جەتپەس ەنشىسىن ەرەكشەلەپ، ۇلتتىق قۇندىلىقتارىمىزدىڭ قاينارىن قايتا ءبىر سۋسىنداتقانداي وسى قۇندى ەڭبەك ەلباسىنىڭ تەرەڭ تولعامى، حالقىنا جەتكىزگىسى كەلگەن تاعى ءبىر پاراساتتى پايىمى ىسپەتتەس. سونداي-اق، ماقالادا ەلباسى تاسقا باسىلعان تاريحىمىزدى تارازىلاپ، تەرەڭ زەرتتەۋدى قاجەت ەتەتىن ۇلت مۇراسىن العا تارتتى. ءبىز وتكەننەن ونەگە الىپ، بولاشاعىمىزعا باتىل قادام باسۋىمىز ءۇشىن بۇگىنگى ۇرپاقتىڭ ساناسىنا بابالار قالدىرعان قۇندى مۇراعاتتى ءسىڭىرۋىمىز كەرەك»، - دەدى عالياسقار سارىبايەۆ.
«نۇر وتان» پارتياسى الماتى وبلىستىق فيليالى ءتوراعاسىنىڭ ءبىرىنشى ورىنباسارى ەلباسىنىڭ وسىعان دەيىن «بولاشاققا باعدار: رۋحاني جاڭعىرۋ» باعدارلامالىق ماقالاسى اياسىندا وڭىردە كوپتەگەن يگى ىستەر اتقارىلعانىن اتاپ ءوتتى. بۇگىنگى ماقالا سونىڭ جالعاسى ىسپەتتى ەكەنىنە توقتالدى.
«ۇلت كوشباسشىسى رۋحاني سانانى جاڭعىرتۋدىڭ تاعى ءبىر تىڭ جولىن ۇسىندى. سوندىقتان ماقالاعا ارقاۋ ەتىلگەن ءار باستاما - ءبىزدىڭ ءتول مادەنيەتىمىزدىڭ مايەگى بولىپ سانالادى. ەلباسىنىڭ جاڭا ماقالاسى «نۇر وتان» پارتياسىنىڭ باستاماشىل جاڭا جوبالارىمەن دە ۇندەس. مىسالى، «ءبىلىم ورتالىقتارى»، «شىعارماشىل زيالى قاۋىممەن جۇمىس»، «ارداگەرلەردى ارداقتايىق»، «سيفرلىق پارتيا» جوبالارى بۇگىنگى زاماننىڭ تالاپتارىن ەلىمىزدىڭ ۇلتتىق تاربيەسىمەن ءبىرتۇتاس قاراپ، وزەگىنە اينالدىرعان جاڭاشىل باستامالار. ءبىز ءۇشىن ماڭىزدى كورسەتكىشتىڭ ءبىرى - ەلىمىزدىڭ ساياسي تۇراقتىلىعىن ساقتاۋ، رۋحاني بايلىعىمىزدى بايىپتاپ، وسكەلەڭ ۇرپاق بويىنا جاڭا زاماندا جىگەر بەرەتىن ناعىز قازاقى رۋحتى دارىتۋ. وسى ماقساتىمىزدى پارتيا ءتوراعاسى، ەلباسىمىز نۇرسۇلتان ءابىش ۇلى دا ءدوپ باسىپ، ماقالاسىنىڭ وزەگىنە اينالدىرىپ وتىر. پارتيالىقتار ءۇشىن ماقالانىڭ ماڭىزدىلىعى اسا جوعارى. سەبەبى، ءبىزدىڭ ساياسي دوكترينامىزدىڭ ءوزى ادامي قۇندىلىقتارمەن تولىسقان، تاربيە مەن ءداستۇردىڭ ارناسىنان تاعىلىم العان، ادام مەن ونىڭ بوستاندىعىن قادىرلەۋدى باستى نازارعا العان قۇجات»، - دەپ ويىن قورىتىندىلادى عالياسقار سارىبايەۆ.