ساعىنتايەۆ ق ح ر مەملەكەتتىك كەڭەسىنىڭ پرەمەرى لي كىشياڭمەن كەلىسسوزدەر جۇرگىزدى

استانا. قازاقپارات - بەيجىڭدە ق ر پرەمەر- ءمينيسترى باقىتجان ساعىنتايەۆتىڭ ق ح ر مەملەكەتتىك كەڭەسىنىڭ پرەمەرى لي كىشياڭمەن كەزدەستى، سونداي- اق ول ءىرى قىتايلىق كومپانيالاردىڭ باسشىلارىمەن جانە ساراپتامالىق قۇرىلىمداردىڭ وكىلدەرىمەن جۇزدەستى،

 دەپ حابارلايدى primeminister.kz.

شىنجىن قالاسىندا ب. ساعىنتايەۆ الەمدىك يننوۆاتسيالىق كوشباسشىلار - SF Express, Tencent Holding جانە Huawei Technologies  كورپوراتسيالارىنىڭ دامۋ تاجىريبەسىمەن تانىستى.

ق ح ر مەملەكەتتىك كەڭەسىنىڭ پرەمەرى لي كىشياڭمەن ۇكىمەتارالىق كەلىسسوزدەر بارىسىندا جوعارى دەڭگەيدە قول جەتكىزىلگەن ۋاعدالاستىقتاردى ىسكە اسىرۋ بارىسى تالقىلاندى. كەلىسسوزدەر بارىسىندا ەكىجاقتى ساۋدا- ەكونوميكالىق، كولىكتىك- لوگيستيكالىق، ينفراقۇرىلىمدىق، يندۋستريالدى- يننوۆاتسيالىق دامۋ، وتاندىق اۋىل شارۋاشىلىعى ونىمدەرىنىڭ ەكسپورتىن ودان ءارى نىعايتۋ جانە تەرەڭدەتۋ ماسەلەلەرى قوزعالدى، سونداي- اق ينۆەستيتسيالار، سيفرلاندىرۋ، ونەركاسىپ، مەتاللۋرگيا، ماشينا جاساۋ، ەنەرگەتيكا جانە تۋريزم سالالارىنداعى ءوزارا ءىس- قيمىلدى كەڭەيتۋدىڭ پەرسپەكتيۆالارى اتالىپ ءوتتى. بۇدان وزگە، ترانس قۇرلىقتىق كونتەينەرلىك تاسىمالداردىڭ كولەمىن، اسىرەسە، ۇلى جىبەك جولى باعىتى بويىنشا ۇلعايتۋ مۇمكىندىگىنە كوڭىل ءبولىندى.

باقىتجان ساعىنتايەۆ قىتاي كومپانيالارىن جاڭا بيرجالىق ينفراقۇرىلىم  (AIX) جۇمىس ىستەي باستاعان «استانا» حالىقارالىق قارجى ورتالىعىمەن بەلسەنە سەرىكتەستىك ورناتۋعا جانە جەكەشەلەندىرۋ باعدارلاماسىنا قاتىسۋعا شاقىردى.

بۇدان وزگە، پەكيندە ق ر پرەمەر- ءمينيسترى قازاقستان ەكونوميكاسىن تەحنولوگيالىق قايتا جاراقتاندىرۋ، قۇرىلىس، اۋىل شارۋاشىلىعى جانە مەتاللۋرگيا سالالارىن دامىتۋ توڭىرەگىندە بىرلەسكەن جوبالاردى ىسكە اسىرۋ جانە ىنتىماقتاستىقتى دامىتۋ ماسەلەلەرى بويىنشا ءىرى يننوۆاتسيالىق كومپانيالاردىڭ وكىلدەرىمەن ءبىرقاتار ەكىجاقتى كەزدەسۋلەر وتكىزدى.

Ferro Mining HK CAG باس ديرەكتورى چەن لەيمەن كەزدەسۋدە حيميا- مەتاللۋرگيا كەشەنى كاسىپورىندارىندا يننوۆاتسيالىق تەحنولوگيالاردى ەنگىزۋ سالاسىندا ىنتىماقتاستىق ورناتۋ ماسەلەلەرى تالقىلاندى. گونكونگتا قۇرىلعان جوبالىق كومپانيا قارجى سالاسىنا جانە جەڭىل مەتالدار سالاسىندا مامانداندىرىلعان.

Youngxiang Group ۆيتسە- پرەزيدەنتى تان سياوياومەن اڭگىمەلەسۋ بارىسىندا مەتاللۋرگيالىق ونەركاسىپ سالاسىندا بىرلەسكەن جوبالار جاساۋ ماسەلەلەرى قارالدى. Youngxiang Group تاۋ- كەن مەتاللۋرگيا سالاسىنا، ينفراقۇرىلىمعا جانە قۇرىلىسقا ينۆەستيتسيا سالۋمەن اينالىسادى.

Lovol Heavy Industry Cо. كومپانياسىنىڭ ءتوراعاسى، باس ديرەكتورى ۆان گۋيمينمەن وتكەن كەزدەسۋ الەمدىك ستاندارتتارعا ساي كەلەتىن اۋىل شارۋاشىلىعى تەحنيكالارىن شىعارۋ سالاسىندا ىنتىماقتاستىقتى دامىتۋ ماسەلەسىنە ارنالدى. بۇگىندە Lovol Heavy Industry Cо. قىتايدىڭ ماشينا جاسايتىن ءىرى كومپانيالارىنىڭ ءبىرى، جىل سايىن 70 مىڭ تراكتور مەن 50 مىڭ كومباين شىعارادى.

CNOOD Asia Limited باسقارما ءتوراعاسى چي يۋنحايمەن ەكىجاقتى كەزدەسۋ اياسىندا جەڭىل جانە ازىق- تۇلىك ونەركاسىبىندەگى ىنتىماقتاستىق كەلەشەگى قارالدى. ينجينيرينگتىك كومپانيا مۇناي- گاز، سۋ، تاۋ- كەن ءوندىرىسى، سونداي- اق، جاڭارتىلاتىن ەنەرگيا كوزدەرى، ينفراقۇرىلىم، ارگوونەركاسىپ كەشەندەرى سالالارىنداعى جوبالارعا كونسترۋكسيا شىعارۋمەن اينالىسادى.

Nuchtech كومپانياسىنىڭ پرەزيدەنتى چەن چجيتسيانمەن كەزدەسۋدىڭ كۇن تارتىبىندە جاڭا تەحنولوگيالىق جابدىقتار شىعارۋ سالاسىندا بىرلەسكەن جوبالاردى ىسكە اسىرۋ ماسەلەلەرى قارالدى. مۇندا باقىتجان ساعىنتايەۆ شىعارىلاتىن ونىمدەردىڭ تۇرلەرىمەن تانىستى: كومپانيا قاۋىپسىزدىك تەحنيكاسىن ازىرلەپ، شىعارۋمەن اينالىسادى، سونىمەن قاتار ول - كەدەن جانە باسقا دا ۆەدومستۆولارعا ينسپەكتسيالىق- تەكسەرۋ كەشەندەرىنىڭ نەگىزگى جەتكىزۋشىسى.

بەيجىڭدە ب. ساعىنتايەۆ قىتايدىڭ ساراپتامالىق قۇرىلىمدارىنىڭ وكىلدەرىمەن، اتاپ ايتقاندا، بەيجىڭ ۋنيۆەرسيتەتىنىڭ قۇرىلىمدىق ەكونوميكالىق زەرتتەۋلەر ينستيتۋتىنىڭ (لين يفۋ)، ستراتەگيالىق دامۋ عىلىمي- زەرتتەۋ ينستيتۋتىنىڭ (ليۋ يۋانچۋن)، ق ح ر كوممەرتسيا مينيسترلىگى جانىنداعى حالىقارالىق ساۋدا- ساتتىق جانە ەكونوميكالىق ىنتىماقتاستىق اكادەمياسىنىڭ (لي حۋاتسين)، ق ح ر دامۋ جانە رەفورمالار ىستەرى جونىندەگى مەملەكەتتىك كوميتەتى جانىنداعى ەكونوميكا ينستيتۋتىنىڭ (ليۋ سيۋيان)، قىتاي قوعامدىق عىلىمدار اكادەمياسىنىڭ الەمدىك ەكونوميكا جانە ساياسات ينستيتۋتىنىڭ (ياو چجيچجۋن)، ق ح ر مەملەكەتتىك كەڭەسى جانىنداعى دامۋ ماسەلەلەرىن زەرتتەۋ ورتالىعىنىڭ (لۋن گوتسيان) باسشىلىعىمەن كەزدەسۋلەر وتكىزدى. الەمدىك ەكونوميكانى دامىتۋدىڭ وزەكتى ماسەلەلەرى، جاھاندىق جانە ايماقتىق ەكونوميكانى ودان ءارى دامىتۋدىڭ بولجامدى سسەناريلەرى، سونداي- اق قازاقستاننىڭ جاڭا قۇرىلىمدىق ەكونوميكاسىنىڭ پەرسپەكتيۆالارى قارالدى.

بەيجىڭگە رەسمي ساپار بارىسىندا ۇكىمەتارالىق كەلىسىمدەرگە جانە يندۋستريالاندىرۋ جانە ينۆەستيتسيالار، يننوۆاتسيالار جانە سيفرلاندىرۋ، اۋىل شارۋاشىلىعى جانە ەنەرگەتيكا سالاسىنداعى قازاقستان - قىتاي ىنتىماقتاستىعىن دامىتۋعا باعىتتالعان ءبىرقاتار كوممەرتسيالىق قۇجاتتارعا قول قويىلدى.

قورىتىندى قۇجاتتار: قاراعاندى وبلىسىنىڭ اكىمدىگى، «Kazakh Invest» ۇك جانە Horgos Xingbang اراسىنداعى قاراعاندى وبلىسىندا ەلەكتروليزدىك مارگانەتس ءوندىرۋ بويىنشا ءوزارا تۇسىنىستىك تۋرالى مەموراندۋم؛

«كوندەنسات» ا ق، «Kazakh Invest»  ۇ ك جانە CITIC Construction اراسىنداعى سينتەتيكالىق پارافين ءوندىرۋ بويىنشا جوبانى ىسكە اسىرۋ ءۇشىن ءوزارا تۇسىنىستىك تۋرالى مەموراندۋم؛

«TENIR Logistic»  ج ش س جانە Youbang Innovative Investment Limited اراسىنداعى قازاقستاندا تىملاي كەن ورنى بازاسىندا تاۋ- كەن- حيميا مەتاللۋرگيا كەشەنىن قۇرۋ جوباسى بويىنشا ىنتىماقتاستىق تۋرالى كەلىسىم؛

«جەل ەلەكتريك» ج ش س جانە Universal Energy Ltd. اراسىنداعى اقمولا وبلىسىندا جەل ەلەكتر ستانسياسىن سالۋ بويىنشا جوبانى بىرلەسىپ ىسكە اسىرۋ تۋرالى كەلىسىم؛

«پاۆلودار» ا ك ك» ا ق جانە CNOOD Asia Limited اراسىنداعى قانت قىزىلشاسىن وڭدەۋ زاۋىتىنىڭ قۇرىلىسى بويىنشا جوبانى ىسكە اسىرۋ ءۇشىن ءوزارا تۇسىنىستىك تۋرالى مەموراندۋم؛

قاراعاندى وبلىسىنىڭ اكىمدىگى، «تاۋ- كەن سامۇرىق» ۇ ت ك» اق جانە Xiamen Tungsten اراسىنداعى «سولتۇستىك قاتپار» جانە «جوعارى قايراقتى» ۆولفرام كەن ورىندارىن دامىتۋ بويىنشا جوبانى ىسكە اسىرۋ جونىندەگى ىنتىماقتاستىق تۋرالى كەلىسىم؛

قاراعاندى وبلىسىنىڭ اكىمدىگى، «تاۋ- كەن سامۇرىق» ۇ ت ك» ا ق جانە Xiamen Tungsten اراسىنداعى اممونيي پاراۆولفراماتىن ءوندىرۋ زاۋىتىنىڭ قۇرىلىسى جوباسى بويىنشا مامىلەنىڭ نەگىزگى شارتتارى تۋرالى كەلىسىم.

قازاقستان پرەمەر- ءمينيسترى ق ح ر- گە رەسمي ساپارى اياسىندا ونەركاسىپ ءوندىرىسىنىڭ كولەمى بويىنشا قىتايدىڭ ەكىنشى قالاسى شىنجىنگە باردى. شىنجىن جوعارى دەڭگەيدەگى ىرگەلى زەرتتەۋلەرمەن اينالىساتىن قىتاي قالالارىنىڭ بەستىگىنە كىرەتىنىن ايتىپ وتكەن ءجون. الەمنىڭ 500 جەتەكشى كورپوراتسيالارىنىڭ 230 دان استامىنىڭ وسىندا وفيستەرى مەن بولىمشەلەرى بار.

شىنجىن قالاسىندا ب. ساعىنتايەۆ الەمدەگى اسا ءىرى تەحنولوگيالىق كومپانيالارعا باردى. ولاردىڭ ىشىندە SF Holding, Tencent Holding جانە Huawei Technologies كومپانيالارى بار.

گۋاڭدۇڭ پروۆينتسياسىندا حالىقارالىق جەدەل جەتكىزۋ سالاسىنداعى كوشباسشىلاردىڭ ءبىرى SF Express ۇلەستىرۋ ورتالىعىنىڭ اۋماعىندا ب. ساعىنتايەۆقا لوگيستيكا، قويمالاۋ جانە تاۋارلاردى سۇرىپتاۋ، سونداي- اق ەلەكتروندى كوممەرتسيانى دامىتۋ سالاسىنداعى الدىڭعى قاتارلى تەحنولوگيالار تانىستىرىلدى. بۇگىنگى تاڭدا كومپانيا - قىتايداعى China Post-تان كەيىنگى، ۇلكەندىگى جاعىنان ەكىنشى كۋرەر، ىشكى جانە حالىقارالىق جەدەل جەتكىزۋدى قامتاماسىز ەتەدى. قازاقستان قىتايلىق كومپانيانىڭ تاجىريبەسىن زەردەلەۋگە جانە ىنتىماقتاستىقتى، ونىڭ ىشىندە قىتايدان ورتالىق ازيا ەلدەرىنە تاۋارلار جەتكىزۋ مەرزىمدەرىن قىسقارتۋ جانە «قورعاس» شەكارا ماڭى ىنتىماقتاستىعى حالىقارالىق ورتالىعىنىڭ اۋماعىنداعى ءوزارا ءىس- قيمىل ءۇشىن قازاقستاننىڭ ترانزيتتىك الەۋەتىن پايدالانۋ اياسىندا ىنتىماقتاستىقتى رەتكە كەلتىرۋگە مۇددەلى.

الەمدەگى ءىرى ينۆەستيتسيالىق جانە ۆەنچۋرلىق كومپانيالاردىڭ ءبىرى Tencent Holding Ltd. شتاب- پاتەرىن ارالاۋ كەزىندە ب. ساعىنتايەۆ Tencent Open Platform ستارتاپتارعا ارنالعان پلاتفورمانى دامىتۋ تاجىريبەسىمەن، سونىمەن قاتار ەكونوميكانىڭ ءتۇرلى سالالارىنا ارنالعان جيىنتىقتى تەحنولوگيالار مەن زياتكەرلىك شەشىمدەردىڭ ازىرلەمەلەرىمەن تانىستى. كومپانيانىڭ تابىستى تاجىريبەسى Astana Hub حالىقارالىق تەحنوپاركى بازاسىندا ستارتاپ- ەكوجۇيەنى جەتىلدىرۋ جانە يننوۆاتسيالىق قىزمەتتى دامىتۋ تۇرعىسىنان قازاقستاننىڭ قىزىعۋشىلىعىن تۋدىرادى. ءبىلىم مەن ءبىلىم بەرۋ تەحنولوگيالارىنىڭ ترانسفەرتى ەرەكشە قىزىعۋشىلىق تۋدىرادى: بۇل - جاساندى زەردە جۇيەلەرىن، ادامداردى تانۋ الگوريتمىن، مەديتسينالىق دياگنوستيكانى جانە ت. ب ازىرلەۋ بويىنشا جوبالاردى جۇرگىزۋدىڭ جاڭا بىلىمدەرى مەن داعدىلارىنا قازاقستاندىق مەنتورلار مەن ساراپشىلاردىڭ تاعىلىمداماسىن جانە وقىتىلۋىن ۇيىمداستىرۋ. ماسەلەن، Tencent Holding قىتايداعى ەڭ اۋقىمدى جانە الەمدەگى قولدانۋشىلارى جاعىنان Facebook پەن YouTube-تان كەيىن ءۇشىنشى ورىنداعى Qzone الەۋمەتتىك جەلىسىنە يە. قازىرگى تاڭدا ەڭ تانىمال ءونىم - 2011 -جىلى ىسكە قوسىلعان، 1 ميلليارد 80 ميلليون پايدالانۋشىسى بار WeChat باعدارلاماسى.

ينفوكوممۋنيكاتسيالىق شەشىمدەردى الەمدەگى جەتەكشى جەتكىزۋشى Huawei Technologies كوپوراتسياسىنىڭ الاڭىندا قازاقستان پرەمەر- ءمينيسترى قىتاي كومپانياسىنىڭ ءوز تەحنولوگيالارى مەن نوۋ- حاۋلاردى ازىرلەۋ سالاسىنداعى قول جەتكىزگەن جەتىستىكتەرىمەن تانىستى. قازىرگى تاڭدا Huawei كورپوراتسياسىنىڭ 140-تان استام ەلدە 15 وڭىرلىك وكىلدىگى، 36 بىرلەسكەن يننوۆاتسيالىق ورتالىعى جانە 15 زەرتتەۋ ورتالىعى بار. كورپوراتسيانىڭ تەلەكوممۋنيكاتسيالىق ينفراقۇرىلىمعا ارنالعان جابدىقتاردى، سونداي- اق جيىنتىقتى شەشىمدەر مەن ۇلكەن دەرەكتەر جۇيەسىنىڭ يننوۆاتسيالىق ازىرلەمەلەرىن ازىرلەۋدەگى تاجىريبەسى ەرەكشە قىزىعۋشىلىق تۋدىردى. بۇگىندە Huawei كومپانياسىنىڭ قاتىسۋىمەن قازاقستاندا جوعارى تەحنولوگيالىق جوبالار ىلگەرىلەپ جاتىر، ولاردىڭ قاتارىندا Astana Hub-تا زەرتحانانىڭ اشىلۋىن اتاپ وتۋگە بولادى. ءوزارا ءىس- قيمىل پەرسپەكتيۆالارى АТ - ۋنيۆەرسيتەت جۇمىسىنىڭ ىسكە قوسىلۋىمەن كەڭەيە تۇسپەك، وندا زەرتتەۋ جوبالارى مەن يننوۆاتسيالار سالاسىنداعى قىتاي كورپوراتسياسىنىڭ تاجىريبەسى مەن داعدىلارى اسا پايدالى بولماق.