جابايى ابوريگەندەر امەريكالىقتى ساداقپەن اتىپ ءولتىردى

استانا. قازاقپارات - بەنگال شىعاناعىندا اندامان ارالدارىنىڭ ءبىرىنىڭ بايىرعى تۇرعىندارى حريستيان ءدىنىن ۋاعىزداۋشى امەريكالىقتى ولتىرگەن.

ونىڭ مۇردەسىن سولتۇستىك سەنتينەل ارالىنا جەتكىزگەن بالىقشىلاردىڭ ايتۋىنشا، جەرگىلىكتى ابوريگەندەر مارقۇمدى ساداقپەن اتىپ ءولتىرىپ، دەنەسىن جاعالاۋعا تاستاپ كەتكەن.

جەرگىلىكتى ب ا ق- تاردىڭ حابارلاۋىنشا، الاباما شتاتىنىڭ تۇرعىنى 27 جاستاعى دجون اللەن چو بىرنەشە رەت اندامان ارالدارىنا بارىپ، حيستيان ءدىنىن ۋاعىزداعان.

«پوليتسيانىڭ مالىمدەۋىنشە، چو بۇدان كەم دەگەندە ءتورت نەمەسە بەس رەت جەرگىلىكتى بالىقشىلاردىڭ كومەگىمەن سولتۇستىك سەنتەنەل ارالدارىنا بارعان»، - دەپ ءمالىم ەتتى BBC- گە ارحيپەلاگتاعى وقيعالاردىڭ ءىزىن باعىپ جۇرگەن جۋرناليست سۋبير بحاۋميك.

ءبىرقاتار دەرەكتەرگە قاراعاندا، دجون چو 14- قاراشادا ارالعا بارماققا تىرىسقانىمەن ءساتى تۇسپەگەن. ول ارادا ەكى كۇن وتكەننەن كەيىن وسى ارەكەتىن تاعى قايتالاعان.

«وعان ساداقتىڭ بىرنەشە جەبەسى تيگەن. بالىقشىلار مارقۇمنىڭ دەنەسىن جىپكە بايلاپ سۇيرەتكەنىن كورەدى. ءبارى بۇدان قاتتى قورقىپ قاشا جونەلەدى»، - دەيدى جەرگىلىكتى تۇرعىنداردىڭ ءبىرى.

ايتا كەتسەك، 2017-جىلى ءۇندى بيلىگى اندامان ارالدارىنداعى بايىرعى تۇرعىنداردى سۋرەتكە نە بولماسا ۆيدەوعا تۇسىرگەندەر ءۇش جىلعا تۇرمەگە قامالاتىندىعى جونىندە قاۋلى قابىلداعان بولاتىن.

وركەنيەتتەن تىس وقشاۋ ءومىر ءسۇرىپ جاتقان بۇل ارالداردىڭ بايىرعى تۇرعىندارىنىڭ سانى شامامەن 150 ادامنان اسپايدى.