08:22, 23 - قاراشا 2018 | GMT +5
بەلگىسىز بىرەۋلەر فۋتبول كومانداسىنىڭ ويىنشىلارىن اتىپ كەتتى
استانا. قازاقپارات - مەكسيكادا گۋانحۋاتو شتاتىنداعى سالامانكا قالاسىندا بەلگىسىز بىرەۋلەر Taxi Express اۋەسقوي فۋتبول كومانداسىنىڭ ويىنشىلارىنا شابۋىل جاساعان. ءۇش ادام قازا تاۋىپ، تاعى ۇشەۋى جارالاندى، دەپ حابارلادى Televisa بەيسەنبى كۇنى.
ولار فۋتبول الاڭىنا ەكى جۇك ماشيناسىمەن كەلىپ، ادامدارعا وق جاۋدىرعان.
پوليتسيا وقيعا بولعان جەردەن ۆينتوۆكانىڭ 30 دان استام وعىن تاپقان. قۇقىق قورعاۋ ورگانى قىزمەتكەرلەرىنە قىلمىسكەرلەردى ۇستاۋدىڭ ءساتى تۇسپەدى.
ەكى ادامنىڭ سول جەردە مەرت بولعانى اتاپ وتىلەدى. ءۇشىنشى فۋتبولشى سالامانكاداعى وبلىستىق اۋرۋحانادا كوز جۇمعان. سونداي-اق تاعى ءۇش ادام گوسپيتالدا جاتىر. ولاردىڭ جاعدايى اۋىر.
كوماندانىڭ بارلىق وكىلدەرى تاكسي جۇرگىزۋشىلەرى بولعان.